Hatutan.com, (27 Juñu 2022), Díli– Sekretáriu Estadu ba Formasaun Profisionál no Emprégu (SEFOPE), Alarico de Rosário, hateten timoroan sé de’it mak hakarak atu bá servisu iha nasaun estranjeiru, presiza hetan koñesimentu legál ruma hosi Governu Timor-Leste, hodi nune’e, bele la’o tuir regra sira ne’ebé mak Governu hatuur tiha ona iha akordu bilateral sira mak halo ona.

Lee Mós : Traballadora Na’in-hitu “Abandona” iha Abudabi

Sekretáriu Estadu ba Formasaun Profisionál no Emprégu (SEFOPE), Alarico de Rosário ho kargu diretór sira foto hamutuk ho traballadór timoan nain-77 ne’ebé atu bá servisu iha Austrália. Foto/Hatutan.com

“Buat hothotu, ema nia direitu, maibé ita-nia direitu mós tenke  hatene regra. Regra ne’e hanesan ne’e, katak, ajénsia sira ida ne’ebé mak lori ema bá Portugal, Dubai, la liuhosi ami, ami lahatene. Nein iha halo komunikasaun, nein iha koordenasaun, ne’ebé, ami lahatene. Ida ne’e SEFOPE lahatene,” Sekretáriu Estadu ba Formasaun Profisionál no Empregu (SEFOPE), Alarico de Rosário, hateten bá jornalista sira, hafoin serimónia despedida ho kandidatu traballadór timoroan sira iha Otél Tower Bar, Fatuhada, Dili, Segunda (27/06/2022).

Alarico dehan, durante ne’e SEFOPE ho Ministériu Negósiu Estranjeiru no Kooperasaun (MNEK), hatene de’it katak, nasaun rua ne’ebé timoroan sira atu ba servisu maka, Austrália no Korea Súl.

“Sidadaun ida atu bá servisu iha rai seluk, ita nia Governu tenke hatene. Ida ne’e mak importante, ita tenke asegura ita-nia povu ne’e, atu bá ne’ebé de’it, tenke  asegura. Ne’e maka liuhosi Governu,” Alarico de Rosário hateten

Oras ne’e, Governu liuhosi SEFOPE, halo hela negosiasaun balu ho ajénsia balu hosi Dubai, Uniaun Emiradu Árabe, ne’ebé mak husu bá estadu TL atu haruka timoroan sira bele hetan oportunidade bá servisu. Maibé, sei presiza tán akordu formál ida entre Estadu rua nian, nune’e bainhira mosu buat ruma, Estadu rua bele hatene no buka mós solusaun hodi rezolve.

“Ida ne’e bainhira loos ona, ita lori bá. Porezemplu, Japaun, Dubai, ne’e mós agora mai halo koordenasaun hela, maibé seidauk iha akordu ida, ami seidauk bele husik ita-nia timoroan sira bá. Kuandu iha akordu ona, timoroan hetan oportunidade hanesan baibain,” informa Alarico.

SEFOPE husu ba ajénsia sira ne’ebé mak abandona traballadora timoroan sira iha Abudabi, inklui nasaun seluk tán, atu iha responsabilidade bá sira ninia servisu rasik.

Lee Mós : PCIC Kaptura Sidadaun Estranjeiru Na’in-rua, Deskonfia Envolve iha Sindikatu Tráfiku Umanu

 Jornalista: Rogério Pereira Cárceres