Hatutan.com, (29 Juñu 2022), Díli-Ministériu bá Planu no Ordenamentu (MPO) liuhosi Ajénsia bá Dezenvolvimentu Nasionál (ADN) sei halo monitorizasaun ka akompañamentu bá projetu konstrusaun edifísiu foun Rádiu Televizaun Timor Leste, Empreza Públika (RTTL,E.P) atu bele garante kualidade obra.

Lee Mós : Konstrusaun Edifísiu “Provizóriu” RTTL,E.P Sei Gasta Millaun $1-resin

Diretór ADN, Mariano Renato Monteiro da Cruz. Foto/Hatutan.com

Diretór ADN, Mariano Renato Monteiro da Cruz, hateten ADN sei monitorizasaun bá prosesu sira tomak empreza BANIR LEMA UNIP.LDA nian, inklui tau atensaun bá kualidade produtu sira ne’ebé utiliza bá konstrusaun edifísiu “provizóriu” RTTL,E.P nian ne’ebé gasta orsamentu Estadu hamutuk $1,196,095.54.

Iha Tersa (28/06/2022), Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ofisiálmente selebra ona kontratu ho diretór Kompañia BANIR LEMA UNIP.LDA, Domingos Sequeira, hodi bele hahú konstrusaun bá obra refere.

Diretór ADN konfirma katak tékniku sira ADN nian sei halo akompañamentu ba projetu ne’e, dono do projetu ka RTTL, E.P ne’ebé mak nu’udár na’in bá projetu ne’e, tenke haruka karta ida bá ADN, nune’e bele fó sira nia orientasaun bá kompañia atu servisu.

“Ami bele bá halo inspesaun, ami bá haree, loos duni ka lae, halo ona ka lae, sé mak halo supervizaun iha ne’ebá, sira nia ema ka Obras Públiku nia ema ka, ami haree. Depois etapa servisu la’o halo nusa, ami tenke haree tuir,” diretór ADN, Mariano Renato Monteiro da Cruz, hateten bá Hatutan.com iha kna’ar fatin Hudi-laran, Díli, Kuarta (29/06/2022).

Objetivu hosi atividade sira inspesaun ne’e, atu bele garantia projetu nia kualidade, nune’e mós labele difikulta Governu iha prosesu pagamentu mai. Tanba ne’e maka, parte kompañia implementadór tenke halo servisu tuir etapa sira ne’ebé iha ona.

RTTL, E.P ne’ebé mak sai na’in bá projetu ne’e, liuhosi nia tékniku enjeñeira tenke halo supervizaun bá kompañia ninia servisu. Bainhira laiha tékniku rasik, tenke buka koordena ho konsultóriu  ruma apoiu halo supervizaun, depois mak ADN ba halo inspesaun bá sira.

“Papél ADN nian, lei mak haruka hanesan ne’e. Sé laiha, entaun omong kosong. Balu mak hanesan asina tiha kontratu, husik hela iha ne’ebá, kompañia halo mesak ninian, depois mak fulan-ida-rua, mosu bá, kompleta ona ne’e, ó atu haree saida, tanba ne’e maka tenke halo inspesaun,” Diretór ADN afirma.

ADN La Involve Iha Prosesu Tenderizasaun

Diretór ADN, Mariano Renato Monteiro da Cruz, esklarese tan  katak, ADN nia papél mak atu sertifika no monitoriza ka halo inspesaun. Tanba ne’e maka, durante prosesu sira tenderizasaun ka konkursu públiku bá projetu ne’e ADN la involve iha prosesu laran.

Prosesu konkursu públiku  ne’e, Ministériu Finansa (MF), liuhosi Comissão Nacional de Aprovizionamento (CNA), hamutuk ho projetu na’in  ka RTTL, E.P mak halo levantamentu dadus, hafoin haruka bá ADN hodi halo verifikasaun bá dokumentu sira.

Bainhira dokumentu sira ne’e loos hotu ona, ADN bele halo aprovasaun, no depois haruka fila-fali ba na’in bá projetu (RTTL,E.P) hodi haruka bá CNA mak halo aprovizionamentu ka prosesu tenderizasaun.

Prosesu aprovizionamentu ka tenderizasaun ne’e iha tipu ka sistema rua; Ida, sé sistema ne’e ho national compete building, signifika sei lori tempu maizumenus fulan-haat. Maibé, sé tama iha international compete building, normalmente lori tempu fulan-neen (6).

“Ami la tama iha laran. Papél ADN ne’e, verifika no sertifika, halo inspesaun, no la halo projetu ida. Projetu ne’e, na’in bá projetu  mak halo nia projetu, ho Obras Públikas mak halo nia projetu. Mas depois kuandu iha ona, lori mai ami verifika, antes halo prosesu aprovizionamentu, ami halo pre-verifikasaun, depois hotu iha maka, ita haruka fali ba sira, no sira haruka fila-fali ba prosesu aprovizionamentu. Sé ba tiha fundu infra-estrutura, haruka ba CNA, sé ba tán, kapitál dezenvolvimentu, no ba liña ministériu ida-idak, ne’e sira nia prosesu,”  Mariano Renato Monteiro da Cruz esplika.

Iha verifikasaun dokumentu sira kompañia nian hosi ADN ne’e haree liubá kona-bá kustu, espesifikasaun, haree ninia volume, no ho kualidade sira material konstrusaun nian.

“Hanesan uma ida ne’ebá, ne’e atu halo ho saida, halo kaleng ka, halo ho teia ka, halo duut ka, halo saida, ka halo ho tali-metan ka, entaun, bazeia ida ne’e mak ADN deside nia presu. Ida ne’e depende ba owner (na’in) ninia hakarak. Ezemplu, ha’u hakarak halo uma andár ida mais, ho nia kakuluk tali-metan. Ne’e ema nia direitu, no ADN verifika de’it, tuir ema nia hakarak, maibé, tenke garantia nia kualidade, tenke garantia nia presu,” Mariano Renato Monteiro da Cruz hateten.

Hatán kona-bá, karik ADN mós avalia kona-bá kapasidade kompañia BANIR LEMA UNIP, LDA nian, internu kapasidade téknika, diretór ADN ne’e esplika, ADN nia papél, mak atu verifika dokumentu tékniku.

“Material ADN, sistema servisu ADN, espesifikasaun ADN, no kustu hosi ADN,” nia hateten.

Iha implementasaun projetu ne’e, RTTL, E.P mak halo supervizaun, tanba nu’udár na’in bá projetu. Sé laiha, Ministériu Obrás Públikas (MOP), liuhosi nia ekipa tékniku sira mak halo supervizaun, depois ADN bá halo inspesaun no monitorizasaun.

Tuir kontratu ne’ebé estabelese entre MAPKOMS ho BANIR LEMA UNIP, LDA katak projetu ho tipu uma andár tolu ne’e sei termina ka finaliza iha fulan-neen nia laran.

Jornalista: Rogério Pereira Cárceres