Hatutan.com, (28 Juñu 2022), Díli-Ministériu Públiku (MP) liuhusi primeira interrogatóriu alega medida koasaun prizaun preventiva bá arguidu na’in-rua nu’udár sidadaun estranjeiru ne’ebé  deskonfia envolve iha kazu tráfiku umanu.

Lee Mós : PCIC Kaptura Sidadaun Estranjeiru Na’in-rua, Deskonfia Envolve iha Sindikatu Tráfiku Umanu

PCIC kaptura sidadaun esntranjeiru na’in-rua ne’ebé deskunfia envolve iha sindikatu trafiku umanu. Foto/Espesiál

MP ne’ebé reprezenta husi Prokuradór Domingos Gouveia Leite, husu bá Tribunál atu aplika medida koasaun prizaun preventiva bá arguidu ho inisiál ASG ho IGAE, tanba deskonfia pratika krime tráfiku umanu no asosiasaun kriminozu.

Arguidu na’in-rua envolve iha sindikatu haruka traballadór timoroan bá  Abudabi, Uniaun Emiradu Árabe, ne’ebé rezulta inan-feton timoroan na’in-hitu  “abandonada” hela iha sidade Abudabi.

Razaun MP husu medida koasaun ne’e, tanba iha indísiu forte envolvimentu arguidu na’in-rua nian iha kazu refere. Maibé iha alegasaun husi Advogadu privadu Pedro Aparicio husu ba Tribunál atu absolve nia kliente husi krime ne’e tanba konsidera laiha indísiu forte bá envolvimentu arguidu na’in-rua nian iha sindikatu ne’e.

“Husi ha’u nia parte husu absolvisaun bá ha’u nia kliente, tanba laiha indísiu bá krime ne’e,” Pedro Aparicio haktuir bá jornalista sira iha TDD hafoin fó asisténsia bá arguidu sira.

Iha primeiru interrogatóriu ne’e, MP promove arguidu na’in-rua bá pratika krime tráfico de pessoas, asosiasaun kriminoza ne’ebé previstu iha artigu 163, 188 husi kódigu penal Timor-Leste.

Hafoin alegasaun, juis prezide adia hikas desizaun bá Kuarta aban (29/06/202). Audiénsia julgamentu iha primeiru interrogatóriu ne’e, prezide husi juis singular Alvaro M. Freitas, MP reprezenta hosi Prokuradór Domingos Gouveia no Arguidu sira hetan asisténsia legál hosi Advogadu Privadu Pedro Aparíçio.

Jornalista : Carmeita Isaac