Hatutan.com, (28 Juñu 2022), Díli—Comissão Anti-Corrupção (CAC) liu hosi Komisáriu Sérgio Hornai fó- atensaun ba ajénte públiku sira iha Ministériu Obras Públika (MOP) atu utiliza karreta no motór Estadu nian iha kondisaun servisu nian de’it.

Komisáriu Sérgio Hornai hetan konvite hosi Ministério Obras Públika hodi sai oradór prinsipál iha atividade sensibilizasaun matéria rezolusaun Guvernu no 130/2021, kona-bá jestaun uzu patrimóniu Estadu ba kargus Diretór, Xefia no Funsionáriu sira iha MOP nian iha Otél City 8 Manleuana, Díli Tersa-Feira (28/06). Foto/Média CAC.

Komisáriu ne’e fó atensaun tanba, tui nia bainhira la kuidadu hodi jere rekursu Estadu ba interese públiku no monu ba krime sira korrupsaun hanesan administrasaun da noza, abuzu poder, pekulatu no pekulatu uzu sei assume responsabilidade kriminál.

Lee Mós: Funsionáriu Públiku Uza Nafatin Karreta Estadu ba Uma Sei Kondena ho Lei MPCC

“Ita hotu-hotu tenke kumpre, kumpre, kumpre de’it ba lejislasaun, se la kuidadu ho didi’ak falta auzénsia hodi lori prezuizu ba Estadu mak halo medida represivu,” Hatutan.com sita Komisariu Sergio ninia deklarasaun iha komunikadu.

Sérgio Hornai ko’alia ne’e bainhira hetan konvite hosi Ministério Obras Públika iha Tersa-Feira (28/06) hodi sai oradór prinsipál iha atividade sensibilizasaun matéria rezolusaun Guvernu no 130/2021, kona-bá jestaun uzu patrimóniu Estadu ba kargus Diretór, Xefia no Funsionáriu sira iha MOP nian iha Otél City 8 Manleuana, Díli. 

Komisáriu Sérgio Hornai sai oradór iha eventu sensibilizasaun ne’e hamutuk ho Prezidente Komisaun Funsaun Públika (CFP) Inspetór Jerál Estadu (IJE), Komandante Polisia Tránzitu (POLTRANZ) no Diretór Jerál Jestaun Património Estadu (DJJPAE) hodi partilla koñesimentu espesifiku kona-bá oinsá ajénte públiku sira iha Ministériu Obras Públika nian atu jere no utiliza ho loloos kona-bá karreta no motór Estadu nian ba interese públiku, nune’e labele monu ba krime korrupsaun.

Partisipasaun atividade sensibilizasaun ba kargu diretór no xefia ho funsionáriu sira iha MOP kona-bá rezolusaun Guvernu no 130/2021 nian ne’e parte ida mós hosi responsabilidade juridika Komisaun nian iha ámbitu prevensaun hodi partilla hamutuk ho ajénte públiku sira atu sira bele sensibel ho rezolusaun Guvernu nian, nune’e prevene-an uza sala patrimóniu Estadu ba interese privadu hodi ariska-an iha krime sira abuzu poder no pekulatu uzu.

Komisáriu Sérgio Hornai iha nia intervensaun hateten, funsionáriu públiku sira ne’ebé hetan fiar hodi sai jestór ba mákina administrasaun públiku Estadu nian tenke hamriik hanesan guardiaun hodi asegura politika jestaun dezenvolvimentu ida integradu ba serví interese ema hotu-hotu nian no hasees-an hosi hanoin sira ne’ebé ‘pragmátiku’ liu hodi monu ba tentasaun aat krime korrupsaun.

Kargu xefia no funsionáriu sira iha MOP iha responsabilidade boot nu’udár servidór públiku atu sai vanguarda ba dezenvolvimentu nasionál iha misaun boot libertasaun povu Timoroan nian agora.

Misaun estratéjiku ba libertasaun povu ohin loron ne’ebé funsionáriu públiku sira presiza kumpre iha Estadu Direitu Demokrátiku ne’e mak hala’o servisu públiku nian tuir de’it lei, dekretu lei, no rezolusaun ne’ebé órgaun ezekutivu no lejislativu sira produs, atu nune’e la fó beban ba sira nia-an bainhira hala’o servisu Estadu nian.

“Ha’u no ita boot sira tenke hamriik hanesan guardiaun hodi asegura atu korrupsaun ne’e labele mosu,” Komisáriu Sérgio fó-hanoin.

Jornalista: Carmelita Isaac