Hatutan.com, (28 Juñu 2022), Díli—Universitáriu na’in-rua ne’ebé sai manán-na’in hanesan Embaixadór turizmu mak hanesan Elisa Joana Gusmão hosi Universidade Nasionál Timor Lorosa’e (UNTL) no Gerson João Filipe Ximenes hosi Institute of Business (IOB).

Universitáriu na’in-rua ne’ebé sai manán-na’in hanesan Embaixadór turizmu mak hanesan Elisa Joana Gusmão hosi Universidade Nasionál Timor Lorosa’e (UNTL) no Gerson João Filipe Ximenes hosi Institute of Business (IOB). Foto/Média MTKI.

Universitáriu na’in-rua ne’e eleitu hafoin partisipa iha programa kompetisaun diskursu ne’ebé organiza hosi USAID Tourism for All Project, serbisu hamutuk ho Asosiasaun Turizmu Relijiozu Timor-Leste (ATR-TL) no hetan apoiu hosi Servisu Sosiedade Civíl Auditoria Sosiál (SASCAS) Gabinete Primeiru Ministru no parseiru di’ak ho Ministériu Turizmu Komérsiu no Indústria (MTKI).

Lee Mós: Relijiaun no Kultura Lori Valor Turizmu Relijiozu Bá TL

Kompetisaun diskursu ne’e realiza ona iha loron-17 fulan Maiu 2022, konkorrente ne’ebé tuir kompetisaun diskursu hamutuk na’in 10, mai hosi UNTL, UNITAL, UNDIL, IOB no DIT.

Kompetisaun diskursu públiku sai embaixadór Turizmu ba ema hotu 2022-2023 ho nia tema “Uniaun iha diversidade atu promove turizmu relijiozu iha ha’u-nia Timor-Leste”.

Objetivu prinsipál hosi kompetisaun ne’e maka atu hasa’e foinsa’e sira nia konsiénsia kona-bá polítika nasionál turizmu Timor-Leste nian no enkoraza sira atu sai sidadaun ne’ebé ativu hodi ajuda promove turizmu iha Timor-Leste.

Iha selebrasaun anúnsiu rezultadu ne’ebé hala’o iha otél Timor  28 Juñu, Vise-Ministra Turizmu Komunitária, Inácia da Conceição Teixeira  agradese tebes ba ATR-TL no Tourism for All Project ne’ebé realiza programa ida-ne’e hodi promove juventude sira nia talentu kreatividade implementasaun no kapasitasaun iha área turizmu.

“Tenke dezenvolve turizmu Komunitária, Turizmu Rezisténsia no turizmu sira seluk. Espera katak liu hosi kooperasaun USAID, ATR-TL, liña ministeriais no ajénsia internasionál bele serbisu hamutuk ho hanoin ida hodi dezenvolve di’ak liután sitíu turístiku iha rai-Laran,” Hatutan.com sita deklarasaun Vise-Ministra iha komunikadu.

Hahú hosi tinan-2020, MTKI identifika ona sítiu turístika hamutuk 35 ne’ebé ho nia temátiku la hanesan iha ne’ebé komunidade bele jere hanesan Agro-turizmu, hortikultura, relijiozu, turizmu komunitária, turizmu rezisténsia, turizmu kafé Mambae (manbae kofi trail) no turizmu sira seluk, hosi fatin hirak balun implementa ona no iha balun kontinua iha prosesu.

“Bainhira fatin sira ne’e dezenvolvidu ona infraestrutura bázika, ita prepara ita-nia povu oinsá simu bainaka ho di’ak nomós ba treinamentu kapasitasaun gastronomia. Tanba ne’e, programa hirak ne’e governu labele halo mesak, presiza halo parseria ho parseiru dezenvolvimentu sira nomós sosiedade sívil,” nia hateten.

Prezidente ATR-TL Padre Ângelo Salsinha, hateten eventu ida-ne’e importante tebes nune’e ajénsia sira serbisu hamutuk di’ak liután.

“Mai ita la’o hamutuk hodi turizmu ba ema hotu-hotu liu-liu sosiedade sivil, Ministériu Túrizmu no komponente sira seluk, mai ita hamutuk atu hanorin Timoroan ida-idak sai Embaixadór ba nia nasaun rasik. Sé ema hotu-hotu hanesan sira na’in hira ne’ebé maka ko’alia kona-bá timor nia beleza, rikusoin, tasi, beleza naturál, istória, relijiaun, kultura no identidade. sé ita hotu-hotu sai Embaixadór ba buat hirak ne’e timor sei sai oin seluk,” Padre Ângelo, hateten iha komunikadu.

Embaixadór na’in rua ne’e importante hodi servisu hamutuk ho Asossiasaun ATR-TL no USIAD Tourism for All Project, hodi foku ba prioridade no prosperiedade turizmu iha Timor-Leste.

Embaixadór na’in-rua kompromete katak sei servisu hamutuk ho Asosiasaun ATR-TL no USAID Tourism for All Project no governu hodi hala’o promosaun sítiu turístiku sira.

Jornalista: Vito Salvadór