Hatutan.com, (08 Outubru 2021), Díli– Ajénsia Estadus Unidus ba Dezenvolvimentu Internasionál (USAID, sigla Inglés) liuhusi Projetu “Turizmu Ba Ema Hotu”, selebra Loron Turizmu Mundiál 2021 ho Prémiu ba Kampiaun “Turizmu Ba Ema Hotu” iha tinan daruak nian, hodi rekoñese organizasaun no indivíduu sira ne’ebé halo ona kontribuisaun signifikante ba indústria turizmu iha Timor-Leste.

Atribui prémiu ba manan na’in sira. Foto/Espesiál

Projetu ne’e mós kontinua ninia atividade Embaixadór (a) Foin-sa’e ba tinan datoluk nian, ho kompetisaun diskursu públiku ba feto no mane foin-sa’e sira ho tema Loron Mundiál Turizmu iha tinan ida ne’e “Turizmu Ba Kreximentu Inkluzivu” USAID no parseiru sira sei rekoñese manan-nain sira ne’e iha serimónia ida ne’ebé  hala’o iha loron 8 fulan-Outubru iha Rezidénsia Embaixadór Estadus Unidus Amérika nian iha Díli.

“Programa fó apresiasaun ba Kampiaun Turizmu Ba Ema Hotu hanesan manifestasaun apoiu EUA nian ba setór turizmu iha Timor-Leste,” dehan Enkarregadu Negósiu Embaixada EUA, Tom Daley liuhosi komunikadu imprensa ne’ebé Hatutan.com   asesu.

“Ne’e hanesan ksolok ida atu selebra prestasaun feto no mane hirak ne’ebé sira-nia dedikasaun servisu ativu tebes hodi bele ajuda Timor-Leste sai destinasaun vizita ba turista sira. Sira kontinua ativa sira-nia negósiu durante pandemia COVID-19 no hanoin kriativu oinsá atu haboot liután oportunidade turizmu iha Timor-Leste.”

Marka prezensa iha eventu ne’e inklui Diretór Misaun USAID,  Harold Carey, ofisiál Governu, no lideransa sira husi Asosiasaun Turizmu Relijiozu Timor-Leste (ATRTL).

Eventu ne’e organiza ho apoiu husi parseiru kooperativu Heineken Timor-Leste, East Timor Trading, Asosiasaun Na’in ba Hoteis iha Timor Lorosa’e (HOTL-sigla Inglés), no Guidepost Magazine Kampiaun bá “Turizmu Ba Ema Hotu” hala’o iha tempu difisil ne’ebé enfrenta husi negósiu turizmu, relasiona ho COVID-19 ne’ebé sai hanesan impaktu ba viajen internasionál no funsionamentu negósiu lokál no mós estragus inundasaun ne’ebé akontese iha rai-laran iha fulan Abril. Atu refleta dezafiu hirak ne’ebé setór turizmu enfrenta iha fulan hirak nia laran, USAID-nia projetu Turizmu Ba Ema Hotu kria kategoria tolu: Kampiaun Turizmu, Kampiaun Solidariedade, no Kampiaun Klima. Projetu USAID halo selesaun ba Kampiaun Sira liuhusi nomeasaun painél votu online, ne’ebé loke ba Timoroan sira iha rai laran no mós ema sira iha rai-li’ur ne’ebé vizita ona Timor-Leste.

Enkuantu atividade painél interna nian ida husi USAID nia projetu Turizmu Ba Ema Hotu hili manan-nain sira bazeia ba komentáriu ba kestionáriu nomeasaun ne’ebé preparadu liuhusi online Utilizadór Rede Internet nomeia Kampiaun Turizmu sira bazeia ba esforsu hirak ne’ebé sira halo ona atu suporta turizmu sustentável iha Timor-Leste hodi promove no proteje nasaun nia atrasaun no kulturál turístiku sira.

Painél hili kampiaun na’in ualu iha kategoria ida ne’e: – Alito Rosa no Konservasaun Flora no Fauna: grupu voluntáriu ne’ebé halo sensibilizasaun kona-ba protesaun ambientál iha Sentru Ai-Parapa Hera, ne’ebé sai hanesan mós atrasaun turístiku foun ba Timor-Leste.

 Jeremias “Adino” Boavida, Xefe Servente iha Restorante Caz Bar: Adino fornese ona ezemplu di’ak kona-ba atendimentu kliente ba bainaka sira iha ninia karreira servisu durante tinan sanulu-resin. Nia mós hetan apresiasaun kona-ba ninia entuziazmu hodi fornese informasaun turístiku no viajen nian ba vizitante sira.

Robert Crean no Compass Diving Team: Kampiaun ne’e rekoñese Robert Crean ba ninia kompromisu durante tinan 13 iha turizmu marítima iha Timor-Leste, liuhusi servisu hamutuk ho komunidade lokál. Compass Diving ativu tebes iha peskiza biodiversidade no halo sensibilizasaun kona-ba ambientál liuhusi kursu terrenu ne’ebé nia fornese ba estudante Timoroan.

Luis “Melky” Bere-Hunu no Dreamers Dive Academy: Nu’udar Timoroan dahuluk ne’ebé sai instrutór kualifikadu iha luku nian.  Melky bele fahe ona paixaun ho foin-sa’e Timoroan sira ne’ebé hakarak tebes atu esplora paizajen tasi-okos iha sira nia nasaun rasik.

Danny Lee and Ocean View: Danny Lee investe ona iha ristorante no guesthouse iha tinan 2020 no husi ne’e kedas nia hahú haboot ninia negósiu ba iha sentru luku, operasaun observasaun baleia, no eskola “kite surfing”.

Durante tinan hirak nia laran, nia involve iha komunidade sira iha tasi-ibun hodi hala’o atividade ba protesaun ambiente marítima. – Mukoko Rek,  Atauro: Hala’o husi grupu feto lokál, guesthouse no restaurante ne’e investe ninia lukru porsentu 100 ba iha komunidade, servisu hamutuk ho rede negósiu ki’ik sira artezanatu ninian, no hamosu rendimentu hodi suporta família kbiit-laek sira ne’ebé hela iha parte illa nian.

Carlos Soares, Lauhata Resort Liquica: Nu’udar emprendedór turístiku dahuluk ne’ebé investe iha Liquica, Carlos Soares fó ona formasaun no servisu ba foin-sa’e lokál sira atu fornese atendimentu di’ak-liu ba bainaka sira iha ninia guesthouse no restaurante. Nia mós enkoraja bainaka sira atu kuda ai-oan sira iha jardín resort nian.

Francisco Alexandre Pereira, Bollore International: nu’udar ofisiais ba servisu aviasaun, iha Aeroportu Prezidente Nicolau Lobato, Dili. “Alex” Pereira hetan apresiasaun maka’as husi pasajeiru sira kona-ba ninia apoiu no asisténsia ba pasajeiru sira iha situasaun difisil no ba hirak ne’ebé presiza tebes tulun.

Kampiaun Solidariedade ne’e atu rekoñese negosiante turístiku hirak ne’ebé halo ona esforsu hodi ajuda ema sira ne’ebé afetadu husi akontesimentu rua mak hanesan pandemia COVID-19 no inundasaun husi Anin-Fuik Seroja iha loron 04 fulan-Abríl liubá.

Ema nain 40 resin mak mate iha inundasaun no uma-kain rihun-ba-rihun mak refuijia ba sentru evakuasaun hodi ikus mai Governu Timor-Leste hamosu estadu kalamidade. Maske indústria turizmu ladún la’o tanba impaktu husi COVID-19, maibé negósiu turístiku balu mobiliza malu hodi ajuda komunidade sira.

Painél hili ema nain rua: – Pro Ema Training Restaurant: Liuhusi ninia kampaña “Hamutuk Ita Forsa”, Pro Ema konsege halibur valór fundus kontribuisaun $30,000 (rihun tolu-nulu) hodi tulun, prepara no distribui hahán liu 30,000 (rihun tolu-nulu) ba vítima inundasaun iha kampu evakuasaun, ho foos kilograma 20,000 (rihun rua-nulu) no pakote nesesidade báziku 850 (atus ualu lima-nulu), inklui hahán, roupa, sasán dapur no máskara.

Agora Food Studio

Durante krize COVID-19, negósiu ki’ik Timoroan barak mak dependente de’it ba promosaun media sosiál hodi oferese sira-nia atendimentu kona-ba hola hahán no entrega hahán. Ho apoiu husi USAID, Agora Food Studio konsege prodús ona sekuénsia video instrutivu hodi ajuda hadi’a sira-nia abilidade e-marketing no ajuda restaurante sira aplika protokolu saúde nian uainhira loke fila-fali.

Inundasaun ne’ebé akontese fó hanoin mós kona-ba impaktu mudansa klimátika. Painél sira hili ema nain tolu sai Kampiaun Klima kona-ba sira-nia esforsu hodi enkoraja negósiu no indivíduu sira atu hala’o sira-nia parte hodi hamenus impaktu mudansa klimátika.

Painél hili ema nain tolu: – Potenzo Lopes: Konservasionista flora no fauna no fotógrafu ambientál. Potenzo Lopes organiza tour observasaun manu-fuik no hala’o programa edukasaun no fahe informasaun kona-bá flora no fauna no Konservasaun natural ba estudante sira.

Fernando Madeira, DaTerra Agroecological Farm, Baucau: Iha toos no guesthouse ne’ebé harii ho prinsípiu eko-turizmu, vizita grupu eskola sira aprende oinsá atu hamenus impaktu mudansa klimátika hodi halo hamenus impaktu karbonu, uza produtu lokál, kuda ai-oan no konserva bee no enerjia.

Eugenio “Ego” Lemos, PERMATIL: PERMATIL, grupu ida ne’ebé servisu kona-ba toos sustentável hodi halo konservasaun ba bee no rai. Dezde tinan 2008, foin-sa’e liu 5000 (rihun lima) mak partisipa ona akampamentu PermaYouth atu aprende kona-ba problema ambiente no hetan abilidade hodi fahe ba sira ida-idak nia komunidade.

“Manan-nain Kampiaun Turizmu sira sei ajuda hasa’e morál no konfiansa iha indústria turizmu,” dehan Diretór Interinu Misaun USAID Carey.

“Finalista Embaixadór(a) Foin-sa’e Turizmu Ba Ema Hotu mak lider hirak ne’ebé sei troka malu atu fó esperansa ba futuru turizmu iha Timor-Leste.”

Notísia di’ak mak buat ne’ebé ita presiza tebes iha momentu ida ne’e. Ha’u hatene katak ha’u-nia membru ekipa hotu-hotu sei kontente liután, dehan Diretór Pro Ema, Simone Barbosa de Assis. Manan-nain ba Embaixadór(a) Foin-sa’e Turizmu Ba Ema Hotu iha tinan ida ne’e mak Maria Pereira no Ronaldo Ima Dias do Rego, nain-rua ne’e husi estudante UNTL.

Painél sira halo selesaun ba estudante turizmu universitáriu hirak ne’e liuhusi kompetisaun diskursu públiku ne’ebé foin lalais hala’o iha Loron Mundiál Turizmu ho tema “Turizmu Ba Kreximentu Inkluzivu”.

Sira sei aproveita di’ak sira-nia abilidade diskursu públiku nu’udar Embaixadór(a) Turizmu Ba Ema Hotu liuhusi estájiu tinan naruk ida hamutuk ho USAID nia projetu Turizmu Ba Ema Hotu.

Sira sei hala’o sensibilizasaun kona-bá buat sira ne’ebé presiza ba dezenvolvimentu turizmu sustentável, inkluzivu no ko’alia ho foin-sa’e no komunidade sira iha rai laran.

Relasiona ho tema Loron Mundiál Turizmu nian, komisaun organizadora kompetisaun sei entrega ba Kampiaun Turizmu no Embaixadór(a) Foin-sa’e sira ho trophy-vidru ne’ebé prodús husi artista Centru Sover, empreza sosiál ba ema ho defisiénsia, uza ekipamentu ne’ebé oferese husi fundus USAID nia Projetu Turizmu Ba Ema Hotu.  (*/fya)