Hatutan.com, (30 Juñu 2022), Díli-CARE Internasionál hamutuk ho Banku Mundiál (World Bank), Kinta (30/06/2022),  lansa projetu foun ho naran reforsa sistema saúde iha Timor Leste (TL) no Covid-19 ne’ebé hetan apoiu finanseiru husi Japaun Social Development Fund (JSDF) ho montante millaun $2.75.

Lee Mós : CARE International ho Child Fund Monitoriza Ekipamentu Prevensaun COVID-19 ba Eskola no Postu Saúde Sira

CARE Internasionál ho Banku Mundiál lansa Projetu Haforsa Sistema Saúde no Covid-19 iha Timor-Leste. Foto/Hatutan.com

Projetu ne’ebé sei implementa husi CARE ne’e sei bá uluk munisípiu rua; Covalima no Viqueque ho durasaun tempu tinan-tolu (3).

“Ha’u kontente tebes tamba Governu Japaun deside ona hodi fó apoiu finanseiru bá projetu ida-ne’e ho orsamentu aproximadamente millaun $3 liu husi Japan Social Development Fund (Fundu Dezenvolvimentu Social Japaun/JSDF) husi Banku Mundiál no sei implementadu husi CARE Internasionál,”  enkarregadu embaixadór Japaun iha TL, Daishin Sasaki  hateten liu husi nia intervensaun iha lansamentu projetu reforsa sistema saúde iha TL no Covid-19 ne’ebe hala’o iha Salaun João Paulo, Díli.

Kontribuisaun ne’e nu’udár apoiu adisionál bá apoiu aproximadamente millaun 20 no vasina doze rihun 170 ne’ebé maka Governu Japaun oferese ona mai TL relasiona ho Covid-19.

Projetu refere ho planu servisu importante maka hakarak reforsa kapasidade komunidade iha preparasaun hodi responde bá Covid-19 no emerjénsia saúde seluk iha komunidade nia leet liu-liu iha Munisípiu Viqueque no Covalima.

“CARE iha esperiénsia servisu ne’ebé kleur hamutuk ho grupu komunitáriu inklui autoridade lokal sira, tanba ne’e CARE sei kolabora ho parseiru sira hodi implementa projetu refere ho efetivu,” Diretór CARE Internasionál Peter Goodfellow hateten.

Projetu ne’ebé sei implementa dahuluk iha Viqueque ho Covalima ne’e sei fò benefísiu bá ema hamutuk 33.000 ne’ebé kompostu husi predominante iha lokál rural ho foku bá feto no mane ne’ebé vulneravel, labarik feto no labarik mane (Inkluindu ema ho defisiénsia), pesoál kuidadu saúde iha nivel suku no komité ba jestaun dezastre suku nian.

Jornalista : Carmelita Isaac