Hatutan.com, (30 Juñu 2022), Díli-Problema infra-estrutura sai dezafiu boot bá servisu Polísia Nasionál Timor-Leste (PNTL) iha eskuadra sira ne’ebé pertense bá Komandu Munisípiu Dili, liuliu kondisaun uma edifísiu ne’ebé grave no atu monu daudaun.

Lee Mós : PNTL Díli Enfrenta Problema Tolu Durante Kampaña-Eleisaun Prezidensiál

Komandante PNTL Munisípiu Díli, Superintendente Xefe Polísia Henrique da Costa. Foto/Hatutan.com

Komandante PNTL Munisípiu Díli, Superintendente Xefe Henrique da Costa, informa, dezafiu ne’ebé durante sira sira-nia parte enfrenta kona-bá iha infra-estrutura.

Problema infra-estrutura ne’e tanba edifísiu eskuadra PNTL balu oras ne’e, kondisaun grave, hanesan eskuadra Dom Aleixo. Maske ninia progresu lubun ida halo ona, maibé to’o agora seidauk iha konstrusaun. Bainhira akontese udan, eskuadra ne’e sempre iha risku laran, tanba afeta hosi inundasaun.

Advertisement

La’ós ne’e de’it, iha eskuadra Veracruz rasik, to’o oras ne’e seidauk iha edifísiu própriu ruma bá sira atu hala’o servisu, tanba ne’e maka sei okupa provizóriu komandu Munisípiu Dili nia fatin.

Problema ida ne’e, akontese mós bá membru sira iha eskuadra Na’in-Feto, tanba ho kondisaun ka fatin ne’ebé kloot, no presiza konstrui mós moru. Iha eskuadra Cristo Rei, bainhira akontese udan, sala laran sira sempre nakonu ho udan-been, tanba plafond sira ne’ebé foru ne’e udan-been kona to’o ‘dodok’ hotu.

“Ida ne’e sai hanesan ami-nia difikuldade, no ami tau prioridade para atu nune’e ami bele hatama iha ami nia planu 2023, kona-bá orsamentu ninian. Ami presiza harii edifísiu bá iha ne’ebá,” Komandante PNTL Munisípiu Dili, Superintendente Xefe Polisia, Henrique da Costa, hateten ba jornalista sira, iha kna’ar fatin, Kinta (30/06/2022).

Komandante Henrique da Costa informa tán, oras ne’e transporte bá nia membru sira atu halo servisu, seidauk sufisiente. Forsa rezerva sira nu’udár ekipa ne’ebé maka sempre apoiu hosi eskuadra haat iha Dili, hodi responde ba situasaun saida de’it.

Presiza mós transporte espesífiku ida bá membru sira iha unidade tránzitu nian. Dala-ruma to’o tempu halo pasa-revista, sempre hetan evidénsia karreta ho motór barak, maibé, susar atu transporta evidénsia sira ne’e ba iha edifísiu komandu nian.

Advertisement

“Ita nia membru sei lalin, ita nia ema sira ne’e sei sa’e fila-fali motór sira ne’ebé mak ita prende ne’e, balu laiha espellu, balu iha ninia xapa matrikula, bainhira ita lori sasán sira ne’e mai iha ofísiu, ema balu hasai foto, ema posting fila-fali dehan, polísia rasik mós la kumpre. Entaun, ita presiza atu hetan karreta ida, trailer ka hanesan track ida, para atu  nune’e bainhira iha pasa-revista ne’e remata, sasán sira ne’e ita bele tula bá iha karreta laran,” komandante Henrique preokupa.

Maske nune’e, komandante Henrique dehan, preokupasaun sira ne’e aprezenta hotu ona ba Komandu jerál no Vise-Ministru Interior, António Armindo, nune’e bele buka solusaun.

“Exelénsia rasik mós hatene, ema hot-hotu haree, kondisaun real ne’ebé mak ita iha. Ita ezije ita nia membru sira halo servisu, maibé ita presiza fó kondisaun,” hateten Henrique da Costa.

Jornalista: Rogério Pereira Cárceres

Advertisement