Hatutan.com, (29 Juñu 2022), Díli- Prezidente Repúblika (PR), José Manuel Ramos-Horta, hateten servisu Autoridade Protesaun Sivíl (APS) presija iha sakrifisiu no matenek atu servi ema seluk no fó protesaun bá sidadaun sira.

Prezidente Repúblika (PR), José Manuel Ramos-Horta, partisipa iha tomada posse bá Primeiru Prezidente Autoridade Protesaun Sivíl (APS). Foto/Hatutan.com

Autoridade Protesaun Sivíl nu’udár Diresaun Jerál Protesaun Sivil ne’ebe hahú ona iha tinan 2000 ho implementasaun Brigada Bombeiru tolu iha Díli, Baucau no Aileu.

José Ramos-Horta iha nia diskursu bá serimónia inaugurasaun Autoridade Protesaun Sivíl no tomada posse bá Prezidente APS iha servisu sentral Bombeiru, Caicoli, Kuarta (29/06/2022),  hateten Autoridade Protesaun Sivíl hetan responsabilidade todan hodi halo koordenasaun bá ajente hotu-hotu protesaun sivíl nian iha asidente grave ruma, dezastre naturál ho objetivu atu fó protesaun bá vida umana.

Horta afirma área fundamental protesaun sivíl nian, haree bá alterasaun klimátika, ne’ebé hamosu inundasaun boot sira ne’ebé akontese iha pais no  ho serimónia tomada posse ba Prezidente APS ne’e, nu’udár pasu dahuluk iha elaborasaun modelu foun ne’ebe Timor-Leste hakarak sai nu’udár modelu ida ne’ebé adekuadu liu bá pais.

“Ha’u hanesan testemuña direita bá servisu ne’ebé diresaun jerál protesaun sivíl halo iha dezastre ne’ebé foin lalais akontese, ha’u haree ho ha’u nia matan sira nia servisu iha insidiu sira Outubru 2019 iha munisípiu sira Oeste nian, no inundasaun 13 Marsu 2020 no ida boot liu dezastre boot kalamidade 4 Abríl 2021,” José Ramos-Horta hateten.

Xefe Estadu husu atu APS halo servisu maka’as ajuda vitima sira, estadu nia agradesimentu boot, no hein katak protesaun sivíl sei dezenvolve di’ak liután, hakat lalais liubá oin bainhira haree hikas bá kotuk.

Transformasaun protesaun sivíl hetan dezafiu boot pandémia Covid-19, problema boot dezafiu ne’ebé ema hotu-hotu haree no sente. Nune’e, Ramos-Horta elogia Superintendente Ismael Babo hatudu nia lideransa bainhira krize sira ne’e akontese, bainhira nia kaer protesaun sivíl nia hatudu servisu ne’ebé diak no ho domin.

Xefe Estadu husu bá Governu ho parseiru sira hotu-hotu atu halo esforsu ruma tan to’o tempu badak iha Díli bele iha ona edifísiu autoridade protesaun sivíl no ne’e nu’udár obrigasaun ida tan ne’e iha mandatu dahuluk  APS halo servisu ida di’ak hodi responde bá situasaun emerjénsia sira.

Prezidente APS, Superintendente Polísia Ismael Babo. Foto/Hatutan.com

Iha parte seluk Prezidente APS, Superintendente Polísia Ismael Babo, hato’o obrigadu bá VIII Governu Konstitusionál lideradu husi Primeiru-Ministru Taur Matan Ruak ne’ebé depozita konfiansa bá nia hanesan primeiru Prezidente Autoridade Protesaun Sivíl.

Nia afirma, protesaun sivíl nu’udár pilar ida husi pilar rua seluk hanesan PNTL ho F-FDTL atu implementa sistema seguransa nasionál. Kompromisu bá oin tau importánsia bá kondisaun nesesidade APS nian.

APS bele operasionaliza funsionamentu númeru úniku nasionál bá emerjénsia no husu ba entidade relevante hotu no instituisaun Estadu tomak atu servisu hamutuk hodi rezolve no fiskaliza fatin sira ne’ebé risku boot bá dezastre liu-liu ba sidadaun sira ne’ebé hela iha fatin sira ne’ebé  konsidera risku boot bá dezastre.

Superintendente polísia ne’e hatutan iha prioridade lubuk ida mak nia tau iha importansia bá mandatu dahuluk nu’udár Prezidente APS tuir mandatu polítika Sekretáriu Estadu Protesaun Sivíl nian no programa VIII Governu Konstitusionál nian ida mak atu kontinua nafatin elabora parte lejislasaun lei balun ne’ebé presija atu implementa.

“Kestaun ida boot liu bá ita sei haree ba rekursu umanus agora daudauk ita-nia funsionáriu iha protesaun sivíl iha 2000-resin no parte autoridade tenta atu halo formasaun báziku hodi sira nia espiritu servisu iha diresaun ida bá diresaun seluk no sei servisu hamutuk hodi kompleta malu iha situasaun asidente grave no katástrofe,” Nia subliña.

APS mós iha planu atu iha formasaun espesializada sei halo liu-liu formasaun avansadu bá kareira profisionál liu-liu bá lideransa sira atu futuru sira iha teknikamente hodi halo servisu no atuasaun ne’ebé mais rigor atu prevene no proteze sidadaun sira husi dezastre ne’ebé akontese.

APS sei dezenvolve nafatin kooperasaun ho pais viziñu sira iha resgata salvamentu no kooperasaun liña ministeriais tamba agora dadaun sekretariu estadu protesaun agora daudauk servisu hamutuk ho autoridade maritima ita sei servisu hamutuk atu haree oinsá dezastre ruma iha maritima hodi responde hamutuk no koordena hamutuk ho pais viziñu sira no iha asidente ruma bá parte aéreu nian unidade espesiál ne’e prontu atu responde.

Jornalista: Vito Salvador