Connect with us
Pakote Ahi

Nasionál

Ai-leba Sira Hatán Bá Deputadu Fabião de Oliveira Husi Bankada FRETILIN

Published

on

Hatutan.com, (01 Jullu 2022), Díli- Movimentu Ai-leba Oan (MAO) husu reprezentante povu iha uma-fukun Parlamentu Nasionál, liuliu Deputadu Fabião de Oliveira husi Bankada FRETILIN, atu fuan boot bá povu ai-leba nia moris no halo deklarasaun ne’ebé pro povu la’ós afavór bá interese partidária no grupu ida nian.

Lee Mós : Povu Mak Na’in Loloos ba Palásiu Prezidensiál

MAO halo konférensia imprensa hodi hatán bá membru PN husi Bankada FRETILIN, Fabião de Oliveira. Foto/Hatutan.com

MAO halo deklarasaun ne’e hafoin membru PN husi Bankada FRETILIN, Fabião de Oliveira, ne’ebé la konkorda ho polítika Prezidente Repúblika (PR), José Ramos-Horta, hodi loke odamatan Palásiu Prezidensiál bá povu kbiit laek, ai-leba no labarik sira, inklui  timoroan hotu atu hetan oportunidade hanesan hodi sente anin fresku no mahon Palásiu Prezidensiál nian.

Razaun fundamental ne’ebé reprezentante povu husi Bankada FRETILIN ne’e aprezenta maka uainhira ai-leba sira lori sira-nia produtu bá PR sosa iha Palásiu Prezidensiál sei halo fo’er no hatún imajen Timor-Leste nian iha mundu.

Advertisement

Portavós Movimentu Ai-leba Oan, Lito da Costa Andrade bá jornalista sira iha Jardim 5 de Maio, Colmera, Sesta (01/07/2022), hateten, lori ai-leba hotu nia naran hakarak hato’o lamentasaun bá iha membru  Parlamentu Nasionál, liuliu bá bankada FRETILIN ne’ebé iha plenária halo deklarasaun polítika hodi lamenta katak ai-leba sira bá iha Palásiu Prezidente halo fo’er no hatún dignidade nasaun nian. 

Ai-leba hotu hakarak hateten hela bá deputadu katak nia iha fuan nu’udár timoroan ka lae, se fuan ne’e timoroan nian hanoin took tanbasá ai-leba ne’e eziste no tamba saida mak ai-leba nafatin bá nafatin husi bei’ala sira mai too iha jerasaun ohin loron.

“Ami hadi’a ami nia moris husi ai-leba signifika ami tulun mós estadu liu husi ami nia esforsu rasik bá moris di’ak família nian, hadi’a ekonomia família, liu husi ai-leba, selu oan ba eskola no hakbiit mós família nia forsa atu asesu bá saúde ida di’ak liu,” Lito da Costa Andrade hateten.

Movimentu ne’e lamenta ho deklarasaun ne’ebé hateten sira mak halo fo’er sidade Díli no kontinua halo engarrafamentu bá movimentasaun transporte públiku tamba ai-leba taka dalan.  Nune’e, ai-leba sira husu karik Governu no Parlamentu Nasionál iha inisiativa atu halo modernizasaun bá vida negosiante ambulante sai fali vida seluk ida, bele maibé tenke mai ho estudu viabilidade ruma para bele sukat rendimentu bá negosiante ambulante no ai-leba ne’e oinsá, atu nune’e, ba oin ai-leba sira bele moris ho dignu.

Ai-leba sira prontu husik ai-leba uainhira Governu kria kampu traballu ruma atu sira bá servisu.

Advertisement

“Palásiu Prezidensiál la’ós ami nian? Se la’ós ami timor nian ka ami sira ai-leba ne’e la’ós timoroan? Se ami la’ós timoroan, ami husu deputadu sira bele orienta forsa sira tiru-mate hotu de’it ami,” Lito da Costa Andrade afirma.

Nia hatutan, ai-leba halo sakrifisiu la tane liman bá Governu no la tane liman bá Deputadu sira iha Parlamentu Nasionál. Maske, Deputadu sira sempre orgullu ho slogan ida dehan reprezentante povu.

Ai-leba, tuir nia, nunka halo krime boot iha rai ida ne’e no nunka halo korrupsaun bá osan Estadu nian. Nune’e, husu bá Deputadu sira atu bele halo reflesaun katak ukun an ida ne’e ai-leba sira mós kontribui no ai-leba barak mós mak halo servisu iha rede klandestina hodi subar no sai estafeta bá forsa armada FALINTIL durante okupasaun Indonézia nian iha Timor-Leste.

“Palásiu Prezidensiál la’ós deputadu ida nia kintál tamba ne’e ami ai-leba sei la moe no ta’uk atu lori ami nia produtu bá PR sosa tamba ne’e hanesan atu fó valor no signifika mós ami nia kontribuisaun ne’ebé ami halo bá Estadu liu husi fa’an ai-fuan iha dalan ninin.”

Lee Mós : Primeira iha Istória, Ramos-Horta Halibur Labarik Besik 300 iha Palásiu Prezidensiál

Advertisement

Jornalista: Vito Salvador

 

Kontinua Le'e
Advertisement
1 Komentariu

1 Comment

  1. Marcelino Pereira

    01/07/2022 at 7:45 PM

    deputadu hanoin dt ba kabun nungka hanoin povu nia moris ne oinsa mak bele koalia pro povu?

Husik Hela Komentariu

Your email address will not be published. Required fields are marked *

Nasionál

Uniaun Europeia, ILO ho TradeInvest Asina Akordu bá Espansaun Oportunidade Negósiu Nu’u iha TL

Published

on

Hatutan.com, (23 Maiu 2024), Díli—Organizasaun Internasionál bá Traballu (ILO) no TradeInvest Timor-Leste asina akordu kooperasaun téknika, kona-bá oportunidade hodi dezenvolve negósiu nu’u iha Timor-Leste hamutuk ho seitór privadu sira.

(more…)

Kontinua Le'e

Nasionál

Kapasidade Internet Husi Tore Provider Telekomunikasaun Sira iha TL La Sufisiente

Published

on

Hatutan.com, (22 Maiu 2024), Díli-Internet sai ona hanesan nesesidade importante bá ema nia moris loron-loron nian iha mundu iha era dijitalizasaun ne’e. Maske nune’e,  Timoroan sira ne’ebé hela iha Timor-Leste sempre halerik no kestiona kapasidade internet ne’ebé fornese husi tore provider telekomunikasaun hanesan Timor Telecom, Telkomcel ho Telemor.

(more…)

Kontinua Le'e

Nasionál

Horta ho Xanana Tuun Direta Simu Liurai Brunei Darussalam Majestade H. Hassanal Bolkiah

Published

on

Hatutan.com, (20 Maiu 2024), Díli- Prezidente Repúblika (PR), José Ramos-Horta ho Primeiru-Ministru Kay Rala Xanana Gusmão hamutuk ho membru governu sira simu ho ksolok prezensa Sua Majestade Haji Hassanal Bolkiah, Sultaun Brunei Darussalam ne’ebé too  iha Repúblika Demokrátika Timor-Leste hodi partisipa iha selebrasaun loron Restaurasaun independénsia ba dala-XXII (20 Maiu 2002-20 Maiu 2024).

(more…)

Kontinua Le'e
Advertisement

Trending