Hatutan.com, (01 Jullu 2022), Díli—Xefe Estadu, José Ramos-Horta promete sei akompaña kazu legál sira ne’ebé jornalista sira enfrenta durante hala’o misaun jornalístika iha terrenu.

“Prezidente Repúblika hateten nia sei akompaña liu-liu ba kazu Raimundos Oki ninian tanba ne’e kona-bá kazu ida ne’ebé delikadu kona-bá segredu justisa, depois mós kona-bá abuzu seksual,” Prezidente Conselho Imprensa (CI) Timor-Leste, Virgílio da Silva Guterres hateten hafoin hasoru-malu ho José Ramos-Horta iha Palásiu Prezidensiál Nicolau Lobato, Bairru-Pité, Sesta (01/07/2022).

Lee Mós:MAPKOMS Halo Keixa “Denúncia caluniosa” Hasoru Xefe Redasaun Hatutan.com

Dirijente másimu CI ne’e fó sai deklarasaun Prezidente Repúblika nian ne’e tanba durante enkontru parte CI hato’o mós preokupasaun ba Xefe Estadu atu tranzmite no halo komunikasaun ho entidade relevante kona-bá kolega jornalista na’in-rua ne’ebé oras-ne’e daudaun enfrenta kazu legal.

Jornalista na’in-rua ne’e mak hanesan, jornalista Francisco Belo Simões hosi Hatutan.com no Raimundos Oki husi The Oekusi Post.

“Entaun, CI hato’o nia preokupasaun no husu Xefe Estadu atu akompaña mós  no halo intervensaun probisidade ba entidade relevante sira,” nia hateten.

Emjerál, hanesan jornalista hotu-hotu hakruk de’it ba lei sira maibé buat importante mak implementasaun lei ne’e labele mai atu sai fali hanesan intimidasaun ka limitasaun garantia konstituisionál sira ne’ebé garante liberdade ba jornalista sira.

Prezidente CI ne’e hatutan agora buat ne’ebé CI partilla mós mak CI buka atu hatene substánsia hosi infrasaun ba segredu justisa ne’e hosi parte ida ne’ebé, nune’e CI bele haree mós prosesu ne’e.

“Xefe Estadu hateten sei akompaña situasaun ne’e atu nune’e kualkér prosesu ne’e labele sai hanesan intimidasaun no ameasa ba jornalista sira atu hala’o sira nia atividade jornalistiku sira nian,” nia dehan.

Alem de transmite situasaun no informasaun kona-bá jornalista sira nian, CI liu hosi sorumutu ne’e konvida mós Prezidente Repúblika atu partisipa iha eventu rua ne’ebé CI sei halo iha tinan ida ne’e, primeiru mak eventu Dili Diálogu Forum (DDF) ne’ebé sei akontese iha 25-26 Agostu, tanba tinan rua liu ba labele halo kauza hosi pandemia Covid-19 no tinan agora sei CI planeia atu hahú fila fulan Agostu.

Tema jerál ba DDF tinan ida ne’e maka, dezafiu média iha Ázia Pasifiku no diskursu temátiku sira, tuir mai sei ko’alia kona-bá média iha erra dijitalizasaun, korrupsaun, seguransa dijitál no Forum ne’e hanesan espasu atu fahe esperiénsia.

Entaun, CI sei konvida mós kolega sira hosi CI Indonézia, Tailándia, Miamar, inklui mós péritu média nian sira iha rejiaun Pasífiku nian atu fahe oinsá mak sira enfrenta situasaun no dezafiu saida mak média enfrenta iha tempu ohin loron.

“Ami konvida Xefe Estadu atu hato’o nia diskursu abertura, no eventu segundu ne’ebé ami konvida Xefe Estadu maka ba komemorasaun Balibó Five iha Balibo 16 Outubru,” nia haktuir.

CI informa mós ba Xefe Estadu katak, tinan ne’e espesiál tanba 16 Outubru hanesan lansamentu ba loron nasionál liberdade imprensa tanba Parlamentu Nasionál aprova tiha ona rezolusaun katak loron 16 fulan Outubru ne’e hanesan loron nasionál liberdade imprensa nian.

Prezidente Repúblika hateten ba fulan ka loron ne’ebé CI marka ne’e Xefe Estadu laiha previzaun katak sei vizita ba iha rai seluk, ne’e hatudu katak Xefe Estadu sei iha rai laran no Xefe Estadu hateten agora daudaun sei la fó prióridade atu ba rai li’ur no Xefe Estadu asegura ba CI katak sei ba no karik iha oráriu ruma ne’ebé iha mundansa sei komunika ho CI.

Lee Mós: Jornalista Raimundos Oki Sai Arguidu Bá Kazu Violasaun Segredu Justisa

Jornalista: Vito Salvadór