Hatutan.com, (01 Jullu 2022), Díli-Membru FALINTIL-Forsa Defeza Timor-Leste (F-FDTL) na’in-15 konklui ona sira-nia formasaun kona-bá fó protesaun seguransa bá alta entidade sira ka ema sira ne’ebé ho pozisaun boot no kualidade hanesan Prezidente Repúblika no Primeiru-Ministru hosi rai seluk bainhira halo vizita mai Timor-Leste.

Membru F-FDTL sira ne’ebé tuir formasaun seguransa bá alta entidade simu sertifikadu. Foto/Hatutan.com

Membru sira ne’e, partisipa másimu iha formasaun durante tempu semana rua, hahú hosi loron 20 fulan-Juñu to’o loron  01 fulan-Jullu ne’e no konklui ona sira nia formasaun iha Kuartél Unidade Polísia Militár (PM) iha Kintál-Boot, Díli.

Durante formasaun ne’e, membru sira hetan matéria lubun ida mak hanesan, (1) organizasaun bá servisu seguransa nian no oinsá protesaun ba autoridade sira, (2) módulu báziku, (3) kápsula bá seguransa nian, (4) eskolla ba itineráriu, (5) atentadu, (6) verdura, (7) ekipamentu avansada, (8) ekipa fiksa, (9) diresaun evaziva, no (10) módulu kona-bá tiru nian.

Komandante interinu bá Unidade Polísia Militár (PM), Capitão, Francisco Xavier dos Reis Neto, esplika, papél ka misaun polísia militár nian, la’ós de’it sai defeza bá soberania nasionál. Maibé, misaun ida seluk  maka foka kona-bá seguransa bá autoridade sira.

Advertisement

“Tanba ne’e maka, iha segundu estájiu ida ne’e, ninia objetivu ne’e mak atu espesializa bá membru sira para hala’o misaun karik, bele la’o tuir doutrina ne’ebé mak sira aprende,” Capitão, Francisco Xavier dos Reis Neto, hateten durante serimónia entrega sertifikadu bá membru sira.

Francisco Xavier dos Reis Neto, dehan, objetivu ida tán hosi formasaun ne’e maka bele sai hanesan padraun seguransa ida bá membru sira hotu iha instituisaun F-FDTL. Maske formandu na’in-15 ne’e la’ós membru hosi PM nian, maibé parte komandu buka  esforsu buka hodi fasilita formasaun seguransa bá membru sira hotu iha nivel ne’ebé mak hanesan.

Foto hamutuk. Foto/Hatutan.com

Reprezentante Xefe Estadu Maiór Jenerál F-FDTL, Xefe Gabinete no Koordenadór Konjuntu Estadu Maiór, Capitão e Fragata, João da Silva, agradese bá Polisia Militár tanba bele dezeña ona planu hodi prepara kursu ida ne’e bá membru F-FDTL sira.

Kursu ne’ebé espesifika kona-bá seguransa bá iha ema sira ho alta entidade, konsidera hanesan treinu ida profisionál, bá preparasaun bázika ba militár sira, soldadu sira, no ho sarjentu sira, atu bele koñese báziku oinsá mak bele la’o hamutuk ho superior no autoridade sira.

João da Silva, apresia ho inisiativa sira mak mai hosi unidade PM nian, tanba formasaun kona-bá seguransa bá alta entidade ne’e, hala’o ona bá faze daruak, ka segunda estájiu.

Maske formasaun ne’e ho de’it tempu ne’ebé badak,  tuir nia, iha benefísiu boot. Tanba ne’e, husu membru sira atu utiliza ida ne’e nu’udár bukae, hodi prátika iha servisu fatin.

Advertisement

Membru F-FDTL sira ne’ebé tuir formasaun ne’e, maioria mane, mai hosi Komponente Navál, Centro Formação e Treino (CFT), Nicolau Lobato, Metinaro, unidade Frente Armada ba Libertasaun Nasionál Timor-Leste (FALINTIL), no treina hosi instrutór sira forsa Brazileiru nian iha TL.

Jornalista: Rogério Pereira Cárceres

Advertisement