Connect with us
Pakote Ahi

Defeza & Seguransa

Ekipa Konjunta Halo Apreensaun ba Patrimóniu Estadu 10 Iha Díli

Published

on

Hatutan.com, (02 Jullu 2022), DíliEkipa operasaun konjunta, kompostu hosi Diresaun Jerál Patrimóniu Estadu (DJPE), Comissão Anti Corrupção (CAC), Comissão das Função Pública (CFP), Diresaun Nasionál ba Transportes Terrestres (DNTT), ho Polisia Nasionál Timor-Leste (PNTL), Unidade Tránzitu, liuhosi pasa-revísta ka auto-stop, konsege prende patrimóniu Estadu 10, iha kapitál Dili, tanba funsionáriu sira utiliza iha tempu “fim de semana” ne’ebé mak la tuir nesesidade Estadu nian, Sábadu (02/07/2022).

Karreta Estadu Ne’ebé Ekipa Konjunta Halo Apreensaun iha fim de semana 02 Jullu 2022 iha Dili tanba funsionáriu públiku sira utiliza la tuir nesesidade.

Ministériu Finansas (MF), liuhosi Diretór jerál iha Diresaun Jerál Patrimóniu Estadu (DJPE), Januário da Gama esplika, fiskalizasaun konjunta ba movimentu sira veíkulu Estadu nian ne’e, realiza tuir rezolusaun governu númeru 130/2021.

Lee Mós: Funsionáriu Públiku Uza Nafatin Karreta Estadu ba Uma Sei Kondena ho Lei MPCC

Konteúdu hosi rezolusaun governu númeru 130/2021 ne’e ho objetivu atu bele mellora, efisiénsia no efetividade ba iha despeza sira no efisiénsia no efetividade iha utilizasaun.

Advertisement

Bainhira segura ona efisiénsia ba iha despeza sira ne’e bele halo rasionalizasaun, no re-alokasaun despeza sira ne’e ba fali prioridade sira ne’ebé governu sente tenke hatuur iha tinan finanseiru tuir mai.

“Veíkulus ne’ebé ohin tama ba iha alvu operasaun iha Mandarin, konsege identfika karreta hamutuk  unidade lima, motorizada ida. Iha Elemloi, konsege hetan motorizada hamutuk lima, ne’ebé mak tama ba iha grupu ida infrasaun, no iha Kuluhun konsege identifika no prende ninia evidénsia ne’e, ba kareta unidade ida,” Januário da Gama hateten ba jornalista sira, hafoin operasaun konjunta iha edifísiu DNTT, Balíde, Dili, Sábadu (02/07/2022).

Diretór jerál Patrimóniu Estadu ne’e dehan hahú kedan rezolusaun governu númeru 130/2021 ne’e hasai, prosedimentu tékniku hatuur ona, despaixu no sirkulár ministériu finansas hasai tiha ona katak, veíkulu Estadu hotu-hotu, konsidera ona hanesan veíkulu operasionál, ne’ebé obrigatoriamente tenke halo estasionamentu iha garájen no kampaun ministériu no instituisaun ida-idak ninian, hosi loron segunda to’o sesta, inklui iha tempu fim de semana (sábadu no domingu).

Karreta Estadu Ne’ebé Ekipa Konjunta Halo Apreensaun iha fim de semana 02 Jullu 2022 iha Dili tanba funsionáriu públiku sira utiliza la tuir nesesidade.

Nune’e, bazeia ba rezolusaun governu ne’ebé iha, nomós ho sirkulár hosi MF rasik hasain, bandu ona funsionáriu sira no laiha direitu atu lori veíkulu sira ne’e ba sira nia uma, bainhira laiha justifikasaun ruma atu halo servisu iha fim de semana ho natureza ida fins profisionais ninian.

“Tanba ne’e mak ohin, fiskalizasaun ida ne’ebé mak halo ne’e mai ho intensaun ida atu ita bele haree, seráke sei iha difisiénsia ruma iha implementasaun. Sé iha irregularidade ruma iha nia implementasaun, atu bele komprova katak, rezolusaun ne’ebé governu hatuur ne’e iha duni kumprimentu hosi ministériu no instituisaun sira hotu ka la’e. Liu-liu ba utilizadór sira ne’ebé durante ne’e utiliza veíkulu do Estadu,” nia hateten.

Maibé, ho reativasaun ba atvidade fiskalizasaun konjunta ne’e iha terrenu konsege identifika movimentu balun ne’ebé bele agrupa iha infrasaun ida ne’ebé tenke kanaliza ba iha PNTL, nia prosedimentu, nune’e mós ba iha CAC ho CFP, tanba iha infrasaun balun mak konsidera hanesan, natureza administrativu.

Advertisement

“Maibé ohin ne’e hanesan aprezentasaun ba ninia sumáriu de’it, nia relatóriu detallu ho ninia evidénsia ho informasaun sira ne’e hotu, ekipa fiskalizasaun konjuntu sei prepara no sei relata fila-fali ba entidade sira hotu, atu prosesu sira ne’ebé maka atu halo tuir ne’e imediatamente entidade sira ne’e sei hola asaun,” Januário Gama esplika.

Fiskalizasaun konjunta ba movimentu sira veíkulu Estadu nian ne’e, hala’o iha forma rua mak hanesan, forma auto-stop, ne’ebé maka konsentra iha fatin potensial tolu, Mandarin, Kuluhun, no Elemloi.

Karreta Estadu Ne’ebé Ekipa Konjunta Halo Apreensaun iha fim de semana 02 Jullu 2022 iha Dili tanba funsionáriu públiku sira utiliza la tuir nesesidade.

Iha forma ida seluk maka halo swipping, ka halo monitorizasaun direta iha forma fatin potensial sira ne’ebé durante ne’e ekipa fiskalizasaun konjunta iha ona informasaun balu, atu bele fundamenta ninia evidénsia no informasaun balun.

“Iha swipping, ohin, ami mós identifika karreta ida ne’ebé nota katak, kareta ne’e utilizadór balun durante ne’e uza, para de’it iha ninia uma oin. Ohin evidénsia foti tiha ona, entaun ida ne’e mós sai hanesan informasaun ida ba iha ekipa konjunta ida para depois bele relata, oinsá bele kanaliza ninia prosesu ne’e ba oin,” dehan Januário Gama.

Bazeia ba servisu sira ne’e hotu, iha ninia konsekuensia tolu. Primeiru, sei aplika pena infrasaun ne’ebé mak sei kanaliza liuhosi PNTL. Sira hasai tiha ona nota infrasaun ida, obrigatóriamente infratór sira tenke halo pagamentu ba koima ka penalidade ne’ebé mak aplika hosi pena infrasaun ida ne’e.

Segundu, aplika prosesu administrativu ne’ebé mak sei kanaliza liuhosi CFP. Ba utilizadór sira ne’ebé ho sira nia neglijénsia, halo irregularidade ba prosedimentu sira ba abuzu de poder.

Advertisement

Terseiru, sei kanaliza fali ba CAC, depende ba grau infrasaun, karik nia bele agrupa iha krime pekulatu, ka bele ho abuzu de poder ho grau ne’ebé boot, konserteza sei kanaliza ba CAC hodi halo nia prosesu tuir prosedimentu ne’ebé aplika iha entidade sira.

“Entaun, saida mak ami hakarak atu hatete iha ne’e katak, servisu sira ne’e, ekipa fiskalizasaun konjunta regularmente, periodikamente sei kontinua halo. Alende halo cheek point, swipping, iha mós servisu sekreta balu ne’ebé entidade sira sei kontinua halo, halo buska, depois bele nesesita mós halo apreensaun, karik infratór sira kontinua la obedese nafatin tuir ita nia prosedimentu no regulamentu sira ne’ebé mak iha,” Januário Gama afirma tán.

Karreta Estadu Ne’ebé Ekipa Konjunta Halo Apreensaun iha fim de semana 02 Jullu 2022 iha Dili tanba funsionáriu públiku sira utiliza la tuir nesesidade.

Bainhira veíkulu sira Estadu nian ne’e mak kontinua utiliza iha tempu fim de semana, sábadu ho domingu, loron boot, signifika sei kontribui ba iha efisiénsia sira despeza nian.

Haktuir ba dekretu lei númeru 21/2021, determina ona subsídiu mensál transporte ba funsionáriu públiku hotu.

Signifika, sira tantu hosi nivel kargu xefia ida boot liu iha nivel diretór jerál, to’o iha xefe departamentu no seksaun no funsionáriu baibain, laiha ona autorizasaun atu utiliza veíkulu Estadu, ba iha asuntu sira la’ós tama ba iha karáter ida servisu profiosionais ninian.

“Purtantu, iha oras servisu kontinua uza, iha loron feriadu, fim de semana bele uza, maibé tenke ho forma autorizasaun hodi halo de’it ba interese Estadu ninian. Movimentu ida ho natureza partikulár, individual, rezolusaun governu no sirkulár, prosedimentu ne’ebé hatuur, la permite ona atu kontinua utiliza,” diretór ba patrimóniu Estadu ne’e fó hanoin.

Advertisement

Iha fatin hanesan, Pontu Fokál CAC nian, Euclies Madeira dehan, evidénsia hirak ne’ebé rekolla, ekipa fiskalizasaun konjunta sei produz relatóriu ida no hosi relatóriu ne’e maka sei fó kompeténsia ba entidade sira ida-idak atu hala’o ninia servisu.

Hosi relatóriu ida ne’e bainhira CAC haree katak, prienxe duni elementu sira krime nian ne’ebé mak hatuur iha Lei Medidas Prevenção e Combate Corrupção (MPCC), númeru 07/2020, kona-bá pekulatu de uzu, CAC sei haruka relatóriu ba Ministériu Públiku no delega fila-fali kompeténsia CAC, hodi loke investigasaun tuir lei kriminál.

“Sé oras ida ita haree katak, nia prienxe duni elementus krime kona-bá pekulatu de uzu, automatikamente, ita halo prosesu kriminál, tantu motorizada ka karreta ne’ebé mak iha. Laiha esepsaun ba ida ne’e. Ita prepara ninia relatóriu, ita haruka ba iha MP. Depois MP hatuun fali delegasaun kompeténsia mai, ita loke prosesu investigasaun normál hanesan kazu sira seluk,” Eculides Vieira esplika.

Karreta Estadu Ne’ebé Ekipa Konjunta Halo Apreensaun iha fim de semana 02 Jullu 2022 iha Dili tanba funsionáriu públiku sira utiliza la tuir nesesidade.

Komandante Polisia Tránzitu Munisipiu Dili, Inspetór Polisia, Domingos Sarmento Gama dehan, Polisia Tránzitu no seguransa rodoviáriu ne’ebé halo parte mós iha ekipa fiskalizasaun konjunta ne’e, sira nia funsaun maka apoiu ekipa ne’e, hodi hala’o atividade sira ne’e ho di’ak.

Maibé, ba infratór sira ne’ebé mak vióla lei kódigu estrada númeru 06/2003, tránzitu munisipiu Dili, iha kompeténsia tomak atu aplika sansaun administrativa.

“Ne’ebé, ohin ita pasa ona nota infrasaun ba ita nia funsionáriu sira, no segunda-feira (04/07/2022), ita nia funsionáriu sira obrigatóriamente tenke kumpri, tanba ida ne’e dever ida. Sé liu semana ida mak ita identifika funsionáriu sira la kumpri, halo xamada ba sira, obrigatóriamente kumpri. Ne’e sansaun administrativa,” Komandante Domingos Gama subliña.

Advertisement

Jornalista: Rogério Pereira Cárceres

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

Forsa Konjunta Preende Tabaku Pohon Sagu Kaixa 320 iha Tasi-Tolu

Published

on

Hatutan.com, (19 Abríl 2024), Díli—Forsa konjunta kompostu hosi Polisia Nasionál Timor-Leste (PNTL) liuhosi Departamentu Investigasaun Kriminál (DIK), Servisu Informasaun Polisia (SIP), FALINTIL Forsa Defeza Timor-Leste (F-FDTL) liuhosi Unidade FALINTIL (UF) no Servisu Nasionál Intelijénsia (SNI), halo apreensaun bá evidénsia tabaku ho marka Pohon Sagu hamutuk kaixa 320 iha área Tasi-tolu, Díli.

(more…)

Kontinua Le'e

Defeza & Seguransa

Komandu PNTL Distribui Karreta 47 bá Munisípiu no Unidade Sira

Published

on

Hatutan.com, (18 Abríl 2024), Díli—Komandu Polísia Nasionál Timor-Leste (PNTL) iha Kinta 18 Abríl distribui tán karreta unidade hamutuk 47 bá komandu munisípiu 12, Rejiaun Administrativa Espesiál Oecusse Ambeno (RAEOA), Unidade Espesiál Polísia (UEP), Unidade Polísia Marítima (UPM) ho Unidade Patrullamentu Fronteira (UPF).

(more…)

Kontinua Le'e

Defeza & Seguransa

Vizita Papa Francisco, Seguransa Preparadu no Garantidu

Published

on

Hatutan.com, (16 Abríl 2024), DíliIX Governu Konstitusionál garante sei fó seguransa másimu durante loron tolu vizita Papa Francisco iha Timor-Leste (TL).

(more…)

Kontinua Le'e
Advertisement

Trending