Hatutan.com, (04 Jullu 2022), Díli—Prezidente Repúblika (PR) José Ramos-Horta nu’udár mós Komandante Supremu Forsa Armada nian, hato’o mensajen importante tebes bá FALINTIL-Forsa Defeza Timor Leste (F-FDTL) hodi kontinua garante pás no estabilidade.

Lee Mós : Membru F-FDTL Na’in-15 Konklui Formasaun Seguransa Bá Alta Entidade

PR José Ramos-Horta simu ho parade militár bainhira vizita kuartel Jenerál F-FDTL, Segunda (04/07/2022). Foto/Hatutan.com

Ramos-Horta nia mensajen ne’e nia hato’o bainhira halo vizita bá Kuartél Jenerál F-FDTL iha Fatuhada, Díli, Segunda (04/07/2022). Iha nia vizita dahuluk ho kualidade hanesan Prezidente Repúblika períodu 2022-2026 no Komandante Supremu Forsas Armada nian, Ramos-Horta, hatais kedas farda F-FDTL ho boña hodi   hato’o mós nia agradesimentu no apresiasaun bá servisu F-FDTL nian durante ne’e.

Iha vizita ne’e PR Ramos-Horta mós hala’o ezersísiu uitoan hodi  vizita no haree diretamente servisu divizaun ka departamentu ida-idak nian iha Kuartél Jerál F-FDTL inklui Ministériu Defeza nian.

Prezidente Repúblika mós koloka tempu ko’alia ka dada-lia ho responsavel ka xefe divizaun ida-idak nian iha Kuartél Jerál F-FDTL ho Ministériu Defeza, hodi hatene sira-nia dezafiu no sira-nia dezempeñu servisu

Ramos-Horta ho laran haksolok no orgullu vizita Ministériu Defeza no Xefe Estadu Maiór F-FDTL, nu’udar Komandante Supremu no Xefe Estadu primeira vez mak mai vizita fatin ida ne’e, atu rona avaliasaun no informasaun ne’ebé iha dezde 2000 to’o mai ohin.

“Ha’u kontente haree evolusaun pozitivu no progresu neineik ne’ebé la’o iha forsa armada dezde tinan 20 ikus ne’e signifika tinan 20 nia laran ne’e ita dezenvolve an no seidauk kompletu no tenke aselera iha tinan lima ka 10 mai ne’e,” Ramos-Horta hateten bá jornalista sira.

Misaun forsa nian define iha Konstituisaun, defeza tenke independente, integridade no soberanu no iha kontestu Timor-Leste nian, Ramos-Horta haktuir, buat barak ne’ebé forsa halo hodi fó mós apoiu bá PNTL bainhira presiza liu-liu iha fronteira ne’ebé dala-ruma situasaun dezastre ruma akontese.

Ho situasaun sira ne’e bele dezenvolve liu tan no fó meius liubá F-FDTL atu dezenvolve iha unidade Enjeñaria, unidade médika, atu F-FDTL mós prezente iha aldeia sira hodi ajuda reabilita eskola sira, klínika sira, no estrada oan ruma ne’ebé monu inklui fó asisténsia bá populasaun sira no ida ne’e importante bá.

PR Ramos-Horta vizita servisu tekniku F-FDTL nian iha Kartel Jenerál F-FDTL. Foto/Hatutan.com

Tuir Ramos-Horta, fasilidade ka ekipamentu ne’ebé F-FDTL iha nunka sufisiente tanba forsa la’ós de’it kilat no la’ós de’it sira-nia preparasaun tékniku militár operasionál, maibé iha buat barak tan ne’ebé presiza liu no seidauk kompletu tanba haree de’it Estadu tomak sei frazil ne’e duni la’ós forsa haksoit tiha bá oin hodi lao mesak, maibé forsa hola parte iha instituisaun Estadu tanba ne’e iha área ne’ebé forsa presiza mellora mak sistema manutensaun, sistema lojistiku.

“Seguransa marítima ita-nia seidauk dezenvolve no agora iha esforsu foun iha meius navais no aérea atu hadi’a liu tan buat ne’ebé ha’u haree iha nesesidade ita buka nafatin, maibé tenke realista ho progresu sira iha tinan 20 nia laran ne’ebé la’o di’ak tebe-tebes,” Ramos-Horta hateten.

Nia husu atu instituisaun defeza nasionál kontinua lori sira nia misaun garante ho instituisaun sira seluk tane dame apoiu povu no iha problema hanesan dezastre natural se forsa iha ekipamentu sira mós iha liña frente hamutuk ho Bombeiru  no polísia inklui Xefe Suku no Xefe Aldeia hodi apoiu vítima sira.

“Parabens ba Primeiru-Ministru hotu-hotu hahú husi primeiru governu to’o governasaun atuál ne’ebé ho rekursu no estabilidade polítika hodi garante forsa la’o nafatin,” nia tenik.

Xefe Estadu Maiór F-FDTL, Tenente Jenerál Domingos Raul “Falur Rate Laek” hateten, Xefe Estadu mai iha ne’e hanesan fundadór nasaun no fundadór bá forsa armada, hanesan aman bá nasaun nu’udar Komandante Supremu F-FDTL tanba ne’e hanesan Xefe Estadu iha servisu ka misaun ne’ebé boot no iha responsabilidade boot liu bá povu no liu-liu F-FDTL.

Falur Rate Laek fó parabens tanba primeira vez Xefe Estadu Timor Leste nian uza uniforme militár nian ne’e hatudu priviléjiu ida no pasu importante ida ho asaun ne’ebé ki’ik, maibé nia signifikadu boot ne’ebé sei hakerek iha istória nasaun Timor-Leste nian.

“Aproveita oportunidade ne’e sei mós aprezenta bá Xefe Estadu situasaun jerál kona-bá misaun no vizaun no rekomendasaun bá nesesidade ne’ebé F-FDTL iha atu nune’e bá oin Xefe Estadu bele buka posibilidade hodi tulun no mellora di’ak liu tan servisu defeza militár,” Falur Rate Laek hateten.

PR Ramos-Horta vizita Kuartel Jenerál F-FDTL. Foto/Hatutan.com

Xefe Estadu Maiór F-FDTL, Komodoro Pedro Klamar Fuik halo aprezentasaun kona-bá kondisaun no situasaun instituisaun F-FDTL durante dékada rua hahú husi 2000 mai too iha 2022.

Iha aprezentasaun Komodoro Pedro Klamar Fuik nian  ne’e foka  bá temátiku lima no ida uluk liu kona-bá Enkuadramentu funsionál ne’ebé haree liubá orientasaun estratéjiku no ordenamentu jurídiku.

Daruak nian kona-bá Estratéjia de transformasaun ne’ebé kobre planu dezenvolvimentu forsa, orientasaun estratéjiku, misaun F-FDTL, estrutura orgánika F-FDTL, efetivu autorizadu, meius ekipamentu no material, formasaun no treinu, avaliasaun de ameasa, empregu da forsa.

Datoluk nian kona-bá Avaliasaun estratéjika ne’ebé kobre kapasidade organizasaun, poder de kombate no kooperasaun tékniku militár.

Dahaat nian kona-bá konstranjimentu sira no ida ikus liu mak  rekomendasaun ne’ebé kobre meius ekipamentu, pesoál no infraestrutura. Totál F-FDTL efetivu 2.746 no husi númeru ne’e F-FDTL feto hamutuk 282, ekivale ba 10,22%.

Vizita  Xefe Estadu nian iha Kuartél Jenerál F-FDTL nian ne’e  simu ho parada militár ne’ebé hala’o husi komponente Naval, Terrestre, Komponente Apoiu Servisu, komponente banda múzika F-FDTL inkluidu mós komponente polísia militár Timor Leste.

Jornalista: Vito Salvador