Hatutan.com, (06 Jullu 2022), Díli- Diretora MAHOWE’EN Filme, Antonia Ximenes hateten, objetivu prinsipál husi produsaun Filme Tatiana mak atu sai nu’udár advokasia ida hodi luta kontra traballu infantil iha Timor-Leste.

Ekipa MAHOWE’EN Filme. Foto/Hatutan.com

Diretora MAHOWE’EN Filme, Antonia Ximenes bá jornalista sira iha Palásiu Prezidensiál, Díli, Kuarta (06/07/2022) hateten, objetivu dahuluk hasoru malu ho Prezidente Repúblika mak lori labarik sira husi MAHOWE’EN Filme mai fo parabéns bá Prezidente Repúblika.

Nia afirma objetivu prinsipál husi sorumutuk ne’e mak  husu PR nia haree oinsá kontinuasaun bá MAHOWE’EN nia Filme ne’e. Filme ne’ebé MAHOWE’EN halo maka  Filme ne’ebé foka liubá traballu infantil. Tanba hanesan ema hotu hatene katak labarik sira barak maka soe eskola hodi envolve aan iha servisu ne’ebé sira la merese atu servisu.

Labarik ki’ik sira ne’ebé envolve iha Filme ne’ebé prodús husi MAHOWE’EN hamutuk 30 no Filmajen ne’ebé MAHOWE’EN sei aprezenta foka liubá iha traballu infantil no mós situasaun real ne’ebé Timoroan nian.

“Ita haree labarik sira barak maka servisu hanesan agora daudaun akontese iha mota Comoro, ida ne’e realidade, ne’ebé filme ne’e la’ós dehan halo tuir ami nia hanoin de’it, maibé ida ne’e foti isu real akontese duni iha ita-nia rain,” Antonia Ximenes hateten.

Iha parte seluk, Produtór Filme Tatiana, Evangelisto Gantry dos Santos Meilana hateten, filme ne’ebé MAHOWE’EN prodús ne’e nia Títulu naran Tatiana kona-bá labarik ida ne’ebé nia moris iha Mota Comoro nia iha mehi ida no depois nia hetan susesu.

 Iha filme ne’e haktuir, maske labarik ne’e mai husi família kbiit laek, nia aman la iha, maibé nia inan peneira rai-henek no depois labarik ne’e ajuda mós nia inan ba fa’an dosi too tempu labarik ne’e ho nia bin iha mehi ida hakarak susesu iha sekuel ikus husi Filme ne’e nia hetan duni susesu.

“Hasoru malu ho Prezidente  Repúblika atu informa fali kontinuasaun Filme Tatiana Segundu. Filme Tatiana primeiru remata ona ne’ebé lansa husi Exelénsia José Ramos-Horta,” Evangelisto Gantry Dos Santos Meilana hateten.

Ekipa MAHOWE’EN informa hikas ba Sefe Estadu katak, sira sei kontinua bá Tatiana Segundu ne’ebé Tatiana hafoin nia boot, nia sai fali ativista feto ida ne’ebé sai protetór bá direitu labarik nian.

Iha filmi ida ne’e nia sei salva labarik na’in-tolu (3) ne’ebé sai hanesan traballadór infantil husi empreza ka kompañia no labarik na’in-tolu (3) ne’e hetan obrigasaun servisu iha fabrika bataku maske sira nia idade ki’ik oan hela no Tatiana konsege salva duni sira hodi sees husi ne’ebá.

Prezidente Repúblika mós hato’o apresiasaun no suporta atu labarik Timor-Leste mós bele iha mehi hanesan labarik ida atu espresa sira-nia talentu no depois Prezidente Repúblika enkoraja ba alin sira atu sira mós bele sai autór hakerek filme tanba iha tinan oin PR sei realiza festival sinema Timor-Leste.

Iha parte seluk, autora Tatiana Fernandes hateten nia halimar filme ne’e ho idade 11 anos, senti kontente bele hola parte iha filme ne’ebé nia rasik maka sai autór.

“Ha’u kontente tanba bele fanun kolega sira seluk, bele sai labarik ne’ebé badinas iha futuru. Dezafiu ne’ebé ha’u hasoru maka perturba ho oráriu eskola.” Tatiana Fernandes hateten. Tatiana Fernandes daudaun ne’e enfrenta eskola primária iha sentru Shalom Bebonuk, tuur iha V ano.

Jornalista: Vito Salvador