Hatutan.com, (09 Jullu 2022), Díli- Prezidente Repúblika (PR), José Ramos-Horta, Sabadu (09/07/2022), iha Postu Administrativu Railaco, Munisípiu Ermera,  lansa programa nasionál nutrisaun no seguransa alimentár atu hadi’a alimentasaun populasaun nian hodi luta kontra mánutrisaun bá labarik no inan isin rua sira.

Lee Mós : Kafé Ermera Reprezenta Mós Timor-Leste iha Mundu Internasionál

Prezidente Repúblika, José Ramos-Horta, Sábadu (09/07/2022)), iha Railaco, Ermera, Lansa Programa Nasionál Nutrisaun no Seguransa Alimentár. Foto/Hatutan.com

Serimónia lansamentu  nasional bá programa nutrisaun no  seguransa alimentár ne’e partisipa mós husi Primeiru-Ministru Taur Matan Ruak no Prezidente Parlamentu Nasionál, Aniceto Guterres no membru VIII governu, membru parlamentu nasional no korpu diplomátiku no konvidadu espesiál sira seluk tan.

Ramos-Horta iha nia diskursu afirma, kampaña kontra sub-nutrisaun kampaña ida morál, polítiku, ekonómiku, etiku buat hotu-hotu ne’e iha konsensu nasionál iha tinan lima nia laran, bele hatún, taka tiha problema sub-nutrisaun husi kosok oan to’o sira ne’ebé tinan lima no tinan hitu.

Nia afirma programa ne’e la’ós komplikadu, la’ós todan sistema nasaun unidas hanesan UNICEF programasaun nutrisaun mundiál WFP, Banku Mundiál no Governu rasik hotu-hotu identifika ona abut bá sub-nutrisaun.

Primeiru-Ministru ko’alia ona kona-áa ida ne’e, iha konsensu nasionál, konsensu polítiku, iha konsiénsia ne’e kestaun ida ne’ebé presiza haree labarik oan sira ne’ebé kada loron han de’it buat ne’ebé laiha nutrisaun sira atu estuda oinsá, futuru oinsá entaun ne’e mak Prezidénsia Repúblika nia vizaun.

“Vizaun ida ne’ebé partilla, fahe husi Governu tomak, ita-nia lideransa tomak no husi ita-nia parseiru internasionál sira ne’e, entaun la’ós buat ida foun ka laiha posibilidade tanba laiha konsensu ne’e iha,” José Ramos-Horta hateten.

Timor-Leste tenke hahú no halo duni, tinan lima mai lakohi estatístika hatete 40% nafatin mánutrisaun entaun tenke tun bá 20% ka zero (0), tanba ne’e Horta hateten, Timor-Leste tenke investe liután iha setór agrikultura atu garante seguransa alimentár, la’ós kafé de’it, bele tau matan Timor nia asisténsia iha foos, batar, koto, buat hotu-hotu ne’ebé rai ne’e bele prodús.

“Ita tenke muda ita nia hahán ne’e, moras balun bara-barak mosu iha Timor iha tinan 20 mai ne’e tanba han etu demais, supermi demais tanba sub-nutrisaun mós mai husi ne’ebá, ita la han ai-fuan, labarik sira la han ai-fuan barak loos iha Timor,” Horta dehan.

Xefe Estadu ne’e hatutan la’ós labarik sira de’it ,inan-aman sira mós la han ai-fuan oin-oin ne’ebé mak iha vítima barak, ai-fuan ne’e iha vítima C barak, modo, fehuk midar, batar di’ak liu fali bá iha nutrisaun, maibé balun lakohi han batar tanba batar ne’e ema kiak nian.

Xefe Estadu motiva mós atu populasaun sira koko took batar nurak ne’e tanba gostu liu la’ós hotu-hotu hakarak mak han etu depois diabetes barak loos tanba han foos ho supermi.

Primeiru Ministru Taur Matan Ruak hateten kombate mánutrisaun no mós seguransa alimentár ne’e problema ida nasionál, Ermera Timor laran tomak iha 47% mánutrisaun, Ermera de’it 63% munisípiu ida mánutrisaun boot liu iha Timor no ne’e lori preokupasaun boot ida bá futuru labarik sira nian.

“Ita hakarak ita-nia oan sira boot liu ita, ha’u iha oan na’in tolu sira as liu ha’u tanba uluk ha’u han de’it ai-farina, sira agora la han ona buat ne’ebé uluk ha’u han entaun favór ida ita hotu sira koopera tau matan bá ida ne’e kampaña ida ne’ebé ha’u halo dezde uluk ha’u Prezidente Repúblika,” Taur Matan Ruak hateten.

Xefe governu ne’e hatutan presiza servisu barak tanba ne’e agradese ba Xefe Estadu bele partilla ho Governu ho Parlamentu Nasionál, parseiru dezenvolvimentu sira ne’ebé prezente hotu iha ne’e atu hadi’a nutrisaun no seguransa alimentár hodi aumenta produtividade iha futuru, liu-liu saúde  labarik ki’ik oan sira nian.

Jornalista: Vito Salvador