Hatutan.com, (20 Fevereiru 2023), Díli—Motorista, komunidade no autoridade lokál kontinua preokupa ho kondisaun estrada ligasaun kapitál Gleno bá postu administrativu Letefoho to’o postu administrativu Atsabe ne’ebé aat grave, difikulta tebes movimentu transporte públiku no privadu.

Kondisaun Estrada hosi Gleno bá Postu Administrativu Letefoho, tun to’o Postu Administrativu Atsabe, Sesta (09/02/2023). Foto/Cipriano Colo.

Kondutór Bus Ailisu Hadomi, Jacob Gomes de Jesus ne’ebé lorloron tula pasajeiru diresaun Díli bá Atsabe triste tebes tanba movimentu lorloron iha estrada ne’ebé aat tebes liuliu iha tempu udan.

Lee Mós: KM Autoriza Loke Prosesu Tenderizasaun ba Rehabilitasaun Estrada Laga-Baguia

Ho triste kondutór ne’e haktuir ba Hatutan.com iha área Atsae katak, tinan barak ona movimentu iha estrada hanesan ne’e hela de’it.

Bainhira tempu udan kondutór sira terus liu, tanba tahu makaas, dala ruma dalan kotu tanba rai halai, sira tenke aguenta to’o semana to’o fulan tanba tenke suru sai ho manuál, maibé sira la rende tanba ida ne’e mak sira nia moris.

“Iha eleisaun ami sei nafatin ezerse ami nia direitu hodi ba vota partidu polítiku sira atu ukun rai ne’e. Ami lakohi atu husu buat barak tanba ami baruk ona. Imi mak tenke uza imi nia konsiénsia hodi haree povu ida ne’e nia terus no susar. Loke matan hodi haree took ba,” Jacob Gomes de Jesus hateten iha Atsabe (09/02/2023).

Kondisaun Estrada hosi Gleno bá Postu Administrativu Letefoho, tun to’o Postu Administrativu Atsabe, Sesta (09/02/2023). Foto/Cipriano Colo.

Agora daudaun hanesan kondutór atu bele ka labele, estrada atu at halo nusa mós sira kontinua movimentu hodi buka moris.

Kondutór Bus Biasuma Lebulu, Avelino Gomes husu Governu hadi’a estrada ida ne’e tanba ninia moris mak lori kerreta hodi sustenta familia.

“Governu laran di’ak karik, tau took iha planu hodi hadi’a netik ami nia dalan ne’e, tanba estrada aat liu mak ami nian hosi Gleno mai to’o Atsabe. Ami terus liu. Ajuda netik ami ba,” nia halerik.

Estudante oan sira mós husu ba Governu atu loke matan ba estrada iha postu administrativu Atsabe ne’ebé kleur ona la hetan atensaun.

“Ami estudante Atsabe oan husu Governu hadi’a ami nia estrada,” estudante ida hosi Atsabe hateten bainhira jornalista Hatutan.com hasoru iha dalan.

Komunidade ho naran Afonso Gomes ne’ebé utiliza motorizada hanesan únika transporte hodi movimentu ba mai Atsabe Díli sentre triste tanba dalan ku’ak barak, iha tempu udan tahu makaas no fatuk boboot deit.

Dalaruma roda tenke ko’ak ida dalan, tula fali motór ho Bus mai troka roda iha Díli. Ne’e haneasn preokupasaun boot ba komunidade maioria iha postu administrativu ne’e.

Xefe Suku Batu Manu, Fernando Soares. Foto/Cipriano Colo.

Kondutór Bus Nabilan Hadomi, Venâncio dos Santos Gonçalves, hanesan kondutór husu de’it bá Governu bele tau prioridade ba estrada ne’e atu hatutan moris iha área rurál.

“Ami husu Governu ne’e iha hanoin karik, imi ko’alia ba malu took hadi’a netik ami nia estrada ida aat loos ne’e,” nia hateten.

Kondutór ne’e kada semana movimentu Díli Atsabe dala neen hodi tula pasajeiru.

Nune’e mós Xefe Suku Batu Manu, Fernando Soares preokupa tebes ho estrada hosi Gleno to’o Atsabe bainhira tempu udan difikulta tebes movimentu transporte públiku tanba tahu makaas, hanesan povu kiik preoupa tebes ho ida-ne’e.

Hanesan autoridade lokál, rekomenda ba nai ulun sira atu labele mai promete de’it iha tempu kampaña maibé tenke halo asaun bainhira kaer ukun.

“Ami la husu buat seluk, ami Letefoho Atsabe husu de’it mak hadi’a ami nia estrada ne’e atu ami bele ho livre buka moris. Tanba ami Atsabe ne’e maioria populasaun moris ho fila liman. Fa’an tais, fa’an produtu lokál sira seluk atu bele moris. Favór hadi’a mak ami nia estrada ne’e,” Fernando Soares hateten ba Hatutan.com iha Atsabe.

Administradór Postu Administrativu Atsabe, Costâncio da Silva. Foto/Cipriano Colo.

Kona-bá preokupasaun hirak ne’e, Administradór Postu Administrativu Atsabe, Costâncio da Silva hateten, nia halo ona sirkulár ida ne’ebé asinadu hosi Administradór ho parte Polísia Nasionál Timor Leste (PNTL) Atsabe nian, atu halo kobransa ka husu serbisu voluntáriu hosi emprezáriu Atsabe oan ne’ebé iha karreta atu fó kontribuisaun orsamentu $10 hodi bele sosa fatuk atu bele tau iha dalan ku’ak sira no mós hadi’a ponte Lauana ne’ebé kotu hela.

Alende ne’e kompañia Monteveado oferese ona bronjong hanesan rede no oras-ne’e ke’e hela fatuk atu enxe.

“Ida ne’e hanesan inisiativa hosi Administradór hamutuk ho PNTL tanba iha Atsabe iha ema barak mak iha karreta, maibé kondisaun estrada mak susar tebes. O bele iha karreta maibé kondisaun estrada la di’ak, ne’e sei para de’it iha uma tanba atu tula pasajeiru mós la di’ak,” Costâncio da Silva hateten iha rezidénsia Atsabe.

Tanba ne’e, sirkulár ida-ne’e autoridade sira husu kontribuisaun hodi bele aterru estrada ku’ak sira nune’e bele fasilita transporte públiku no privada sira bele movimentu duni.

Administradór mós husu bebeik ona Governu atu hadi’a estrada liu hosi reuniaun ho Konsellu koordenasaun munisipál ninian iha kada fulan.

“Estrada ida-ne’e tama ona iha planu kontrusaun estrada ligasaun Ainaro nian mai Dukurai Letefoho, ne’ebé komesa ona no tuir planu projetu ne’e sei hahú mós iha Letefoho mai Lauana kontinua ba Bobonaro. Ne’e iha ona planu, maibé tenderizasaun ne’e mak dalaruma sei han prosesu,” nia hateten.

Prezidente Autoridade Munisípiu Ermera, Eusébio Salsinha. Foto/Cipriano Colo.

Prezidente Autoridade Munisípiu Ermera, Eusébio Salsinha hateten, konstrusaun estrada ligasaun Gleno ba Letefoho iha ona apoiu hosi Asian Development Bank (ADB) ho montante millaun $71 ho nia lansamentu sei halo iha tempu badak.

“Iha tinan rua nia laran ne’e estrada sira ne’e sei halo hotu ona. Agora daudaun autoridade munisipál hanoin hela atu koordena ho parte Ministériu Obras Públikas (MOP) atu bele serbisu hamutuk ho Timoroan sira ne’ebé mak iha karreta vaskolante hodi ajuda taka tutuir estrada ku’ak sira hahú hosi área Talikotu ba to’o Goulolo, nee tenke taka hotu, se la’e provizoriamente karreta bus sira ne’e  sei problema nafatin,” Eusébio Salsinha hateten ba Hatutan.com iha Gleno (10/02/2023).

Kona-bá Estrada ligasaun hosi Letefoho ba Atsabe ne’e Eusébio Salsinha informa, kompañia Monteveado komesa halo ona rehabilitasaun hahú iha Lauana.

“Alende ne’e, iha estrada balun mós komunidade mak halo aterru kapas loos. Estrada ida grave liu ne’e mak parte Gleno, Goulolo to’o Letefoho. Maibé hosi Letefoho ba Atsabe ne’e di’ak hela,” Prezidente Autoridade Ermera ne’e haktuir.

Prosesu La’o Hela

Ministru Obras Públikas (MOP) Abel Pires. Foto/Elio dos Santos da Costa.

Ho Preokupasaun komunidade no kondutór sira nian, Ministru Obras Públikas (MOP) Abel Pires responde katak, dalan hosi Gleno to’o Letefoho no hosi Letefoho, Lau-Ana bá Atsabe iha ona prosesu nia laran.

“Dalan hosi Gleno ba to’o Letefoho iha prosesu tama ba hadi’a dezeñu, tanba dezeñu kleur ona no estragus aumenta barak. Entaun, tenke atualiza hikas dezeñu no empreza ne’ebé atu halo atualizasaun ba dezeñu MOP hetan ona no oitoan tán atualiza hotu bele ba tender ona,” Abel Pires hateten iha Palásiu Governu, Kuarta (15/02/2023).

Iha períudu hein atualizasaun dezeñu no konstrusaun própriu, MOP avansa ho projetu emerjénsia balun atu bele fasilita komunidade no hadi’a estrada sira balun tuir kondisaun ne’ebé iha.

Esforsu MOP nian la’o di’ak hela no balun prosesu la’o ona ba oin inklui balun iha ona (Ajénsia Dezenvolvimentu Nasionál (AND) bele haree no sei kontinua ba faze tuir-mai.

Ministru ne’e mós atualiza katak, dalan hosi Letefoho bá Hatubuiliku manán-na’in iha ona no prosesu tama ba iha Kámara Kontas atu fó vistu hodi bele hahú konstrusaun.

Kondisaun Estrada hosi Gleno bá Postu Administrativu Letefoho, tun to’o Postu Administrativu Atsabe, Sesta (09/02/2023).

Postu administrativu Letefoho iha munisípiu Ermera, ho nia Populasaun tuir Sensus 2010 hamutuk 20.887 iha nia área 129,09 km² kobre ba suku ualu mak hanesan Dukurai, Eraulu, Goulolo, Hatugau, Haupu, Katrai Kraik, Katrai Leten no Lauana.
Postu Administrativu Atsabe iha munisípiu Ermera, ho nia populasaun 17.264 (2010) ho área 167,90 km².

Postu administrativu ne’e ho nia suku 12 mak hanesan Atara, Baboi Kraik, Baboi Leten, Batu Mano, Lasaun, Laklo, Laubonu, Leimea Leten, Malabe, Obolu, Parami  no Tiarlelo ho aldeia 59.

Jornalista: Cipriano Colo/Rogério Pereira Cárceres