Hatutan.com, (11 Jullu 2022), Dili- iha fulan-Maiu ho fulan-Juñu,  tinan ne’e,  Ministériu Justisa (MJ) kobre reseita  millaun $2.1 husi arrendatariu  sira rai ho uma Estadu nian hodi kontribui ba  kofre Estadu.

Lee Mós :  Embaixadór Xina Husu MJ Aselera Akordu Kooperasaun iha Área Justisa

Rai Estadu balun iha área Bebonuk, Díli, ne’ebé Estadu estabelese kontratu arrendamentu ho empreza balun maibé to’o agora abandonadu. Foto/Hatutan.com

“Iha fulan hirak liubá iha preokupasaun boot tanba taxa arrendamentu bá  Estadu tun maka’ás, tanba arrendatariu sira la kumpre  sira-nia devér no obrigasaun hodi selu taxa bá uma no rai Estadu ne’ebé sira uza, maibé iha  fulan-rua nia laran, hahú iha fulan-Maiu ho fulan-Juñu, tinan ne’e, ami esforsu taxa ne’ebé ami hatama bá kofre Estadu kuaze millaun $2.1, maibé ba sira ne’ebé la selu arrendamentu rai no uma Estadu ami sei esforsu durante fulan 10 nia laran atu sira bele kumpre nune’e bele tuir predisaun kada tinan bele hetan to’o  millaun $9. 6,” Ministru Justisa Tiago Amaral Sarmento hateten bá jornalista sira, Segunda (11/07/2022).

Maske kobre ona reseita bá kofre Estadu husi arrendatariu sira, maibé sei iha arrendatariu ka empreza ne’ebé seidauk kumpre sira-nia obrigasaun hodi selu, tanba bazeia bá relatóriu provizóriu husi Diresaun Nasional Terras no Propriedade (DNTP) iha fulan ida nia laran iha situasaun tolu maka akontese primeiru iha kompañia 20 maka halo ona kontratu arrendamentu rai no uma Estadu iha Díli laran, maibe la selu, segundu iha kompañia 20 resin fó aluga tutan bá parte seluk laiha koñesimentu no laiha autorizasaun husi MJ no terseiru iha arrendatariu balun fa’an ona rai no uma Estadu bá ema seluk.

Iha tempu badak ekipa konjunta ne’ebé kompostu husi MJ, DNTP, Polísia Migrasaun, Ministériu Interiór, SERVE, Ministériu Finansas no Alfándega sei tun diretamente hodi haree situasaun refere.

Sansaun ba arrendatariu ka emprezariu ne’ebé la kumpre lei Tributária maka sei aplika sansaun administrativa, sivíl no penal.

Jornalista : Carmelita Isaac