Hatutan.com, (12 Jullu 2022), Díli– Embaixada Korea Súl  iha Timor-Leste, Tersa (12/07/2022), entrega ekipamentu treinu fíziku Taekwondo nian bá komandu FALINTIL-Forsa Defeza Timor-Leste (F-FDTL) ho pakote hamutuk 400.

Lee Mós : Korea Oferese Rapid Antigen Test Kits 50.000 ba TL

Embaixadór Korea Súl iha Timor-Leste, Kim Jon Hu, simbolikamente entega atributu treinu Taekwondo nian bá Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” , Tersa (12/07/2022). Foto/Hatutan.com

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” hateten, dezde  tinan 2000 bainhira Governu tranzitória hosi UNTAET ho Timor-Leste, hodi harii mós ho instituisaun F-FDTL no Korea Súl sai hanesan ona parseiru ida iha ezersísiu fíziku Taekwondo nian. Iha altura ne’e, hahú hosi forsa sira multinasionál nian ne’ebé mak mai fó pás iha TL.

“Ohin, ita mai fó tan ida ne’e, para hametin nafatin ita-nia relasaun ida ne’e, obrigadu barak bá señór embaixadór, lori Xefe Estadu Maiór Jenerál hosi komponente hotu nia naran, fó obrigadu barak, tanba ita-boot sira mai kontinua nafatin buat ne’ebé hahú tiha ona,” Tenente Jenerál Domingos Raúl “Falur Rate Laek” hateten iha serimónia entrega ekipamentu Taekwondo hosi Korea Súl bá Komandu F-FDTL  iha Kuartél Jenerál F-FDTL, Díli.

Falur Rate Laek, haktuir, molok ne’e, Governu Korea Súl mós apoia ona meiu lubun ida mak hanesan roo patrullamentu bá Komponente Naval iha 2011. Enkuantu iha ezersísiu Taekwondo ne’e rasik, forsa timoroan ida mak konsege sai hanesan instrutór bá Taekwondo.

“Ne’ebé ita nia relasaun ne’e dezde uluk kedas. Mais la’ós ne’e de’it, Governu Korea Súl ajuda ita iha formasaun kona-bá agrikultura moderna, prodús ai-fuan ne’ebé barak, no bele sai indústria ki’ik. Alende ida ne’e mós, sira fasilita ita-nia juventude ne’ebé mak agora ba servisu iha Korea Súl ne’ebá, ita -oot sira hatene katak, sira maka hatama osan barak liu mai halo dezenvolvimentu iha TL,” Tenente Jenerál Falur Rate Laek haktuir.

Iha fatin hanesan, Embaixadór Korea Súl iha Timor-Leste, Kim Jon Hu, hatutan, relasaun entre Korea Súl ho TL, hahú kedan hosi inísiu destakamentu forsa peace keeping operation sira mai TL. Tanba ne’e, nasaun rua ne’e sai hanesan amigu ida di’ak dezde uluk.

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” tau atributu Taekwondo nian. Foto/Hatutan.com

Embaixadór Kim Jon Hu, esplika  iha altura bainhira nia ho komitiva bá vizita militár foun sira iha Sentru Formasaun no Treinu iha Metinaro, haree katak, membru foun sira ne’ebé treinu hela Taekwondo, barak mak laiha uniforme. Tanba ne’e maka, nia ho inisiativa rasik, husu kedan ba ninia Governu iha Korea Súl, atu oinsá mak bele ajuda mós farda Taekwondo mai militár sira.

“Ha’u espera ho farda taekwondo ne’e bele ajuda fó formasaun ba sira iha F-FDTL, no fiar katak, sé aban bainrua iha tán pedidu ruma, ami nafatin prontu para atu ita bele servisu hamutuk hodi apoiu tán buat ruma,” Embaixadór Kim Jon Hu, hateten tán.

Iha Korea Súl, ema hotu-hotu partisipa iha treinu Taekwondo, hahú hosi ema ho idade labarik sira ne’ebé ida boot bá to’o adultu, sira hotu aprende treinu Taekwondo. Aplikasaun treinu taekwondo ida-ne’e, hodi sai hanesan formasaun mentál ida ba labarik sira, atu iha dixiplina.

Kada tinan, governu Korea Súl, fó apoia finanseira mai TL, kuaze ho montante orsamentu millaun $17 liu.  Iha tinan 2022 ne’e, nasaun rua selebra kooperasaun bilateral bá dala-20. Espera ho tinan 20 ne’e, relasaun entre rai rua hahú forte liután.

Jornalista: Rogério Pereira Cárceres