Connect with us
Pakote Ahi

Defeza & Seguransa

Tinan Ne’e, Rekruta Membru F-FDTL Foun 600

Published

on

Hatutan.com, (08 Jullu 2022), Díli-Ministériu Defeza (MD) ho komandu FALINTIL-Forsa Defeza Timor-Leste (F-FDTL), iha tinan 2022 ne’e, hahú prosesu preparasaun bá rekrutamentu membru foun F-FDTL hamutuk na’in 600.

Lee Mós : Mensajen Ramos-Horta Bá F-FDTL: Kontinua Garante Pás no Estabilidade

Ministériu Defeza (MD) ho komandu FALINTIL-Forsa Defeza Timor-Leste (F-FDTL), iha tinan 2022 ne’e, hahú prosesu preparasaun bá rekrutamentu membru foun F-FDTL hamutuk na’in 600. Foto/Hatutan.com

Iha prosesu rekrutamentu ne’e, sei re-anúnsiu de’it lista ka naran kandidatu sira ne’ebé molok ne’e submete ona sira ninia dokumentu, maibé la konsege pasa iha selesaun hamutuk ema 1800.

Ministru Defeza (MD), Filomino da Paixão de Jesus, hateten, Governu liuhosi reuniaun konsellu ministru, Kuarta, (04/05/2022) liubá, halo aprovasaun bá proposta kona-bá rekrutamentu foun bá membru F-FDTL ho efetivu 600 iha 2022 nia laran.

Advertisement

“Tuir proposta mai hosi Xefe  Estadu Maiór Jenerál das F-FDTL, Tenente Jenerál Falur Rate Laek, katak, atu re-verifika de’it dokumentu hosi aplikante sira ne’ebé mak in-aptu, iha prosesu  selesaun 2021, hamutuk 1800. Governu konkorda ho proposta ne’ebé aprezenta, tanba ne’e redús kustu bá prosesu  selesaun,” Ministru Defeza (MD), Filomino da Paixão de Jesus, hateten bá jornalista sira, liuhosi konferénsia imprensa iha Kuartél Jenerál, F-FDTL, Fatuhada, Dili, Sesta (08/07/2022).

Filomino da Paixão afirma, rekrutamentu ida ne’e, hanesan parte ida hosi kompromisu polítiku Governu Konstitusionál da-ualu nian, ne’ebé uluk aprezenta ho efetivu hamutuk 2,333. Maibé ho difikuldade sira ne’ebé iha orsamentu ne’e sumba, Governu lori de’it restu na’in-600.

Rekrutamentu ne’e mós hala’o tuir konseitu foun sira estratéjiku militár nian ne’ebé hatún tiha ona kona-bá sistema forsa nian, misaun sira F-FDTL nian, ho dispozitivu foun ne’ebé trasa.

“Ita presiza halo rekrutamentu ida ne’e para prenxe estratéjia ida foun ne’e. Nune’e, komisaun rekrutamentu, halo ona filtrajen bá ema sira ne’e, tuir fita de tempu ne’ebé estabelesidu, sira sei bá taka naran iha munisípiu iha semana oin,” Filomino da Paixão de Jesus, informa.

Rekizitu sira bá iha rekrutamentu ne’e, sei la’o tuir nafatin prosesu rekrutamentu ne’ebé mak hala’o tiha ona tinan 2021 nian. Idade mínimu no másima mak 18 to’o 25, no tenke sidadaun timoroan. 

Advertisement

La Simu Membru Grupu Arte Marsiál

Iha okaziaun ne’e, Filomino da Paixão de Jesus, hateten, iha prosesu rekrutamentu ida ne’e, komisaun rekrutamentu sei la simu sidadaun ka joven sira ne’ebé mak involve aan no treinu iha Grupu Arte Marsiál.

Sidadaun sira ne’ebé mak atu tama iha fileira Falintil Forsa Defeza Timor-Leste nian, tenke soe hotu valór sira mak mai hosi Grupu Arte Marsiál ne’ebé la konkorrente no la hanesan ho doutrina ka misaun intuisaun F-FDTL nian.

“Valóres ne’e tenke soe. Renúnsia ba arte marsiál para depois ita kaer loos buat ida de’it, prinsípiu ida de’it, valores ida de’it, paradigma ida de’it, krensa ida de’it, para depois ita labele iha problema iha implementasaun. Sé mak tuir buat sira ne’ebé nia halo kompromisu ona, nia tenke sai, tanba iha ne’e, hanesan ha’u hatete ona, ami iha ne’e iha regra, para depois ita tuir,” Ministru Filomino da Paixão fó hanoin.

Governante ne’e mós afirma liután katak, bainhira sidadaun sira ne’ebé selesionadu iha rekrutamentu, la’ós atu permanente de’it ona iha instituisaun F-FDTL. Maibé, atu sai kuadru permanente, tenke liután hosi períodu dala-ida, rua no to’o dala-tolu, hafoin ida ne’ebé mak komprovadu ona, bele tama ba forsa permanente.

Advertisement

“Rekrutamentu sira agora ita halo ne’e, em-prinsípiu servisu militár temporáriu, la’ós mai para sempre, lae. To’o iha tempu ida, komandu F-FDTL rasik mak determina sé-sé mak bele ba iha kuadru permanente, sé-sé mak iha li’ur,” Filomino Paixão esplika.

Diretór jerál Ministériu Defeza (MD), Nuno Carvalho Santos, dehan, haree desizaun komandu FALINTIL-Forsa Defeza Timor-Leste nian, sira hamutuk ho ekipa komisaun rekrutamentu, hodi halo filtrasaun ka ta’es bá lista kandidatu sira ne’ebé hatama ona dokumentu iha rekrutamentu 2021 nian.

Iha prosesu rekrutamentu 2021, komisaun rekrutamentu distribui formuláriu ba sidadaun foin-sa’e feto no mane sira iha territóriu nasionál, hamutuk rihun 22. Maibé, sira rekolla de’it total formuláriu hamutuk rihun 12.

“Filtra fila-fali hodi sai aptu no mós in-aptu ne’e, iha 9 mill in-aptus, no 2400 maka pasa bá iha aptus. Ne’e mak iha tinan kotuk sira bá tuir teste iha Metinaro, no felizmente, balu tama ona ba iha fileira forsas armadas, restu ne’e mak agora ita filtra fali hodi bele bá kontinua bá tama iha fileira forsas armadas nian iha tinan ida ne’e,” Nuno Carvalho Santos haktuir.

Orsamentu bá prosesu rekrutamentu ne’e, hamutuk $500,000-resin. Tuir planu, membru hamutuk na’in-600 ne’e, 240 sei koloka bá komponente navál, 240 bá k0mponente terrestre, no na’in-120 koloka bá unidade sira seluk.

Advertisement

Rekrutamentu ida-ne’e Governu ho Komandu F-FDTL deside fó prioridade bá veteranu nia oan sira ne’ebé uluk sakrifika aan durante prosesu luta bá libertasaun nasionál TL.

Jornalista: Rogério Pereira Cárceres

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

PNTL Detein Autór Sobu Kadeira iha GMT Laran

Published

on

Hatutan.com, (21 Maiu 2024), Díli-Polísia Nasionál Timor-Leste (PNTL) Munisípiu Díli kaptura no detein autór ida ho inisial MdS tanba harahun kadeira tuur-fatin hamutuk 14 ne’ebé baibain adeptu sira tuur durante asiste Kampionatu Nasionál Boxe iha salaun Jinájiu Munisipál Díli (GMT-sigla Indonézia).

(more…)

Kontinua Le'e

Defeza & Seguransa

UPF Prende Kombustivel Litru 245 iha Memo-Maliana

Published

on

Hatutan.com, (17 Maiu 2024), Díli-Polísia Nasionál Timor-Leste (PNTL) husi Unidade Patrullamentu Fronteira (UPF) prende  kombustivel ho kuantidade litru 245 iha área Memo, Postu Administrativu Maliana, Munisipiu Bobonaro.

(more…)

Kontinua Le'e

Defeza & Seguransa

Diretór Nasionál PCIC Vicente e Brito Rekoñese Nia Oan-mane Uza Pistola Treinu Tiru

Published

on

Hatutan.com, (14 Maiu 2024), Díli-Diretór Nacional bá Policia Científica e de Investigação Criminal (PCIC), Vicente Fernandes e Brito,  ‘rekoñese’ fó pistóla bá oan-mane hodi treinu tiru hamutuk ho membru  PCIC sira iha área Kaitehu, Suku Tibar, Postu Administrativu Bazartete, Munisípiu Liquiça.

(more…)

Kontinua Le'e
Advertisement

Trending