Hatutan.com, (13 Jullu 2022), Díli-Tribunál Distritál Díli (TDD) liu husi primeiru interrogatóriu ne’ebé prezide husi juis José Gonçalves, deside aplika medida koasaun Termu Identidade Rezidénsia (TIR), aprezentasaun periódika no proibisaun auzénsia bá arguidu kazál na’in-ida ho inisiál WX (tinan 33) no HSJ (tinan 33), tanba deskonfia falsifika dokumentu ofisiál nasaun ho sira-nia karimbu rasik hodi halo vistu no paresér legál ba Ministériu Negósiu Estranjeiru no Koperasaun (MNEK).

Kazál ida nu’udár sidadaun estranjeiru ne’ebé Servisu Migrasaun halo detensaun tanba deskunfia falsifika dokumentu Estadu. Foto/Migrasaun

Konteúdu husi desizaun TDD maka bandu arguidu na’in-rua nu’udár sidadaun estranjeiru ne’e sai hosi territóriu nasionál durante prosesu investigasaun, tanba ne’e TDD autoriza arguidu sira bele fila hikas bá sira nia rezidénsia, maibé nafatin koopera ho justisa hodi halo aprezentasaun obrigatóriu fulan ida dala rua, iha loron 1 no loron 15 iha servisu Migrasaun.

Tribunál mós aplika medida garante osan bá Estadu ho valor ema ida $500,000 nune’e total arguidu na’in rua millaun $1.

Razaun TDD aplika medida koasaun ne’e ho objetivu atu asegura arguidu sira nia prezensa durante prosesu investigasaun.

Advertisement

Iha primeiru interrogatóriu ne’e, Ministériu Públiku (MP) ne’ebé reprezenta husi Prokuradór Domingos Guoveia Leite promove arguidu sira bá pratika krime falsifikasaun dokumentu ne’ebé previstu iha artigu 303 husi kódigu penál Timor-Leste.

Servisu Migrasaun liuhusi operasaun rutina, Kuarta (06/07/2022),  deteta no halo detensaun bá sidadaun estranjeiru kazál ida ne’ebé maka halo falsifikasaun bá dokumentu hosi instituisaun Estadu nian hodi hetan lukru.

Diretór Jerál, Servisu Migrasaun, Superintendente Asistente Polísia, Luis Soares Barreto, hateten, sidadaun estranjeiru na’in-rua ne’e kaptura iha área Hudi-laran, Bairru Pite,  Díli.

Nia dehan, sidadaun na’in-rua ne’e servisu loke rasik ajénsia ida no durante ne’e halo ona falsifikasaun bá dokumentu ofisiál nasaun nian ho sira-nia karimbu rasik hodi halo vistu servisu no paresér legál sira.

“Sidadaun na’in-rua ne’e rekoñese sira-nia aktu no ita lori mai kedas sede sentrál Migrasaun hodi foti identidade no ita entrega ona ba Komandu Munisípiu Díli hodi halo detensaun,” Luis Berreto informa.

Advertisement

Evidénsia ne’ebé rekolla maka karimbu 113, kompostu hosi karimbu kompañia 86, karimbu diretór sira 21, karimbu Ospitál Nasionál Guido Valadares 1, no restante husi sira-nia ajénsia.

Migrasaun rekolla mós evidénsia hirak ne’ebé iha no dokumentu balu, hanesan pasaporte, no Komputadór desktop hamutuk 5, laptop 1 no evidénsia sira ne’e entrega ona bá Ministériu Públiku.

Jornalista : Carmelita Isaac

Advertisement