Hatutan.com, (18 Jullu 2022), Díli-Ministru Finansa (MF), Rui Augusto Gomes, kompromete  sei selu hotu dívida sira ne’ebé mak durante Governu deve hela hosi operadór  telekomunikasaun Timor-Telecom (TT).

Lee Mós : Governu Deve Timor Telecom Millaun $5

Ministru Finansa (MF), Rui Augusto Gomes. Foto/Hatutan.com

“Ami sei haree, dívida sira ne’e mai hosi liña ministériu  oioin, sira ne’e rezolve. Ita tenta atu rezolve dívida. Ha’u rasik la gosta dívida, ita tenke selu,” Ministru Finansa (MF), Rui Augusto Gomes, promete bá jornalista sira, hafoin aprezentasaun dokumentu importante balu bá Primeiru-Ministru (PM), Taur Matan Ruak, molok submete bá reuniaun Konsellu Ministru estraordináriu iha Palásiu Governu, Díli, Segunda (18/07/2022).

Rui Agosto Gomes afirma, dívida ne’ebé mak Governu iha hela ho empreza privadu sira iha rai-laran no li’ur, hakarak ka lakohi, tenke selu hotu, atu nune’e labele sai fali maupagadór.

“Klaru, dívida tenke selu. Ita labele sai maupagadór ka lae,” Ministru Rui Gomes, hatete tán.

Dívida ka tusan sira ne’e, hahú kedan Governasaun sira iha primeiru mai to’o ohin loron, seidauk selu hotu, maske tusan balu molok ne’e Governu sira anterior selu daudaun.

Iha Kuarta (13/07/2022), diretór Jurídiku TT, Manuel Cárceres hateten, dívida ne’ebé mak Governu seidauk selu to’o ohin loron hamutuk millaun $5, hahú kedan hosi Primeiru Governu mai to’o ohin loron, la’ós VIII Governu de’it, hosi kedan Primeiru Governu mai, selu uitoan-uitoan, hein katak laran luak hosi Primeiru-Ministru Taur Matan Ruak nian bele rezolve ona.

Uluk, dívida ne’ebé Governu iha ho TT besik millaun $10, agora sira selu ona millaun $5, iha eis Primeiru-Ministru, Kay Rala Xanana Gusmão ho Rui Araújo nia tempu.

Lee Mós : MF Responsabiliza TT Nia Dívida Millaun $5 iha Governu

Jornalista: Rogério Pereira Cárceres