Hatutan.com, (19 Jullu 2022), Díli—Governu Timor-Leste (TL) ho ajénsia governamentál amerikana Millennium Challenge Corporation (MCC), asina akordu kooperasaun ba programa ida ne’ebé sei implementa durante tinan lima, ho montante totál millaun $484.

Akordu kompaktu ho MCC asinadu hosi Ministru Prezidénsia Konsellu Ministrus (MPKM), Fidelis Magalhães no Vise-Prezidente MCC nian, Cameron Alford, iha serimónia ne’ebé hala’o iha Ministériu Negósius Estranjeiru no Kooperasaun (MNEK), 19 jullu 2022. Foto/MPKM.

Programa ida-ne’e ho objetivu prinsipál atu ajuda halo redusaun ba ki’ak liuhusi kreximentu ekonómiku iha Timor Leste.

Lee Mós: EUA Tau Millaun $420 Apoia Programa Edukasaun, Bee-Moos ho Saneamentu

Akordu kompaktu ho MCC ne’e asina hosi Ministru Prezidénsia Konsellu Ministrus (MPKM), Fidelis Magalhães no Vise-Prezidente MCC nian, Cameron Alford, iha serimónia ida ne’ebé hala’o iha Ministériu Negósius Estranjeiru no Kooperasaun (MNEK), 19 jullu 2022.

Advertisement

“Investimentu ne’e sei haree ba projetu prinsipál rua, ida atu hadi’a sistema bee, saneamentu no drainajen no ida seluk iha área edukasaun no formasaun nian,” Hatutan.com sita komunikadu.

Ida uluk inklui tratamentu ba bee, ezgotu, sistema drainajen, reforsu ba instituisaun no entidade reguladór sira, no kriasaun abastesimentu sólidu ida ba bee no ezgotu ba uzu doméstiku.

Ida tuir-mai sei inklui Sentru Exelénsia Foun ida ba formasaun profesór foun sira ne’ebé sei garante padraun kualidade no lideransa nian.

Hosi totál ne’ebé kalkula ona hamutuk millaun $484, millaun $420 sei disponibiliza hosi MCC no Governu Timor-Leste sei kontribui ho millaun $64.

Valór ne’ebé sei disponibiliza hosi Timor-Leste sei aloka de’it ba projetu tratamentu bee, ezgotu no drainajen nian, hosi osan sira-ne’e millaun $34 sei uza hodi halo ligasaun ba uma sira no hodi dezativa fosa ne’ebé iha.

Advertisement

Restu, millaun $30 sei utiliza hodi apoia instalasaun sistema konvensionál no ba instalasaun bomba bee nian.

Konsellu Administrasaun MCC nian iha fulan-dezembru tinan 2017, hili ona Timor-Leste, nu’udár nasaun ne’ebé kumpre rekizitu hodi implementa programa ida ne’e ba promosaun kreximentu ekonómiku, ne’ebé aliña ho prioridade sira dezenvolvimentu nasionál nian.

Iha loron 21 fulan-jullu tinan 2018, Ministru Fidelis Magalhães no Vise-Prezidente Adjuntu MCC nian, Jonathan Brooks, asina ona akordu finansiamentu inisiál ida, ho valór rihun $750 hodi kria ekipa ida, ne’ebé integra iha programa Millennium Challenge Compact, ho misaun atu identifika setór ekonómiku sira ne’ebé sei dezenvolve durante implementasaun programa ne’e nian.

Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) nian ida-ne’e, ofisiálmente kria ona iha loron 25 fulan-marsu tinan 2019 no lidera husi Embaixadór Constâncio Pinto.

Hosi loron 11 to’o 17 fulan-abríl tinan 2022, Ministru Fidelis Magalhães lidera delegasaun altu nivel ida, ne’ebé kompostu husi reprezentante 14 entidade governamentál oioin, halo viajen ba Washington, iha Estadus Unidus Amérika (EUA), hodi halo negosiasaun akordu kompaktu ho MCC.

Advertisement

Serimónia asinatura ne’e marka prezensa hosi membru Governu Konstitusionál VIII, Parlamentu Nasionál, Autoridade Munisipál, lider komunitáriu, reprezentante hosi organizasaun públika sira, sosiedade sivíl no setór privadu, korpu diplomátiku no parseiru sira dezenvolvimentu nian.

Jornalista: Rogério Pereira Cárceres