Hatutan.com, (19 Jullu 2022), Jakarta—Delegasaun Prezidente Repúblika (PR), José Ramos-Horta ne’ebé hala’o vizita traballu ba Indonézia, na’in-rua konfirmadu pozitivu SARS-Covid-19, hafoin hala’o teste suap iha otél Indonésia KEMPINSKI.

Delegasaun Prezidente Repúblika iha areoportu internasional I Gusty Ngurah Rai Bali. Foto/Média PR.

Delegesaun Prezidente Repúblika, José Ramos-Horta ho totál ema na’in 25 kompostu hosi, Xefe Kaza Sivíl, Xefe Kaza Militár, Ministru na’in-ha’at, Deputadu hosi kada Bankada Parlamentár, seitór privadu inklui jornalista hosi média estatal no privadu balun.

Lee Mós:PN Autoriza Ramos-Horta Vizita Estadu Bá Indonézia

Na’in-rua ne’ebé pozitivu Covid-19 maka Ministru Turizmu Kom’ersiu no Idústria, José Lucas do Carmo da Silva no Xefe Kaza Militár, Renilide Guterres Corte Real.

Tuir regra Estadu Indonézia nian, sidadaun hirak ne’ebé atu asesu ba iha Palásiu Prezidensiál (Istana Negara) hodi hasoru-malu ho Prezidente Repúblika Indonézia, Joko Widodo tenki submete ba Rapid Teste.

Bazeia ba regulamentu ne’e, delegasaun PR José Ramos-Horta ne’ebé to’o iha otél Indonézia KEMPINSKI kuaze 22:00 oras Jakarta molok deskansa tenke submete ba teste PCR.

Hafoin teste, delegasaun ne’ebé akompaña PR ba deskansa hodi hein ajenda PR nian tuir-mai hodi halo vizita ba istana President Bogor.

Tuir ajenda, Ministru Turizmu Komérsiu Indústria sei selebra akordu ho Ministru Turizmo Indonézia ho sasin hosi Xefe Estadu na’in-rua.

Maski labele partisipa, selebrasaun akordu kontinua la’o, reprezenta hosi Ministra Negósiu Estrangeiru no Kooperasaun Adalzija Magno.

Atu fó-hanoin katak, PR Horta ho delegasaun sai hosi aereoportu internasionál Nicolau Lobato Komoro-Dili ho aviaun Citilink iha tuku 13:40 OTL. Lori oras ida resin viajen Dili-Bali no delegasaun PR nian to’o iha areoportu internasional  I Gusty Ngurah Rai Bali iha oras 14: 37, oras Bali.

Iha Bali, PR Horta ho delegasaun simu direta hosi Konsuladu Jerál Timor Leste iha Bali, Aleixo da Silva, nune’e Xefe  Estadu kontinua kedan sa’e karreta DK 1789 ba deskansa iha otél Patra Bali. PR Horta ho delegasaun deskansa iha Bali durante oras lima nia laran.

Hafoin ne’e, iha tuku 19:50 resin,  oras Bali, PR ho delegasaun sa’e fali aviaun Citilink semo ba Jakarta no to’o iha Bandara Internasionál  Soekarno Hatta Jakarta tuku 21:10, oras Jakarta, delegasaun dezloka kedan ba deskansa iha otél Indonézia KEMPINSKI.

Ekipa ne’ebé akompaña Xefe Estadu mak hanesan Xefe Kaza Sivil, Xefe Kaza Militár, hosi parte Governu nian mak Ministru Transporte no Komunikasaun José Agustinho no Ministru Turizmu Komérsiu Indústria José Lucas do Carmo. Reprezentante Bankada Parlamentár kompostu Deputadu Mariano Assanami Sabino hosi Bankada PD, Deputada Olinda Guterres hosi Bankada KHUNTO,  Deputada Domingas Barreto husi Bankada PLP, Deputada Nélia Menezes hosi Bankada FRETILIN no  Deputadu Patrocino Fernandes hosi Bankada CNRT. Prezidente Konsellu Imprensa Virgilio Guterres ho ekipa. Prezidente CCI-TL Oscar Lima ho emprezáriu nasionál  balun.

Jornalista: Vito Salvadór