Hatutan.com (21 Jullu 2022) Díli—Tribunál Distritál Díli (TDD) liu hosi alegasaun Ministériu Públiku (MP) ne’ebe reprezenta hosi Prokuradór Hipolito Santa, husu ba Tribunál atu aplika pena tuir konviksaun TDD nian, ba arguidu MSB ba krime arma branka, tanba lori samurai no katana movimentu iha estrada.

Samurai, Foto ilustrasaun Google.

MP nia pedidu ne’e bazeia ba konviksaun arguidu nian ne’ebé rekoñese katak, nia kaer katana ho samurai hafoin ema balun ba dere odamatan hodi bolu fali arguidu nia feen nia naran, tanba ne’e arguidu kaer katana no samurai lori sai ba liur, maibé derrepenti de’it polisia to’o iha fatin hodi tula arguidu ba sela detensaun.

Parte defeza ne’ebé reprezenta hosi Sérgio Quintas husu ba Tribunál atu aplika pena suspensaun ba arguidu, hodi konsidera sirkunstánsia ne’ebé iha liu-liu arguidu koopera ho justisa hodi konfesa faktus ne’ebé iha, maski momentu ne’ebá arguidu ho kondisaun lanu.

Tanba antes ne’e sasin Aniceto Tavares nu’udár membru Polisia ne’ebé iha tempu ne’ebá halo patrullamentu hodi detein arguidu esklarese katak, momentu ne’ebá simu informasaun hosi komunidade katak, arguidu ho kondisaun lanu hodi kaer samurai no katana iha estrada no halo tauk komunidade.

Advertisement

Hafoin alegasaun, juiz prezide adi’a hikas julgamentu ba loron seluk hodi rona leitura sentensa.

Audiénsia julgamentu prezide hosi juiz kolektivu Ana Paula, Maria Solana, Ivan Suritay, MP reprezenta hosi Prokuradór Hipolito Santa no arguidu hetan asisténsia legál hosi Defensór Públiku (DP) Sérgio Quintas.

Jornalista: Carmelita Isaac

Advertisement