Hatutan.com, (21 Jullu 2022), Díli—Instituto de Defeza Nacional (IDN), ofisialmente lansa kursu ida ho nível Mestradu kona-bá Seguransa ba Dezenvolivmentu Nasionál no Sustenável (SDNS).

Instituto de Defeza Nacional (IDN), ofisialmente lansa kursu ida ho nível Mestradu kona-bá Seguransa ba Dezenvolivmentu Nasionál no Sustenável (SDNS), iha Salaun Ministériu Defeza no Kuartél Jenerál, Fatuhada, Díli, Kinta (21/07/2022).

Lansametu ne’e, haree liu ba prevensaun krize no konflitu sira liuhosi eventu konferénsia internasionál ho tema “Uso da força e ameaça nas relações internacionais,” iha Salaun Ministériu Defeza no Kuartél Jenerál, Fatuhada, Díli, Kinta (21/07/2022).

Lee Mós: Xefe Estadu Maiór Pedro Klamar Fuik Mantein Diretór IDN

Diretór Akademia IDN, Guilherme Soares hateten, kursu nível Mestradu (S2) ida-ne’e, tama iha planu estratéjiku IDN tinan-lima kotuk, no faze implementasaun foin hahú iha tinan 2022.

Advertisement

Liuhosi kursu Mestradu ida-ne’e, bele fó oportunidade ba alunu sira ne’ebé finaliza ona kursu Pós Graduasaun ba edisaun dala-lima ne’ebé ho valór di’ak tebes, hahú kedan hosi 2017 to’o ohin loron.  

Kursu ida-ne’e, la’ós loke espesifikamente ba militár sira, maibé loke mós ba públiku atu bele asesu.

Daudaun ne’e iha kandidatu na’in 72 mak rejista no tuir ona teste entrevista, maibé sei hein rezultadu hosi ekipa panelista sira.

“Objetivu hosi kursu mestradu ne’e, atu hasa’e alunu sira nia koñesimentu, hodi kontribui ba koñesimentu sientífiku, ba temas sentrais seguransa no dezenvolvimentu nasionais no sustentável,” Guilherme Soares hateten.

Tanba ne’e, kursu ne’e sei iha abordázen sistemátiku, estimula iha konseitu sientífiku krítiku no mós fundamentu hosi konferénsia internasionál mensiona, liga ba mudansa klimátika ne’ebé mak kontribui mós ba seguransa no defeza nasionál.

Advertisement

Durante ezisténsia iha 2012 to’o ohin loron, IDN realiza ona kursu ne’e ba dala-lima ho tipu Curso da Promoção Oficial Superior (CPOS-Sigla Português), Curso Estado Maior Conjunta e Integrado (CEMCI), no Curso Pos-Graduação em Estudo Estratégico e Resiliência Nacional (PGEERN), ba Polisia Nasionál Timor-Leste (PNTL) ho FALINTIL Forsa Defeza Timor-Leste (F-FDTL).

Kona-bá Curso de Formação Avansada Governansa e Liderança Estratéjica (CFAGLE), oferese ba kargu xefia sira mak hanesan diretór no diretora jerál iha liña ministériu sira ne’ebé mak durante ne’e hala’o kna’ar nu’udár tékniku profesionál.

Nune’e mós fasilita ona kursu kona-bá Defeza ho Seguransa ba autoridade lokál sira, no juventude jerasaun patrióta sira, inklui kursu empreendedorízmu ba setór privádu sira.

Kursu nível Mestradu no konferénsia internasionál ne’e loke direta hosi Ministru Defeza (MD), Filomeno da Paixão de Jesus no diretór IDN, atuál Xefe Estadu Maior ba Forsa Armada, Comodoro “Cmd” Donaciano da Costa Gomes “Pedro Klamar Fuik”.

Jornalista: Rogério Pereira Cárceres

Advertisement