Hatutan.com, (21 Jullu 2022), Díli—Komandu FALINTIL Forsa Defeza Timor-Leste (F-FDTL), liuhosi Komisaun Rekrutamentu, fós sai ona katak, rekrutamentu militár foun laiha rekomendasaun espesiál hosi kualkér sidadaun tanba kritéria mak manda.

Portavós Komisaun Rekrutamentu F-FDTL, Kapitaun Enjeñeria, José António Nunes da Costa ho ekipa hala’o konferénsia imprensa iha Kuartél Jenerál Fatuhada, Díli, Kinta (21/07/2022).

Tanba ne’e, Portavós F-FDTL, Kapitaun Enjeñeria, José António Nunes da Costa husu ba familia no inan-aman sira atu lalika lakon tempu hodi buka dalan atu enkosta ema ruma, hodi rekomenda oan tama iha vida militár, liu-liu iha prosesu rekrutamentu tinan 2022.

Lee Mós:Governu Aloka Ona Osan ba Rekrutamentu F-FDTL 600 iha 2022

“La haree ba kór, la haree ba família ka rekomendasaun espesial. Ne’e la eziste. Atu rekomenda hosi sé sé de’it, sei tau hamutuk iha fatin ida no sei taes tuir kritériu ne’ebé mak vigora ona,” José António Nunes da Costa hateten liuhosi konferénsia imprensa iha Kuartél Jenerál Fatuhada, Díli, Kinta (21/07/2022).

Advertisement

Portavós F-FDTL ne’e afirma, rekrutamentu ida-ne’e, loke ba timoroan hotu, feto ka mane no iha prosesu sira selesaun ne’e nian, kritéria mak manda.

Rekrutamentu ida-ne’e maioria ba postu soldadu prontu ninian. Tanba-ne’e, husu liu-liu ba ba entidade sira hotu-hotu, atu ajuda instituisaun F-FDTL, hala’o no hametin sistema ka norma no regulamentu relevate sira ne’ebé Estadu kria ona ba nasaun nia di’ak.

Publikasaun ba rekrutamentu foun 2022 bazeia ba desizaun hosi reuniaun Konsellu Ministru nian, ne’ebé mak aprova tiha ona planu rekrutamentu 2022 ba F-FDTL hamutuk ema na’in atus-neen (600).

Kritéria espesiál ba rekrutamentu ida-ne’e maka, aplikante sira tenke ho idade ka tinan entre 18 to’o 25. Altura (aas) ba mane 165 cm, feto ho altura 158.

“Aptidaun fízika, aplikante tenke ih aptidaun fízika natón. Aplikante labele iha moras todan hanesan, HIV-SIDA, TBC, Hepatitis no seluk tán ne’ebé mak bele afeta ba saúde, iha prosesu rekrutamentu nia laran no aplikantes tenke sidadaun orijinál TL,” Komandante ne’e esplika.

Advertisement

Iha mós kritériu ne’ebé atu halo eliminasaun ba aplikante sira, bainhira la prienxe kritériu sira jerál no espesiál nian.  Aplikante ne’ebé la pasa ezame médika, sei elimina kedan no sei la tuir tán teste sira seluk.

La’ós ne’e de’it, aplikante sira ne’ebé la pasa iha teste fíziku, psikoteste, entrevista no eskrita, la’ós sidadaun orijinál hosi TL, laiha lealidade no sinseriedade, komete ona krime sira públiku nian ka sívil, nomós razaun sira ne’ebé justifika hosi komisaun rekrutamentu ne’ebé la prevee iha kritériu sira ne’e.

“Avizu ba inan ka aman, maun no alin, ferik no katuas, no señor no señoras, autoridade sira katak, rekrutamentu ida ne’e, rekrutamentu voluntáriu ba sidadaun timoroan sé-sé de’it bele konkore tuir kritérius ne’ebé iha. Signifika katak, nia liu karik, nia mai servisu durante 18 mézes, tuir rejíme voluntáriu ne’ebé iha,” nia hateten.

Bainhira nia pasa iha rejíme voluntáriu ne’e, maka komandu F-FDTL sei halo rejíme kontratadu ba nia ba tinan rua-rua, durante tinan hitu (7). Depois sei konkore ba teste kuadru permanente, karik nia pasa.

“Bainhira sai nu’udár kuadru permanente ona, mak foin bele konkorre ba eskola fomál, pur eskrita milítar, depende ba avaliasaun dezempeñu, atu haree oinsá sira nia progresaun de karreira ba futuru. Ne’e signifika, presiza tempu no pasiénsia. Ne’e la’ós fásil, tanba ne’e husu ba ita-boot sira katak, karik la’ós objetivu ida-ne’e, di’ak liu lalika gasta tempu. Buka dalan korta ka fásil iha vida militár nian,” Portavós ne’e hateten.

Advertisement

Tuir lista ne’ebé foin lalais anunsia hosi komisaun rekrutamentu hodi taka mós iha Administrasaun Munisípiu, Postu Administrativu no Suku sira hamutuk 1.411, kompostu hosi mane 1.262 no feto 149.

Aplikante sira-ne’e mak sei tuir tán teste fízika no médika iha Centro de Formação e Treino (CFT), Metinaro, Díli.

Tuir oráriu, iha domingu (24/07/2022), aplikante sira sei aprezenta an ba ekipa komisaun rekrutamentu hodi halo konfirmasaun ba dokumentu sira.

Jornalista: Rogério Pereira Cárceres   

Advertisement