Hatutan.com, (25 Jullu 2022), Díli—Tribunál Distritál Díli (TDD), iha Segunda 25 fulan ne’e liu hosi primeiru interrogatóriu ne’ebé prezide hosi juiza singulár Ana Paula Fonseca deside aplika medida koasaun Termu Identidade Rezidénsia (TIR) ba eis vise-prezidente partidu FRENTI MUDANÇA (P-FM), Egídio de Jesus, tanba deskonfia prátika krime furtu agravadu no dezobidiensia relasiona ho fundu subvensaun partidu nian.

Família sira tanis hakuak eis vise-prezidente partidu FRENTI MUDANÇA (P-FM), Egídio de Jesus, bainhira PNSIK halo detensaun iha nia rezidénsia iha Taibesi, Díli, Sabádu (23/07/2022). Foto/Espesiál

Razaun Tribunál aplika medida koasaun ne’e, tanba faktus provadu katak arguidu utiliza duni patrimóniu partidu nian.

Lee Mós: Detensaun Bá Egídio de Jesus Bele Afeta FRENTI MUDANÇA iha 2023

Parte Advogadu privadu Martinho Soares aseita ho medida koasaun ne’e, tanba adekuadu ho arguidu nia aktu ne’e, maibé tuir advogadu nia intendimentu katak, arguidu la halo violasaun ba estatutu partidu tanba estatutu permite arguidu atu utiliza patrimóniu partidu nian.

“Alegasaun hosi MP provadu ho sentidu rua, katak, primeiru provadu tanba uza patrimóniu partidu nian tanba iha direitu atu uza. Segundu, provadu tanba laiha direitu maibé medida koasaun iha primeiru interrogatóriu ne’e Tribunál aplika TIR tanba hosi MP sei kontinua halo investigasaun,” Advogadu Martinho Soares hateten ba jornalista sira hafoin desizaun iha TDD, Segunda (25/07/2022).

Iha primeiru interrogatóriu ne’e Ministériu Públiku (MP) ne’ebé reprezenta hosi Prokuradór Nelson Carvalho, akuza arguidu ba prátika krime furtu agravadu no dezobidiénsia ne’ebé previstu iha artigu 252 no 244 hosi kódigu penál TL.

Antes ne’e, iha loron Sábadu, Polísia Nasionál Servisu Investigasaun Kriminál (PNSIK), kumpre mandadu detensaun hosi Tribunál Distritál Díli (TDD) hodi detein eis vise-prezidente partidu FRENTI MUDANÇA (P-FM), Egídio de Jesus iha nia rezidénsia iha Taibesi, Díli, tanba deskonfia prátika krime furtu agravadu no dezobidiénsia relasiona ho fundu subvensaun partidu nian.  

P-FM rasik iha osan subvensaun hosi Estadu purvolta $90.000-resin, maibé osan ne’ebé durante ne’e balun deskonfia  iha má-gastu liu $52,600.

Nune’e, kuadru potensiál sira iha P-FM laran halo keixa kontra malu hodi obriga eis Embaixadór Timor-Leste bá Kuba, Egídio de Jesus nia responsabilidade bá gastu ne’ebé la pertense bá partidu nia interese ka partidu nia programa.

Audiénsia julgamentu ba primeiru interrogatóriu ne’e, prezide hosi juiza singular Ana Paula Fonseca, MP reprezenta hosi Prokuradór Nelson Carvalho no arguidu hetan asisténsia hosi Advogadu Privadu Martinho Soares.

Jornalista: Carmelita Isaac