Hatutan.com, (27 Jullu 2022), Díli—Governu liuhosi reuniaun Konsellu Ministru (KM), aprova ona projetu rezolusaun Governu, hodi estabelese ‘orsamentu’  ho valór másimu ba vítima sira ne’ebé afetadu hosi projetu expansaun Aeroportu Internasionál Nicolau Lobato, Comoro, Díli.

Projetu rezolusaun Governu ne’e aprezenta hosi Ministru Finansas (MF), Rui Augosto Gomes, ne’ebé estabelese valór másimu atu selu ba akizisaun bens imóveis (uma sira) nian tanba lakon edifísiu, benfeitória, área sira Floresta no toos nian, no tanba tenke hapara atividade sira hanesan pekuária, peskas no foti masin iha área implementasaun projetu rekualifikasaun Aeroportu Internasionál Prezidente Nicolau Lobato nian.

Lee Mós:Governu Buka Solusaun ba Problema Inundasaun iha Aeroportu

Ministru Prezidénsia Konsellu Ministru (MPKM), Fidelis Manuel Leite Magalhães hateten, projetu re-kualifikasaun ba aeroportu ne’e, oras ne’e la’o hela  iha faze ida ne’ebé mak sei loke tán kondisaun aeroportu ne’e nian.

“Faze primeiru ita sei loke tán metru atus hira ba tasi ibun no mai rai maran no ne’e sei kontinua nafatin sei dada tán ba tasi laran. Faze dahuluk sei aumenta halo nia pista ne’e naruk to’o 2.100. Aban-bainrua sei kontinua tama tán ba tasi metru atus hira resin atu bele to’o 2500 metru,” Fidelis hateten iha Palásiu Governu Dili, Kuarta (27/07/2022).

La’ós ne’e de’it, maibé iha projetu ne’e mós sei loke hotu parte ninin sira aeroportu nian tanba nia pista ka landasan ne’e sei aumenta no área seguru nian mós sei halo luan tán.

Entaun, projetu ida-ne’e sei afeta tebes ba populasaun hirak ne’ebé mak hela iha área Betó, Suku Madohi.

“Desizaun hirak ne’e sei fó impaktu ba sira ne’ebé mak besik iha área BTN nian, sei afeta hotu tanba ita hakarak atu halo projetu ne’e lalais no projetu ne’e sei aumenta ninia pista halo luan tán no hadi’a ninia terminál sira privádu, tau instalasoins sira modernu nian ba iha seguransa aeroportu nian rasik inklui torre sira,” nia hateten.

Projetu rekualifikasaun ba Aeroportu ne’e konsidera hanesan projetu boot ida no bainhira governu avansa ona ho inisiativa hirak ne’e, katak TL tama ona faze dahuluk nian no espera katak iha future sei hadi’a di’ak liután aeroportu ne’e.

Jornalista: Rogério Pereira Cárceres