Hatutan.com, (28 Jullu 2022), Díli- Prezidente Parlamentu Nasionál (PPN), Aniceto Guterres, afirma Parlamentu Nasionál (PN) fó apoiu tomak bá esforsu Xefe Estadu nian hodi rekonsilia timoroan sira iha Timor Osidentál ho timoroan sira iha Timor-Leste tuir dokumentu Fraternidade Umana ne’ebé Timor Leste rasik adopta.

Lee Mós : Ramos-Horta Klarifika Konseitu Fraternidade Umana iha Kontestu Timoroan Sira iha Timor Osidentál

Prezidente Parlamentu Nasionál (PPN), Aniceto Guterres. Foto/Hatutan.com

Prezidente Parlamentu Nasionál (PPN), Aniceto Guterres,  bá jornalista sira hateten, dokumentu Fraternidade Umana ne’e nu’udár dokumentu ida universál tanba dokumentu ne’e nu’udár produtu no mensajen konjunta husi Papa Francisco no Gran Imam husi Meskita Al-Azhar, Kairu, kona-bá fraternidade oinsá atu umanidade bele hametin pás no estabilidade hodi rekonsilia malu no moris hamutuk nu’udár maun-alin.

Dokumentu Fraternidade Umana ne’e Timor-Leste mak sai primeiru nasaun iha mundu adopta Dokumentu Fraternidade Umana sai referénsia nasionál liu husi rezolusaun Parlamentu Nasioná.

Advertisement

“Tamba ne’e PN laiha objesaun bá esforsu Xefe Estadu nian atu hametin hikas fraternidade timoroan sira ne’ebé oras ne’e hela iha Timor Osidentál ho timoroan sira iha Timor Leste. Hanesan Timoroan mós ita iha mós problema sira hanesan ne’e, ita tenke trata malu tuir baze iha dokumentu fraternidade umana ne’e rasik, tanba nia mak sai hanesan referénsia hodi rezolve ita nia situasaun pás, estabilidade, no rekonsiliasaun entre Timoroan sira,” Aniceto Guterres  haktuir hafoin hasoru malu ho Prezidente Repúblika (PR), José Ramos-Horta iha Palásiu Prezidensiál.

Lee Mós : Eurico Guterres ho Nia Grupu Prontu Kontribui bá Konseitu Fraternidade Umana

Prezidente Repúblika José Ramos Horta fó hanoin mós karik Parlamentu Nasionál nia vizita bá DPR Indonézia bele diskute mós kona-bá Dokumentu Fraternidade Umana tanba to’o oras ne’e Dewan Perwakilan Rakyat (DPR) Indonézia seidauk trata dokumentu fraternidade umana ne’e hanesan Parlamentu Nasionál Timor-Leste trata hodi adopta hanesan dokumentu nasionál ida.

Dokumentu fraternidade umana mós bele sai hanesan referénsia atu oinsá sosiedade bele resolve nia problema hodi rekonsilia malu no estabelese pás iha sosiedade tomak.

“Parlamentu Nasionál apoiu esforsu ne’ebé Xefe Estadu halo hodi rekonsilia Timoroan sira tuir esforsu ne’ebé oras ne’e daudaun iha tanba Parlamentu Nasionál rasik mak adopta dokumentu fraternidade umana ne’e,” Aniceto Guterres afirma tan.

Advertisement

PPN ne’e hatutan iha enkontru ida ohin alem de troka informasaun kona-ba situasaun estadu nian, parte Prezidente Repúblika hato’o informasaun kona-bá vizita bá Indonézia. Hanesan ema hotu akompaña Xefe Estadu nia vizita baáIndonézia la’o di’ak no vizita ne’e rasik la’o ho susesu.

Lee Mós : Dokumentu Fraternidade Umana Lori Horta Hasuru Lopes da Cruz ho Eurico Guterres

Embora rona liafuan balun husi deputadu sira ne’ebé kestiona kona-bá prosesu sira durante vizita iha Indonézia halo situasaun manas uitoan maibé buat hotu la’o ho di’ak. Enkuantu vizita ne’e jenerál hotu-hotu di’ak maibé ho situasaun no maneira sira balun halo ita sente hotu.

“Ha’u tenke mai husu deskulpa ba Xefe Estadu lori deputadu sira nia naran bá maneira ruma ne’ebé ita akompaña iha média loloos ladún di’ak,” Aniceto hateten.

Aproveita oportunidade ne’e, PPN informa mós ba Xefe Estadu akordu nivel Parlamentu Nasionál no DPR Indonézia ne’ebé iha ona konkordánsia dezde tinan kotuk atu halo vizita ba malu no tinan ne’e Parlamentu Nasionál mak sei ba vizita DPR Indonézia iha loron 22 to’o 23 fulan Agostu 2022.

Advertisement

Jornalista: Vito Salvadór