Hatutan.com, (27 Jullu 2022), Díli—Komisaun Nasionál Juventude Katólika Timor Leste (KNJK-TL), sei organiza jornada nasionál juventude Katólika Timor Leste nian ba tinan ne’e, sei hala’o iha Parókia Lolotoe, Dioseze Maliana.

Prezidente Ezekutivu KNJK-TL, Padre João Soares hamutuk ho estrutura atualiza programa jornada nasionál Juventude Katólika ba Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, kuarta (27/07/2022).

Prezidente Ezekutivu KNJK-TL, Padre João Soares hamutuk ho estrutura atualiza ona programa ne’e ba Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, kuarta (27/07/2022).

Lee Mós: Rezultadu Sínodu Episcoporum Arkedioseze Díli Sei Kontribui ba Mata-dalan Igreja Universál

Oras-ne’e kruz joven iha hela Parókia Lolotoe, Dioseze Maliana, tanba ne’e parte KNJK-TL aproveita oportunidade atu konvida Xefe Estadu hodi partisipa iha eventu relijiozu ida-ne’e atu bele fó mós mensajen Estadu nian ba foinsa’e sira liga ho sira nia papél no responsabilidade ba país ida-ne’e.

KNJK-TL konsidera joven mak aliserse no sai esperansa ba Uma-Kreda no nasaun tanba Igreja ho Estadu iha responsabilidade morál atu kontinua tulun foinsa’e sira la’o tuir sira nia dalan ho formasaun integradu iha parte intelektuál nune’e mós iha parte espirituál atu joven sai matenek kontribui ba pás no estabilidade nune’e dezenvolvimentu iha nasaun ne’e la’o ba oin tuir ema hotu nia interesse.

“Xefe Estadu konfirmadu katak sei partisipa iha jornada nasionál Juventude Katólika ninian iha Parókia Lolotoe ne’ebé sei hala’o iha loron lima nia laran husi 21-25 Agostu,” Padre João Soares hateten.

Iha jornada nasionál Juventude Katólika iha Lolotoe ne’e sei involve mós reprezentante Dioseze tolu, arte marsiál, difisiénsia, joven sira husi partidu politiku no mós estudante husi universidade hotu iha Timor laran.

Objetivu prinsipál husi jornada juventude Katólika ne’e maka hakarak foinsa’e sira hamutuk, koñese sira nia an no koñese ema seluk hanesan illas Maromak nian hodi respeita malu, iha domin no unidade ba moris hakmatek.

Atividade ne’ebé sei hala’o durante jornada juventude Katólika mak foinsa’e sira sei partilla ba malu esperiénsia real moris sira nian iha sosiedade no sei iha mós formasaun liu husi palestra sira no ida ne’ebé importante liu iha jornada ne’e sei fó oportunidade atu rona joven sira, sira sei ko’alia, hato’o sira nia opiniaun, hato’o kritika sira.

“Loron daruak sei lori joven sira ba halo asaun karidade, vizita komunidade fahe mós buat ruma ne’ebé tuir posibilidade ba iha komunidade sira ne’ebé presiza,” nia dehan.

Xefe Estadu iha sorumutu ho KNJK-TL fó opiniaun ne’ebé kontribui tebes ba atividade hirak ne’ebé sei implementa durante jornada joventude Katólika, iha disponibilidade ho ninia dispozisaun tomak ba atividade sira bele la’o ho di’ak.

“Xefe Estadu husu nafatin Igreja liu-liu komisaun juventude ho Diretór sira atu kolabora nafatin ho Xefe Estadu iha kualkér momentu ne’ebé Komisaun sira presiza ko’alia buat ruma liga ho asuntu juventude nian, Xefe Estadu prontu nafatin atu atende,” nia haktuir.

Aproveita oportunidade ne’e, parte KNJK-TL informa mós ba Xefe Estadu kona-bá jornada mundiál juventude Katólika nian ne’ebé sei hala’o iha Lisboa, Portugál iha fulan Agostu 2023.

Jornalista: Vito Salvadór