Hatutan.com, (29 Jullu 2022), Díli-Governu liuhosi Vise-Primeiru Ministru no Ministru bá Planu Ordenamentu, José Maris dos Reis, ho ekipa téknika sira, Sesta (29/07/2022), aprezenta  bá Primeiru-Ministru (PM), Taur Matan Ruak, kona-bá planu urbanizasaun bá sidade Dili nian, inklui Planu Nasionál Ordenamentu Territóriu (PNOT) Timor-Leste maibé seidauk konklui.

Lee Mós : PM Taur Hakarak Ministru Agrikultura Aselera Servisu iha Baze

Vise-Primeiru Ministru no Ministru bá Planu Ordenamentu, José Maris dos Reis. Foto/Hatutan.com

“Ohin, ha’u ho ekipa ha’u nian, hosi Ministériu Planu Ordenamentu mai aprezenta ba Primeiru-Ministru liu-liu kona-bá Planu Nasionál Ordenamentu do Territóriu (PNOT) Timor-Leste, no mós aprezenta planu urbanu Díli ne’ebé maka foin hahú iha fulan-Marsu nia laran. Entaun, hosi planu ne’e, iha parte balu de’it, seidauk hotu, tanba ne’e sei lori fulan hira tán para atu hotu,” Vise-Primeiru Ministru no Ministru bá Planu Ordenamentu, José Maris dos Reis, informa bá jornalista sira iha rezidénsia Estadu PM Taur Matan Ruak iha Faról, Díli.

Iha prosesu elaborasaun bá PNOT nian, ekipa sira Ministériu Planu no Ordenamentu nian, atinje ona 75%, no tuir estimasaun tékniku  iha fulan-Outubru ka fulan-Novembru 2022, sira bele lori ba aprezenta iha reuniaun Konsellu Kinistru, hodi halo aprovasaun.

“Ho aprovasaun ida ne’e maka, kaer nu’udár dekretu lei ida ne’ebé mak asegura bá iha ninia implementasaun iha futuru,” José Reis hateten.

José Reis esplika, planu nasionál ordenamentu ne’e, hanesan instrumentu ida ne’ebé maka sei orienta iha setór hotu-hotu atu halo dezenvolvimentu ida ne’ebé mak integradu liu, atu bele iha dezenvolvimentu ida ne’ebé sustentável.

Durante aprezentasaun planu ne’e, sira informa mós bá PM Taur Matan Ruak, kona-bá planu munisipál ordenamentu territóriu nian iha Munisipiu Ermera, Bobonaro, Baucau, Lautem ho Viqueque, ne’ebé mak konsultasaun konklui iha loron  26 fulan-Jullu 2022.

La’ós ne’e de’it, sira mós aprezenta kona-bá planu urbanu ba iha munisipiu Baucau, Ermera ho Bobonaro ne’ebé mak MPO halo hela preparasaun. Prosesu ne’e agora iha ona ADN (Ajénsia Dezenvolvimentu Nasionál), no sei lori ba iha CNA (Comissão Nacional de Aprovizionamento), tanba tenke liuhosi prosesu konkursu internasionál. Maibé, kona-bá Planu Estratéjiku Dezenvolvimentu nian, sei hela de’it Munisipiu Manatuto, Ataúro ho RAEOA  nian.

Hatán kona-bá planu urbanizasaun bá kapitál Dili nian ho modelu dezeñu ida oinsá, José Reis dehan, daudaun ne’e sira halo hela estudu no halo levantamentu, kaer bá dokumentu sira hosi JICA nian ne’ebé uluk la hotu no agora hahú ho kompañia ka firma ida ho naran LAPI, ne’ebé mak sai manán na’in bá iha planu urbanu Díli nian.

Iha elaborasaun bá planu urbana ne’e, parte MPO kria mós konsellu konsultivu ida, ne’ebé mak envolve ministériu lubun ida mak iha laran, hodi fó mós opiniaun, halo diskusaun, hodi nune’e oinsá mak bele hadi’a Díli sai di’ak liubá oin.

Planu urbanu iha Díli ne’e, atu hamosu no prodús instrumentu bá planeamentu nian, liu-liu oinsá mak atu fahe bá zona hira. Ezemplu, Zona komérsiu, zona abitasaun atu halo iha ne’ebé, estrada sira atu konstrui liuhosi ne’ebé.

Jornalista: Rogério Pereira Cárceres