Hatutan.com, (03 Agostu 2022), Díli-Iha tinan ne’e, Governu sei konstrui Uma Kbiit Laek (UKL) hamutuk 4.000 bá benefisiáriu sira iha territóriu Timor Leste ho orsamentu hamutuk millaun $71.

UKL iha Suku Fatubessi, Postu Administrativu Maubisse, Munisípiu Ainaro. Foto/Racom Maubisse Mauloko

Ministru Administrasaun Estatal (MAE), Miguel Pereira de Carvalho bá jornalista sira iha Palásiu Governu, Kuarta (03/08/2022), informa, benefisiáriu  bá UKL hamutuk 4.000 ne’e identifikadu hotu ona husi sekretariadu tékniku Programa Nasionál Dezenvolvimentu Suku (PNDS) no pedidu transferénsia bá orsamentu husi parte PNDS bá iha MAE halo ona no orsamentu bá konstrusaun UKL faze daruak ministériu transfere ona ba iha Suku sira  hodi hahú implementasaun.

Ministru Miguel Pereira de Carvalho afirma prosesu konstrusaun ba UKL iha territóriu nasionál hahú ona no tuir kalendáriu bá konstrusaun UKL sei halo iha fulan 3-4 nia laran, nune’e garante molok to’o tinan ne’e nia rohan,  konstrusaun sira bele finaliza no entrega bá benefisiáriu sira.

“Ita hateten katak UKL ne’e la’ós deit halo iha área urbana, maibé mós iha área rurais sira ne’e tamba ne’e dalaruma konstrusaun bá UKL sira ne’e sei hasoru mós difikuldade bá estrada, transporte no seluk tan. Maibé ami otimista katak too iha tinan ne’e nia rohan UKL 4.000 ne’e sei remata no entrega bá benefisiáriu sira,” Ministru Miguel Pereira de Carvalho hateten.

Governante ne’e hatutan baibain hanesan experiénsia ho UKL faze dahuluk nian, konstrusaun bá UKL ne’e hotu lalais tamba ne’e parte MAE ho ekipa tékniku sira iha terrenu liuliu PNDS sei esforsu atu molok tinan ne’e remata UKL ne’e bele hotu tamba iha faze daruak UKL sei kobre Suku hamutuk 424 no no kada suku iha balun hetan uma-sai (9) no balun hetan  uma-10 too uma-12. Medida uma depende ba kuantidade família, iha uma bá família ki’ik sira kuartu rua (2) no família boot sira kuartu  tolu (3).

Jornalista: Vito Salvadór