Hatutan.com, (01 Agostu 2022), Díli—Prezidente Repúblika (PR), José Ramos-Horta sei la taka dalan ba proposta hosi komunidade no sei halo pagamentu tuir kbiit orsamebtu ne’ebé Prezidénsia Repúblika iha, balun sei kanaliza ba ministériu relevante hodi apoiu komunidade tuir nesesidade ne’ebé komunidade sira presiza.

Proposta komunidade ne’ebé sira rasik lori ba tau hamutuk de’it iha rai portaun parte Leste, Palásiu Prezidensiál.

“Prezidente Repúblika laiha problema ho komunidade ne’ebé hatama proposta tanba iha tinan hirak nia laran ne’e, simu karta barak no buka esforsu rezolve mesmesak no balun la konsege ajuda,” José Ramos-Horta hateten iha edifísiu sentrál SAMES I.P, Kampung Alor,  Segunda (01/08/2022).

Lee Mós: Prezidénsia Repúblika Laiha Orientasaun Simu Proposta Bolsu Estudu no Apoiu Negósiu

Fontes orsamentu ba apoiu komunidade mai hosi Orsamentu Jerál Estadu (OJE) ne’ebé tau iha Prezidénsia Repúblika no hotu-hotu tenke hatene katak, Prezidente Repúblika la’ós Ministériu Sosilidaridade Sosiál no Inkluzaun (MSSI), Ministériu Obras Públikas (MOP), tanba ne’e iha buat balun ida-idak bele haree orsamentu hodi buka meius tulun komunidade sira tuir responsabilidade hanesan Xefe Estadu.

Advertisement

“Ha’u ko’alia tiha ona ho Primeiru Ministru katak apoiu hirak ne’e governu mak tenke halo, tanba iha orsamentu Prezidente Repúblika ne’ebé iha la’ós atu halo uma, ka bussines ruma maibé tuir Prezidente Repúblika haree Prezidente Repúblika sei bele tulun tuir kbiit orsamentu ne’ebé Prezidénsia Repúblika iha,” nia subliña.

Antes ne’e, Parte Kaza Sivíl fó-sai katak, Prezidénsia Repúblika simu ona proposta hosi komunidade hamutuk 6.000-resin.

Jornalista: Vito Salvadór

Advertisement