Hatutan.com, (04 Agostu 2022), Díli—Prezidente Repúblika (PR), José Ramos-Horta konsidera katak, povu no nasaun Timor Leste bele orgullu ho nia erói no mártir sira ne’ebé dedika no sakrifika sira nian an ba independénsia.

Serimónia haloot restu mortál iha jardin erói Luak, Manufahi, Kinta (04/08/2022). Foto/Média PR.

Estadu halo nia obrigasaun desde restaurasaun independénsia hahú kedan hanoin oinsá fó rekoñesimentu ba erói no mártire sira.

Lee Mós: Sobrevivente 66 ho Saudozu 17 Simu Rekoñesimentu Nu’udár Erói Nasionál

Xefe Estadu konsidera la fásil atu identifika erói no mártire ne’ebé fó ona sira-nia kontribuisaun ba luta ho justisa no rigor, nune’e prezensa Horta hamutuk ho konvidadu sira-iha jardin erói Luak ne’e atu sai testemuña ba serimónia funerál bá erói no mártir na’in-34 ne’ebé fakar ona sira-nia isin no ran ba luta ukun rasik an.

“Balun hetan família nia ruin ha’u bele hatete sorte, ha’u rasik ami-nia alin feto ida mate iha Lolotoe ne’ebá, sorte populasaun haree, sorte populasaun mak hakoi nia iha 18 Dezembru 1978 bombardamentu iha aldeia Anno iha 2003 ami ba foti hakoi fila-fali iha Santa Kruz,” Hatutan.com sita deklarasaun José Ramos-Horta iha serimónia haloot restu mortál iha jardin erói Luak,  Manufahi, Kinta (04/08/2022) iha komunikadu.

Ramos-Horta konata tuir katak, nia alin Guilherme Horta ne’ebé mate imbuskada iha Mápe no mós saudozu Nuno Horta ne’ebé hanesan Komandante FALINTIL Brigada Xoke to’o agora seidauk hetan sira-nia ruin.

Iha serimónia haloot Restu mortál saudozu na’in-34 ne’e, iha saudozu na’in-rua mak mártir deskoñesidu katak seidauk hatene tuir família.

Restu mortál sira ne’e haloot iha semitériu jardín erói no mártir pátria Manufahi, bazeia bá dekretu Prezidente Repúblika N.⁰ 62/2022 ne’ebé publika iha loron 2 fulan-Agostu.

Serimónia funerál ne’e hahú uluk ho missa Requem no tiru saltu, hafoin hatun ba kampa (kuak).

Jornalista: Vito Salvadór