Hatutan.com, (03 Agostu 2022), Díli—Ministru Finansas, Rui Gomes reprezenta Governu Timor-Leste ho Embaixadór Austrália iha Timor-Leste, Bill Costello, 𝗮𝗯𝗮𝗻 𝗱𝗮𝗱𝗲𝗲𝗿 𝗶𝗵𝗮 𝗔𝘂𝗱𝗶𝘁𝗼o𝗿𝗶𝘂 𝗠𝗶𝗻𝗶𝘀𝘁𝗲𝗿𝗶𝘂 𝗙𝗶𝗻𝗮𝗻𝘀𝗮, sei asina Akordu Subsidiáriu ho montante millaun $25 ba Programa Parseria ba Prosperidade Inkluzivu (PROSIVU) Faze Dahuluk ne’ebé sei implementa durante tinan haat to’o fulan-juñu 2026.

Ministru Finansas, Rui Augusto Gomes. Foto/MF.

Programa PROSIVU ho valór kontribuisaun millaun $25 sei ajuda Governu hodi konsentra iha área importante tolu mak hanesan, Reforma Administrasaun Públiku, Dezenvolvimentu Ekonómiku no Reforma Jestaun Finansas Públikas, ajenda reforma importante ida ne’ebé mak inísia ona desde tinan 2015 husi Sestu Governu no Oitavu Governu Konstitusionál komprometidu hodi kontinua implementa.

Lee Mós: Empréstimu Millaun $121 ba Fornesimentu Bee Moos iha Díli Sei Implementa iha Outubru

“Hafoin asinatura akordu ne’e, parte rua sei hala’o Diálogu anuál kona-bá Polítika Dezenvolvimentu entre país rua,” Hatutan.com sita komunikadu.

Diálogu ne’e hanesan plataforma ida ba parte rua atu diskute no hetan konkordánsia kona-bá prioridade dezenvolvimentu, identifika área importante sira ne’ebé mak presiza apoiu no reflete susesu no dezafiu sira ne’ebé durante ne’e servisu Parseria ne’e enfrenta.

Tópiku diskusaun inklui Governu nia Grandes Opções do Plano 2023, prioridade Reforma Jestaun Finansas Públikas no área sira estratéjiku ne’ebé presiza apoiu husi Austrália, nomós Austrália nia Apoiu Orsamentu Direta (Direct Budget Support) ba iha Konta Tezouru Timor-Leste nian.

Iha loron 22 fulan-juñu liubá, Konsellu Ministrus autoriza selebra Akordu Subsidiáriu entre Governu Timor-Leste no Governu Austrália ho valór millaun $25 no fó poder tomak ba Ministru Finansas, Rui Gomes hodi reprezenta Governu Timor-Leste, asina akordu refere.

Jornalista: Rogério Pereira Cárceres