Hatutan.com, (05 Agostu 2022), Díli—Atleta Xadres Timor Leste (TL) hatudu prestasaun pozitivu iha Olimpiade Xadrez Mundiál hafoin Ekipa Feto ultrapasa Nasaun 54 no Ekipa Mane ultrapasa Nasaun 15 iha Ronda Danen (VI).

Ekipa Xadres Feto Timor Leste Kompostu hosi Atleta Elfiana dos Santos, Maria do Ceu, Sonizia Tilman da Silva no Zulmira Americo Tilman hala’o jogu ho di’ak tebes tanba manán nasaun Mali no Nasaun Cameroon alende atleta balun manán no empata ho nasaun seluk.

Lee Mós: Teófilo Freitas Oferese Medalla Osan Mean Da-ruak ba TL

“Ho rezultadu sira iha ronda VI, lori ekipa feto Timor-Leste klasifikadu iha pozisaun 108 hosi totál nasaun 162 ne’ebé hola parte iha Olimpiade ne’e,” Hatutan.com sita komunikadu.

Ho klasifikasaun ne’e, signifika ekipa Feto Timor-Leste ultrapasa nasaun 54 ne’ebé Jogu Xadrez la’ós Modalidade Desportiva foun iha sira nia nasaun kompara ho Timor-Leste ne’ebé ninia federasaun foin ho idade Tinan ualu ba sia.

Ekipa Mane Timor-Leste ne’ebé kompostu hosi Tito dos Reis, Helder de Araújo, Cosme Guterres no Marcos da Conceição, hafoun jogu Ronda VI, klasifikadu iha pozisaun 173 hosi totál nasaun 188 ne’ebé kompete iha eventu mundiál ne’ebé baibain realiza kada tinan haat ne’e.

Ekipa Xadres Feto Timor Leste Kompostu hosi Atleta Elfiana dos Santos, Maria do Ceu, Sonizia Tilman da Silva no Zulmira Americo Tilman no Ekipa Mane Timor-Leste ne’ebé kompostu hosi Tito dos Reis, Helder de Araújo, Cosme Guterres no Marcos da Conceição. Foto/Federasaun Xadres.

Ho klasifikasaun ne’e mós hatudu katak, ekipa mane Timor-Leste ultrapasa ona nasaun 15 seluk mak hola parte mós iha eventu élitu ne’e.

Hafoin Ronda Daneen ne’ebé realiza iha loron 3 Agostu, atleta hotu-hotu hetan biban atu deskansa iha loron 4 Agostu, nune’e Ronda Da-hituk sei realiza iha Loron 5 Agostu 2022, tuku 15:00 pm oras Chennai-Índia.

Iha Ronda Da-hituk ekipa mane sei hasoru ekipa hosi nasaun Fiji no ekipa feto sei hasoru ekipa hosi nasaun Zimbabwe.

Jornalista: Vito Salvadór