Hatutan.com, (15 Agostu 2022), Díli—Tribunál Distritál Díli (TDD) iha Segunda 15 fulan ne’e, liu hosi juiz kolektivu Ivan Surytai, Ana Paula Fonseca no Maria Solana kontinua hala’o julgamentu ba krime omesídiu simples ne’ebé deskonfia involve arguidu na’in-rua JS ho JDCP, tanba oho ona vítima Hilário Vitalisio Soares iha Delta iha tinan 2021.

Ilustrasaun Omesidiu. Foto/Google.

Iha audiénsia juiz deside halo akariasaun tuir artigu 140 kódigu prosesu penál Timor Leste katak, bainhira arguidu sira nia deklarasaun la han malu no nega faktus ne’ebé iha akuzasaun laran, maka antes TDD foti desizaun presiza halo akariasaun ba arguidu na’in-rua hodi bele hatene involvimentu arguidu sira nian ba kazau refere.

Lee Mós:PNTL Buka-tuir Autór Oho António de Jesus iha Elemloi

Maski nune’e, rezultadu hosi akariasaun  ne’e arguidu JS mantein ho nia deklarasaun katak nia parte la involve iha omesídiu ne’e, tanba hafoin arguidu JDCP tuda vítima nia parte halai lakon.

Maibé, arguidu JDCP deklara katak sira na’in-rua mak involve iha omesídiu ne’e, tanba JS mak uza ai hodi baku mate vítima hafoin arguidu JDCP tuda uza fatuk no vítima la mate tanba ne’e arguidu JS uza ai hodi baku mate vítima.

Liu hosi akariasaun ne’e, MP ne’ebé reprezenta hosi Prokuradór José Elo mantein ho akuzasaun ne’ebé iha katak, iha loron 09 fulan Jullu tuku 23:00, arguidu na’in-rua haree vítima ho nia kolega ida la’o-sai hosi Bairru Has laran, nune’e arguidu sira helik an iha uma leet hodi haree vítima nia kolega la’o tama liu ba kos laran no vitima sei tur iha trotoar ninin.

Nune’e, arguidu JDCP lori fatuk bo’ot hodi ba besik vítima nia oin no tuda rabat dala ida iha vítima nia hasan karuk, hodi rezulta kanek no monu ba rai no kontinua lori fatuk tuda dala ida iha parte kanuruk.

Vítima seidauk mate arguidu JS mai hosi kotuk lori ai dona hodi baku dala ida iha vítima nia ulun no baku dala barak iha parte kanuruk no isin lolon.

Tanba ne’e, MP akuza arguidu na’in-rua ba prátika krime omesídiu simples ne’ebé previstu iha artigu 138 hosi kódigu penál TL.

Audiénsia julgamentu prezide hosi juiz kolektivu Ivan Surytai, Ana Paula Fonseca no Maria Solana, MP reprezenta hosi Prokuradór José Elo no arguidu na’in-rua hetan asisténsia legál hosi Defensór Públiku (DP) José da Costa no advogadu privadu Sérgio.

Jornalista: Carmelita Isaac