Hatutan.com, (17 Agostu 2022), Díli—Komisaun Organizadora ne’ebé kompostu hosi Komité 12 Novembru, hahú halo preparasaun ba dezlutu Erói Max Stahl ne’ebé sei hala’o iha 28 fulan Outubru.

Komisaun organizadora dezlutu Max Stahl, hasoru-malu ho Sekretáriu Estadu Juventude Desportu (SEJD), Abrão Saldaña iha Lecidere, Kuarta (17/08/2022).

Komisaun Organizadora hasoru-malu ona ho Sekretáriu Estadu Juventude Desportu (SEJD), hodi husu tulun oinsá bele hamutuk ho Komisaun Organizadora bele realiza eventu dezlutu saudozu Max Stahl nian no bensaun ba rate ne’ebé oras-ne’e sei halo hosi governu no atinji ona 95%.

Lee Mós: Komisaun Organizadora Propoin $25.000 ba Serimónia Dezlutu Saudozu Max Sthal

“Saudozu Max Stahl iha tinan ida ne’e nia loron ho fulan hanesan mós ho saudozu Sebastião Gomes. Tanba ne’e mak hasoru governu atu tau kalendáriu fiksu hodi kada tinan la’ós selebra de’it saudozu Sebastião Gomes ka Max Stahl, maibé rua ne’e selebra hamutuk,” Prezidente komisaun organizadora, Rogério Castro da Cruz hateten hafoin hasoru-malu ho Sekretáriu Estadu Juventude Desportu (SEJD), Abrão Saldaña iha Lecidere, Kuarta (17/08/2022).

Liu hosi sorumutu ne’e, SEJD iha pozisaun pozitivu tebes hodi apoiu no husu atu hola mós parte iha Komisaun organizadora hodi halo preparasaun ba dezlutu.

Iha fatin hanesan, Diretór Nasionál SEJD, Jacinto António Ximenes hateten SEJD simu ho di’ak ideia sira ne’ebé Komisaun Organizadora hato’o, hodi halo preparasaun ba seremónia dezlutu ne’e.

“SEJD mós prontu atu involve iha Komisaun organizadora,” Jacinto António Ximenes hateten.

SEJD sei hamutuk ho Komisaun organizadora sei servisu hamutuk hodi mobiliza rekursu hotu-hotu ba iha serimónia dezlutu Max Stahl nian no iha sorumutu ohin seidauk ko’alia detallu kona-bá totál orsamentu ne’ebé SEJD sei aloka tanba serimónia la’ós kabe ba ministériu ida, maibé iha interligasaun ho ministériu lubuk ida.

Antes ne’e Ministru Prezidénsia Konsellu Ministru, Fidelis Leite Magalhães simu ona ekipa ida hosi, Sentru Audiu Vizuál Max Sthal nian no hosi Komité 12 Novembru, maibé kanaliza ba iha Ministru Asuntu Kombatente Libertasaun Nasionál.

Jornalista: Vito Salvadór