Hatutan.com, (17 Agostu 2022), Díli—Hafoin rona tiha desizaun hosi Tribunál Distritál Dili (TDD) ne’ebé aplika medida koasaun Termu Identidade Rezidénsia (TIR) ba arguidu droga na’in-sia, halo Ministru Justisa Tiago Amaral Sarmento hakfodak tebes ho desizaun ne’e.

Tiago Amaral Sarmento hakfodak tanba tuir loloos, Ministériu Públiku (MP) ka Prokuradór Jerál Repúlika (PJR), uza Lei númeru 02/2017, hodi halo aplikasaun medida koasaun ba artguidu sira, tanba Lei ne’e hanesan Lei espesiál ida ko’alia kona-bá “ilísito de droga”.

Lee Mós: TDD Aplika TIR bá Arguidu sira Kazu Ilísitu bá Droga

Advertisement

“Ministru Justisa hakfodak, bainhira prokuradór sira uza fali artigu ida ne’ebé ninia pena la makas, tanba uga artigu 07 ezemplu, ne’ebá ne’e maka’as. Tanba iha artigu 07, hosi Lei númeru 02/2017, nia ko’alia momós iha ne’ebá, sé de’it mak uza droga, tuur de’it iha uma mak uza droga, ne’e mós ameasa ho pena tinan 2 até 10 ka 12,” Tiago Amaral Sarmento esplika hafoin surumutu Konsellu Ministru ordináriu, iha Palásiu Governu, Díli, Kuarta (17/09/2022).

Lei espesiál kona-bá droga ne’e, la’ós ona krime baibain, ho razaun ida ne’e mak governu TL, liuhosi Ministériu Justisa, aprezenta Lei espesiál ida kona-bá ne’e hodi ikus mai, deputadu sira iha Parlamentu Nasionál (PN) konsege halo aprovasaun.

Tiágo Amaral Sarmento konsidera Lei ne’e, iha forsa tebes atu halo atuasaun, investiga, prosesa no halo julgamentu ba autór ba kazu droga sira ne’ebé tenke tuir Lei espesiál ida-ne’e.

“Tanba ne’e, nu’udár ministériu ne’ebé uluk aprezenta Lei kona-bá droga nian iha Timor-Leste ba Parlamentu Nasionál, núfin PN aprova. Ami hakfodak teb-tebes ho akuzasaun ne’ebé ladún forte ba suspeitu sira. Nú fin, hetan TIR, maske prosesa nafatin, maibé, ladún fó atensaun ba Leis, normás ne’ebé mak aplika iha TL, lei espesiál,” Governante ne’e kestiona.

Jornalista: Rogério Pereira Cárceres

Advertisement