Hatutan.com, (17 Agostu 2022), Díli—Tribunál Distritál Díli (TDD) iha Kuarta 17 fulan ne’e, kontinua hala’o julgamentu ba krime omesídiu agravadu ne’ebé deskonfia involve arguidu na’in 18, tanba oho no so’e ona vitima Henrique Soares iha arredór Universidade da Paz (UNPAZ).

Arguidu kazu UNPAZ, submete ba julgamentu.

Arguidu na’in 18 mak hanesan FP, FT, DIC, FC, QB, SP, JL, JP, AV, LS, JS, JS, DP, LS, ZC, GP, NI no JC.

Lee Mós: TDD Adi’a Julgamentu Kazu Omesídiu UNPAZ Tanba La Prienxe Kolektivu

Iha julgamentu kontinuasaun ne’e, sasin Hermenegildo Soares rekoñese no  deskobre Henrique Soares nia mate liu hosi nia mane foun AV, tanba iha momentu ne’eba sasin hetan JC foti besi ida baku vítima nia ulun no arguidu SP rasta vitima tama ba arguida JS nia uma laran no arguidu LS mosu mai aperta vítima nia kakorok hodi rasta tama ba arguida JS nia uma laran.

Liu tiha oras rua, sasin hetan SP sa’e motorizada Honda Beat, halai uluk no arguidu NI konduz vitima nia motór no tula ema ida tán maibé sasin la konsege haree no arguidu JS no arguidu FT halai hosi kotuk ba iha resintu UNPAZ.

“Depois de arguidu sira ho motór tun tia ba UNPAZ, la kleur arguidu JS la’o ain sa’e mai leten hodi dehan vitima ema oho. Tanba ne’e hau tun ba UNPAZ haree arguidu sira hanesan AV, LS no NI mak haleu hela matebian no hau nia mane foun arguidu AV nia faru iha parte oin nakonu ho ra’an. Tanba ne’e nia tauk hodi dada ha’u nia liman hatudu ba vitima nia mate katak apa vitima sira oho iha leten mak mai soe iha ne’e. Rona ne’e ha’u atu telefoni Polisia maibé arguidu AV hateten apa ha’u la oho ida maibé ha’u mai so’e de’it mate isin tanba arguidu JC, SP no LS mak oho,” sasin deklara.

Hafoin rona sasin, TDD adi’a hikas julgamentu ba loron seluk hodi kontinua rona sasin sira seluk.

Antes ne’e, tuir akuzasaun hosi MP katak, iha loron 20 fulan juñu 2020 vítima hamutuk ho arguidu sira halibur-malu iha JS nia uma hodi so’e osan hamutuk hodi ko’alia arguidu J nia mãe nia barlake tanba mesak família de’it hanesan tiu, subriñu no primu de’it, miabé totál osan la atinji montante ne’ebé sira atu lori no komesa mósu diskusaun entre arguidu JS ho arguidu JC tanba arguidu JC tau osan $250.

Nune’e, vítima Henrique Maia Soares ko’alia “ha’u mak servisu hanesan o ne’e la tau hanesan ne’e, nune’e arguidu JC ko’alia ba arguidu sira seluk no testemuña sira dehan “o labarik ida, hanesan o ne’e, bele ko’alia fali mai ha’u ho idade tanba ne’e nia sai ba liur hodi dehan ha’u tun mai mak ha’u halo buat ida, hatudu ba o nia maun sira haree”.

Arguidu JC ho nia fen sai hosi fatin tau osan nian fila ba uma no to’o iha kios arguidu sosa serveza lata haat hodi kontinua ko’alia ba nia fen dehan “o uluk ona ba, ha’u sa’e ba leten oras ida nia laran, ha’u tun fali mai mak ha’u halo buat ida hatudu ba o nia maun sira haree, maibé HS ko’alia ba arguidu katak la’ós hanesan ne’e, buat ida bolu maun alin ne’e, se o laiha la obriga no arguidu sa’e nia motór hodi fila ba uma.

HS kontinua hein arguidu JC kuaze oras rua nia laran hodi buka hatene saida mak atu akontese, maibé haree arguidu FP ba bolu vítima Henrique Maia Soares hodi sa’e vítima nia motórizada no vítima mak kondús ba diresaun kampuz UNPAZ no liu tiha tempu balun, arguidu FP ho vítima ba fali sira nia Bairru.

Bainhira sira na’in-rua to’o iha dalan kurva entre arguidu JS no JP nia uma oin, vítima para motór no arguidu JP hada’u vítima nia xave no arguidu sira seluk hamrik haleu iha vítima nia kotuk diskute malu ho vítima kuaze minute 30 no HS haree arguidu JC aperta vítima nia kakorok no arguidu SP rasta vítima tama ba arguida JS nia uma laran no arguidu sira hanesan JC, SP, FC, JL, LS, DP, LS, hamutuk ho arguidu sira seluk, lori besi ida no martelu ida baku mate vítima hanesan provas besi kanu ne’ebé iha ran.

Bainhira vítima mate ona arguidu JL no arguidu SP sa’e motórizada Honda Beat, halai uluk no arguidu NI konduz vítima nia motór no arguidu AV kous vítima iha ninia hiti leten tur iha kotuk, halai iha klaran no arguidu JS ho arguidu FT halai hosi kotuk ba soe vítima iha resintu UNPAZ.

Depois de so’e vítima iha resintu UNPAZ, arguidu sira fila ba uma hodi rai hela motór iha sira nia uma no vítima nia motórizada para hela iha UNPAZ no arguidu sira fila fali ba UNPAZ hodi ba haree vítima nia mate isin.

Iha ne’ebá sira komesa halo barullu no dehan katak estudante UNPAZ mak oho vítima, nune’e arguidu sira komesa tuda estudante UNPAZ ne’ebé halo hela estájiu iha fatin so’e vítima nia mate-isin.

Antes so’e vítima nia mate isin arguidu sira futu lia ho seguransa UNPAZ arguidu QB hodi taka lampu bóot iha aredor UNPAZ halo nakukun fásil so’e vítima nia mate-isin ne’ebé iha momentu ne’ebá vítima nia ran nakonu iha arguidu AV nia faru.

Tanba ne’e, MP akuza arguidu sira ba prátika krime omesídiu agravadu ne’ebé previstu iha artigu 139 hosi kódigu penál Timor Leste.

Audiénsia julgamentu prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac