Hatutan.com, (17 Agostu 2022), Díli- Country Director Plan International Timor-Leste (PITL), Dillyana Ximenes, hateten Plan Internasionál servisu makas bá área protesaun labarik atu hasae inan-aman sira-nia koñesimentu oinsá proteje oan sira.

Country Director Plan International Timor-Leste (PITL), Dillyana Ximenes. Foto/Hatutan.com

Dillyana Ximenes bá jornalista sira hafoin hasoru malu ho Prezidente Repúblika (PR), José Ramos-Horta iha Palásiu Prezidensiál, Kuarta (17/08/2022) hateten, PITL iha atu asegura direitu labarik no igualdade bá labarik feto, nune’e Plan Internasionál nia programa hotu-hotu liu-liu labarik feto ho diversidade sai alvu bá Plan Internasionál nia atividade ne’ebé iha.

 Relasiona ho labarik sira  ne’ebé servisu la tuir sira nia idade (traballu Infantíl), PITL liuhosi atividade sira hanesan atividade foku bá protesaun labarik hahú fó koñesimentu bá inan-aman sira, bá komunidade kona-ba halo nusa bele fó protesaun ne’ebé di’ak bá labarik sira bazeia ba sira-nia idade.

Labarik sira ne’ebé fa’an sasán iha dalan ninin,  nune’e saida mak Plan Internasionál halo ho parseiru sira nafatin halo liuhosi Plan Internasionál nia atividade balun fó hanoin bá inan-aman sira atu foku bá labarik sira tenke bá eskola, sira tenke hetan hahán ne’ebé sufisiente, sira tenke iha tempu halimar.

Bainhira partisipa bá atividade ekonomia ruma ne’e mós tenke sira hala’o tiha lai sira nia eskola, deskansa di’ak, han di’ak sira bele ajuda uitoan bazeia ba sira-nia idade.

PITL aprezenta bá Prezidente Repúblika atu labarik feto ida hola pozisaun nu’udar Prezidente Repúblika hodi komemora loron mundiál bá labarik feto ne’ebé sei monu iha loron 11 fulan-Outubru.

Xefe Estadu mós fó fatin iha resintu oin atu bele halo selebrasaun bá loron internasionál labarik feto iha fulan-Outubru no mós fó fatin balun iha ne’e atu labarik feto sira ne’ebé kuaze 40 liu sei mai husi Munisípiu Aileu, Ainaro, Covalima, RAEOA no mós Baucau bele enkontru iha salaun balu iha Palásiu Prezidensiál ida ne’e.

Ikus liu, hakarak agradese tanba fiar ne’ebé Xefe Estadu fó bá Plan Internasionál atu la’o hamutuk kampaña espesiál iha Munisípiu Ainaro liga bá hasa’e nutrisaun no hamenus má-nutrisaun iha Ainaro.

Jornalista: Vito Salvadór