Hatutan.com, (19 Agostu 2022), Díli—Komandante Ein-Xefe Forsa  Armada Libertasaun Nasionál Timor-Leste (FALINTIL), Kay Rala Xanana Gusmão, ne’ebé tinan-11  liubá  (iha tinan 2011) dezmobiliza tiha hosi vida militár nian bá vida sivíl, Sesta ohin (19/08/2022), simu hikas farda no boina FALINTIL-FDTL nian iha Kuartél Jenerál F-FDTL, Díli.  

Lee Mós : Xanana nia Ajenda Hanesan Enviadu Espesiál Estraordináriu Durante iha Roma

Xefe Estadu Maiór Jenerál F-FDTL, Tenente Jenerál Falur Rate Laek akompaña hosi Vise-Xefe Estadu Maiór Jenerál F-FDTL, Majór Jenerál Calisto Santos Coli “Coliati” entrega farda ho boina F-FDTL bá Xanana Gusmão. Foto/Media F-FDTL

Iha tinan 2011 Estadu Timor-Leste dezmobiliza no fó apoiu finanseiru bá eis-Kombatente Libertasaun Nasionál nian sira tuir Dekretu-Lei númeru 37/2011, no serimónia dezmobilizasaun ne’e sei iha ninia kontinuasaun tuir faze ida-idak nian, hodi fó liu prioridade bá sira ne’ebé partisipa iha luta libertasaun tinan barakliu.

Serimónia dezmobilizasaun dahuluk ne’ebé hala’o iha Betano, kombatente na’in-219 hetan omenajen no dezmobilizasaun iha “serimónia ofisiál ida, públika no solene”, ne’ebé inklui aprezentasaun uniforme, bivake (xapeo) no atribuisaun patente sira, medalla komemorativa no diploma onra nian sira.

Tempu ne’ebá  liuhosi serimónia dezmobilizasaun iha Betano hodi komemora loron FALINTIL bá dala-38,  Prezidente Repúblika, Taur Matan Ruak hateten, serimónia aniversáriu FALINTIL ne’e hala’o mós serimónia dezmobilizasaun hodi fó rekoñesimentu bá kombatente Frente Armada nia no halo inaugurasaun ba sentrál Elétrika Betano ne’ebé hetan investimentu makas hosi Estadu hodi kria kondisaun foun ba dezenvolvimentu.

Iha loron 19 fulan-Agostu 2022, molok loron ida atu selebra aniversáriu FALINTIL nian ba dala-47 (20 Agostu 1975-2022), eis Komandante ein-Xefe FALINTIL, Kay Rala Xanana Gusmão, hakat hikas Kuartél Jenerál FALINTIL-Forsa Defeza Timor-Leste (F-FDTL) iha Fatuhada, Díli, hodi haree besik liu progresu no dezenvolvimentu instituisaun forsa armada nian.

Estrutura Komandu Jenerál F-FDTL foto hamutuk ho Xanana Gusmão bainhira entrega farda ho boiña ba Xanana iha Kuartél Jenerál F-FDTL, Fatuhada, Sesta (19/08/2022). Foto/Media F-FDTL

Tuir informasaun katak dezde tinan 2005, Xanana Gusmão la sama iha arredores Kuartél Jenerál F-FDTL, Fatuhada, nune’e foin vizita fali Kuartél Jenerál F-FDTL, hodi haree besik liu progresu no dezenvolvimentu F-FDTL

Xanana nia prezensa iha Kuartél Jenerál F-FDTL  hanesan konvidadu espesiál, no ho kualidade nu’udár Chefe da Equipa de Negociações do Conselho para a Delimitação Definitiva das FRONTEIRAS MARÍTIMAS e Representante Especial do Governo para a ECONOMIA AZUL, hodi bele partisipa iha konferénsia internasionál ida ne’ebé mak organiza hosi Instituto de Defesa Nacional (IDN), subordinadu ho tema “O futuro Desenvolvimento de Timor-Leste: as F-FDTL, os recurcos naturais e a crise global do meio ambiente”.

“Momentu importante iha Komandante Xanana Gusmão fila-fali mai iha Kuartél Jenerál, depois tinan-16, nia la mai iha Kuartél Jenerál. Ida-ne’e, sinál pozitivu tebetebes katak, dezenvolvimentu forsas armadas nian, ne’ebé maka iha abut bá iha lider nasionál sira, ho prezensa komandante Xanana Gusmão nian, sei fó fila-fali perspetiva, enerjia foun bá dezenvolvimentu F-FDTL ninian rasik,” Xefe Estadu Maiór Forsa Armadas, Komodoro Donanciano Costa Gomes “Pedro Klamar Fuik” hateten bá jornalista sira.

Komodoro “Klamar Fuik” dehan, Kay Rala Xanana Gusmão, uluk hanesan komandante Ein-Xefe FALINTIL, ikus mai Prezidente Repúblika (PR) iha 2002 to’o 2007. Xanana halo parte ona iha Governu, agora mós sai hanesan personalidade eminente ida bá iha rai doben Timor-Leste.

“Nia (Xanana-red) iha, haree problema hothotu ne’ebé maka iha ita-nia rain, haree problema hothotu ne’ebé maka liu iha mundu, no nia buka artikula, oinsá maka atu bele fanun konsiénsia timoroan hothotu nian, para bele mós kompriende problema iha mundu, no kompriende ita-nia problema rasik, para ita bele la’o bá oin, bá iha dezenvolvimentu ne’e, ho ezemplu ne’ebé mak di’ak, ho valores ne’ebé mak di’ak, no tuir mehi ne’ebé maka sira husik hela bá iha ita-nia rain,” Klamar Fuik hateten.

F-FDTL iha inisiativa barak no forsas armadas iha papél ida importante tebes, atu bele kontribui bá dezenvolvimentu nasionál.

Objetivu realiza konferénsia internasionál ho tema “O futuro Desenvolvimento de Timor-Leste: as F-FDTL, os recurcos naturais e a crise global do meio ambiente” ne’e, hodi komemora aniversáriu FALINTIL bá dala-47.

Jornalista: Rogério Pereira Cárceres