Hatutan.com, (29 Agostu 2022), Díli—Prosesu kontinuasaun ba investigasaun kazu asidente tráfegu iha Dare, ne’ebé rezulta Padre Abito José Brites Casimiro mate fatin, oras-ne’e Ministériu Justisa (MJ), liuhosi Policia Sientífica de Investigação Criminál (PCIC), hein hela rezultadu autópsia ne’ebé sei submete hosi médiku espesiálista sira iha Hospital Nacional Guido Valadáres (HNGV), Bidau, Díli.

Mate-isin Padre Abito José Brites Casimiro haloot ona iha Semitériu Padre sira nian iha Maloa Ailok laran, Dili,  Kuarta (24/08/2022). Foto/Hatutan.com.

“Prosesu la’o hela, oras-ne’e ita hein de’it rezultadu autópsia hosi doutór sira iha Ospitál nasionál, tanba ita seidauk simu rezultadu ba ida-ne’e,” portavós PCIC, Octavio da Costa Araújo hateten iha kna’ar fatin PCIC, Caicoli, Díli, Sesta (26/08/2022).

Lee Mós: Polísia Sei Investiga Kle’an Padre Abito Nia Mate

Bainhira HNGV entrega ona rezultadu autópsia matebian Padre Abito nian ba iha PCIC, maka parte PCIC sei kompleta kedan ho auto-notisia krime nian ne’ebé mak iha, hodi submete ba Ministériu Públiku (MP) ka Prokuradoria Jerál Repúblika (PJR), nune’e bele prosesa.

Alende ne’e, bainhira ministériu públiku fó ona autorizasaun maka parte PCIC rasik sei loke prosesu investigasaun inkéritu ba kazu ne’e, hodi deskobre nia kauza no verdade sira ba kazu ne’e.

Kazu asidente tráfegu ne’ebé rezultadu Padre Abito José Brites Casimiro mate fatin ne’e, akontese iha Segunda, (22/08/2022) maizumenus tuku 08:30 kalan, iha área Dare, Munisípiu Díli.

Tuir informasaun katak, asidente fatál ne’e mosu, bainhira Padre Abito viájen hela ho ninia motor marka Jupiter MX, Xapa Matrikula E 8081 no tula hela sidadaun ida ho inisiál MSR, fila hosi Dare tun fali mai Díli.

Hafoin asidente ne’e, komunidade sira ne’ebé hela besik iha área ne’ebá, trasnporta kedan vítima (matebian) ho sidadaun MSR ne’ebé ho kondisaun kanek kamán, ba iha HNGV, Bidau, Díli. Maibé infelizmente, labele salva Padre Abito ninia vida.

Hafoin ida ne’e, parte PCIC to’o kedan mós iha fatin asidente hodi halo observasaun no ezaminasaun iha asidente, inklui foti mós evidénsia sira balun hanesan, espellu motór ne’ebé tohar, nomós kapasete kulit ne’ebé rahun hodi halo mós dokumentasaun vídeo no fotografia.

Observasaun Hatutan.com iha fatin asidente tráfegu nota katak, rai ku’ak ne’ebé Padre Abito hetan asidente, kuaze ho medida 90 sentimetru.

Antes ne’e, Komandante PNTL Munisípiu Díli, Superintendente Xefe Polísia, Henrique da Costa dehan, Parte Tránzitu Díli nia serbisu maka, haree liu ba prosesu asdente tráfegu no buat seluk entrega ba parte relevante sira.

“Ita parte Munisipiu Dili nian halo prosesu ba ida asidente tráfegu ninian, kona-bá seluk ne’e sira mak prosesa. Kona-bá evidénsia sira hanesan motór ne’e iha ona trázitu munisipiu Díli,” nia hateten.

Iha loron 25 tuku 10:00  Oras Timor Leste, jornalista tenta halo konfirmasaun ho Xefe Departementu Forénsika Hospital Nasional Guido Valadares (HNGV), Doutór Nilton Tilman kona-bá rezultadu autopsia ba Padre Abito nian, maibé nia laiha fatin.

Jornalista kontinua konfirma iha loron daruak iha tuku 10:00 dader Oras Timor Leste, maibé nafatin laiha fatin ho razaun laiha oráriu halo operasaun iha HNGV, tanba ne’e jornalista tenta halo konfirmasaun liu hosi telemóvel maibé la atende.

Padre Abito Haloot Iha Semitériu Maloa

Mate-isin Padre Abito José Brites Casimiro haloot ona iha Semitériu Padre sira nian iha Maloa Ailok laran, Dili, iha Kuarta 24 Agostu 2022.

Molok haloot, hala’o uluk misa funerál iha Igreja Imaculada da Conceição Catedral Díli, ne’ebé prezide hosi Padre Gaciano Santos Barros, partisipa hosi Padres, madres, família no sarani hosi Dioseze tolu.

Iha misa funerál ne’e Padre selebrante enkoraza familia no komunidade Katólika ne’ebé lakon Padre Abito atu laran metin nafatin ba Maromak nu’udár moris ne’e nia Na’in no Reza atu haraik fatin di’ak ba Amu Lulik otas nurak ne’e ninia klamar hodi bele haksolok hamutuk ho Anju no Santu sira iha Lalehan.

Jornalista: Rogério Pereira Cárceres/Carmelita Isaac