Hatutan.com, (30 Agostu 2022), Díli- Arkidioseze Metropolitana Díli hamutuk ho família matebian Padre Abito José Brites Casimiro, to’o oras ne’e hein  nafatin ho esperansa rezultadu autópsia hosi parte forensik Hospital Nasionál Guido Valadares (HNGV) atu bele iha klareza bá Padre Abito nia mate.

Lee Mós : Investigasaun Ba Padre Abito Nia Mate, PCIC Hein Rezultadu Autópsia HNGV

Padre Juvito do Rego. Foto/Hatutan.com

Arkidioseze Metropolitana Díli ho família hakarak tebes atu bele iha rezultadu lalais hosi autópsia bá Saserdote ne’e nia mate.  Nune’e, bele fó serteza bá espekulasaun iha públiku kona-bá Padre Abito nia mate entre asidente tráfegu ka ema maka oho.

Pe. Juvito do Rego, reprezenta Arkidioseze Díli no família matebian, bá Hatutan.com iha Igreja Katedral, Villa Verde,  Díli, Segunda (29/08/2022), hateten autópsia bá maktoban Padre  Abito José Brites Casimiro nian, la’ós família mak husu, maibé Arkidioseze mak husu tamba ne’e to’o oras ne’e rezultadu seidauk sai nune’e sei hein Kardeál fila mai maka entrega no prosesu sira tuir mai depende bá autoridade Polísia Servisu Investigasaun Kriminál (PSIK) nian.

Advertisement

Padre Juvito do Rego hateten, PSIK mak halo servisu kontinuasaun bá Padre  Abito José Brites Casimiro nia mate, sira sei aprezenta bá iha Ministériu Públiku no prosedimentu ida ne’e sei la’o iha ne’ebá ne’e dunik husi parte uma  kreda no família hein de’it momentu oportunu ne’ebé sira sei lori rezultadu ne’e mai.

“Too oras ne’e rezultadu autópsia seidauk iha no ami seidauk hatene buat ida no ita sei labele fó klasifikasaun ida enkuantu ne’e seidauk para iha ita-nia liman,” Padre  Juvito do Rego hateten.

Autópsia nia rezultadu sei sai hanesan pontu de partida ida bá kazu ida ne’e tamba husu autópsia ne’e la’ós ona buat ida ne’ebé vulgar ka buat baibain, maibé konsidera hanesan kazu ida tamba igreja liuliu Arkidioseze Díli no família labele simu de’it. Katak tenke halo autópsia atu hatene saida mak halo nia mate hodi hatene lolos katak mate ne’e tamba asidente tebes dunik ka  tamba krime ruma.

“Ha’u sujere atu ita labele halo espekulasaun bá Padre  Abito José Brites nia mate, maibé hein rezultadu forensik ne’ebé sei mai liuhosi autópsia ne’ebé halo tiha ona no hein ida ne’e mai tiha mak ita hahú ko’alia la’ós ko’alia antes  rezultadu,” Nia subliña.

Saserdote ne’e hatutan too agora parte Igreja no família seidauk hola desizaun ruma enkuantu rezultadu autópsia seidauk sai.

Advertisement

Jornalista: Vito Salvadór