Connect with us
Pakote Ahi

Nasionál

PM Taur Husu IGE.IP Tenke Kee Estrada Ba Populasaun Iha Área Rurál

Published

on

Hatutan.com, (29 Agostu 2022), Díli— Primeiru Ministru (PM), Taur Matan Ruak husu ba Instituto Gestão Equipamento, Instuto Publico (IGE.IP), tenke kee estrada ba populasaun ne’ebé seidauk asesu ba estrada iha área rurál.

Kompañia internasionál Autozone ne’ebé manan tenderizasaun hodi sosa ekipamentu pezadu 15 realiza serimónia entrega ba IGE.IP no simu direta hosi Primeiru Ministru Taur Matan Ruak iha edifísiu IGE.IP, Colmera, Díli, Segunda (29/08/2022). Foto/Hatutan.com.

Xefe Governu husu ne’e, durante partisipa iha serimónia entrega Ekipamentus Pezadu unidade 15, ba IGE.IP, Ministériu Obras Públikas (MOP), hosi Kompañia Autozone hanesan manán na’in, iha edifísiu IGE.IP, Colmera, Díli.

Lee Mós: Ramos-Horta Transmite Populasaun Kribas Nia Susar Bá IGE Atu Konsidera

Taur Matan Ruak sente kontente loos, tanba tinan ida-ne’e nia laran, IGE.IP, liuhosi nia ekipamentu pezadu sira halo servisu barak loos. Uza másimu rekursu ne’ebé iha hodi apoia populasaun.

Advertisement

“Ha’u ladun preokupa atu ekipamentu pezadu halo osan ba Governu. Mais ha’u preokupa mak oinsá ajuda ita nia populasaun. Loke dalan ba sira, sira hakarak ba mota ruma, suru rai-henek besik. Sé ita boot sira ajuda, ne’e ha’u kontente. Suku sira ne’ebé estrada seidauk iha, loke, ne’e ha’u kontente loos,” Taur Matan Ruak hateten durante diskursu serimónia entrega ekipamentu sira ne’e, iha edifísiu IGE.IP, Colmera, Díli, Segunda (29/08/2022).

Konektetividade, integrasaun no kompetetividade sai objetivu boot ida Estadu nian. Ida-ne’e katak, Governu ida ne’ebé de’it mak ukun, nia tenke tau-matan ba ida-ne’e.

Konektividade katak, liga fatin ida ba fatin seluk, ne’e liu hosi Estrada de’it ka hosi tasi, ka hosi lalehan, aviaun. Konektetividade ne’e, kuantu mais nia laís, nia ajuda kompetividade.

“Ne’e katak, fatin ne’ebé estrada laiha, nia labele kompete ho fatin ne’ebé estrada iha. Fatin ne’ebé iha aeroportu, nia labele kompara ho fatin ne’ebé aeroportu laiha, aviaun laiha. Ida ne’e mós ajuda integra fatin ida ba fatin seluk, liga malu, integra malu,” Taur Matan Ruak, afirma.

Kompañia internasionál Autozone ne’ebé manan tenderizasaun hodi sosa ekipamentu pezadu 15 realiza serimónia entrega ba IGE.IP no simu direta hosi Primeiru Ministru Taur Matan Ruak iha edifísiu IGE.IP, Colmera, Díli, Segunda (29/08/2022). Foto/Hatutan.com.

Servisu ida ne’e, iha TL halo hosi empreza privadu sira no hosi mós IGE.IP. Sira ne’ebé bele loke konkursu ba emprezáriu sira timoroan, emprezáriu internasionál sira, konkore, sira ajuda dezenvolve. Maibé, área hirak ne’ebé la presiza, IGE.IP haruka nia ekipamentu pezadu sira mak bá.

“Mais la’ós ida ne’e de’it. Sé ita haree iha tempu la’ós uluk de’it, mais liu-liu tempu ida governasaun ida ne’e nian, ita haree iha servisu boot ida ne’ebé mak IGE halo, mak saida, responde ba situasaun emerjénsia sira, liu-liu iha dezastre naturál. Sidadaun sira presiza, emprezáriu sira presiza, populasaun sira tomak, bee tama sira nia fatin, taka estrada, taka fatin-fatin, sira halo sokoru, sira ajuda, sira tulun,” Taur hateten.

Advertisement

La’ós de’it sira IGE mesak, dala-ruma seitór privádu sira mós halo, fó apoiu, balun estabelese kontratu ho governu, mais balun pur sentidu umanizmu, sira oferese de’it sira nia sasán ka ekipamentu pezadu sira, hodi presta servisu ba sidadaun sira.

PM Taur agradese ba lideransa másima IGE.IP nian, ho tékniku sira, inklui funsionáriu traballadór sira, ba sira nia sakrifísiu. Sira nia servisu, la hatene loron ho kalan, sira sakrifika sira nia aan, atu halo ema seluk kontente.

Iha fatin hanesan Prezidente IGE.IP, Ermenegilda da Costa Laurentina dehan, prosesu sira kona-bá ekipamentus pezadus, IGE.IP hetan apoiu másimu hosi Primeiru Ministru, Taur Matan Ruak, hahú kedan iha planu, to’o aprovasaun finál orsamentu.

Prosesu sosa ekipemntu pezadu sira ne’e, halo hosi Comissão de Aprovizionamentu e do Fundo das Infraestrutura (CAFI), ho durasaun kuaje fulan 6 resin, hosi maiu to’o dezembru 2021. Ikus mai, selebra duni kontratu ho Kompañia internasionál Autozone, liuhosi diretór Chen Youyu, nu’udár manán na’in iha fulan-marsu 2022.

Montante orsamentu ne’ebé alokadu hodi sosa ekipamentu pezadu hirak ne’e, hamutuk millaun $2 no kompañia manán ho nia valór kontratu millaun $1,688, hodi sosa ekipamentu pezadu hamutuk 15, ho nia funsaun ne’ebé diferente.

Advertisement

IGE.IP espera ho númeru mákina foun 15 unidades, bele ajuda hodi atinje projesaun ba poupansa no reseitas ne’ebé IGE.IP tau ona.

“Hakarak informa mós katak, tuir kontratu, ekipamentus foun ne’ebé ami sosa, sei halo durante tinan tolu. Konkordansia ne’e, ami halo, atraves de kontratu ami espera sei bele kumpri promesa ida-ne’e,” Ermenegilda da Costa Laurentina, hateten.

Kompañia internasionál Autozone ne’ebé manan tenderizasaun hodi sosa ekipamentu pezadu 15 realiza serimónia entrega ba IGE.IP no simu direta hosi Primeiru Ministru Taur Matan Ruak iha edifísiu IGE.IP, Colmera, Díli, Segunda (29/08/2022). Foto/Hatutan.com.

Oras ne’e, IGE.IP ninia ekipamentu pezadu ne’ebé ezistente hamutuk uniade 112. Hosi númeru ne’e, unidade 72 destakadu iha munisipiu 12 ho RAEOA. Unidade 17 sei iha prosesu manutensaun, no unidade 23 kondisaun aat ona.

“Bele dehan katak, IGE.IP jere hela ekipamentus pezadus ho númeru boot liu iha Timor-Leste, kompara ho setór privádu nasional sira. Tanba ne’e, rekursu governu nian ne’ebé IGE.IP jere, liu-liu ekipamentus pezadus tuan no foun, hamutuk 127 unidades,” nia esplika.

Ho mákina sira ne’ebé ezistente, IGE.IP konsege halo poupansa ba orsamentu ho montante purvolta millaun $22.5, iha tinan haat nia laran.

Iha 2022, sira konsege ona poupa orsamentu ho montante rihun $900-resin. Fiar katak to’o fulan-dezembru 2022, IGE.IP bele poupa orsamentu bele to’o millaun $1 ka to’o millaun $1.5 resin.

Advertisement

Durante tinan haat, IGE.IP konsege rekolla reseitas ho totál millaun $1.5 resin, liuhosi fó aluga mákina, no fa’an fatus-britas. Iha 2022 ne’e, sira konsege rekolla ona reseitas ho orsamentu kuaje rihun $55 resin.

IGE.IP iha papél rua ne’ebé importante tebes, ida, halo poupansa ba orsamentu estadu, no buka reseitas ba estadu.

Halo poupansa, signifika prevene kustu irrasionál sira no halo poupansa ba Estadu, liuhosi apoiu loke estrada foun, halo manutensaun estrada rurál no normalizasaun mota sira, iha tempu bailoron, no tempu udan.

Iha sorin seluk IGE.IP mós rekolla reseitas, signifika katak, fó aluga mákina pezadus ba setór privádu no individu sira, fa’an produtu brinkadeira.

Tuir planu, iha 2024 IGE.IP sei hetan doasaun mákina pezadu ho unidade hamutuk 26, hosi Governu Japaun.

Advertisement

IGE.IP estabelesidu bazeia ba dekretu lei númeru 11/2006, ho nia respetivu estatutu rasik. Natureza IGE.IP, nu’udár instituisaun públiku ne’ebé tutela ba MOP, hanesan administrasaun indireta, no goza mós autonómia finanseira, administrasaun, patrimóniu no jurisdisaun.

Oras ne’e, IGE.IP iha nia traballadór ka funsionáriu hamutuk 252. Funsionáriu públiku iha na’in 198, na’in 54 nu’udár funsionáriu kontratatu. Maioria hosi sira mak operadór, mekániku, motorista ho grau ne’ebé ki’ik tebes, grau G no F.     

Jornalista: Rogério Pereira Cárceres

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Horta ho Xanana Tuun Direta Simu Liurai Brunei Darussalam Majestade H. Hassanal Bolkiah

Published

on

Hatutan.com, (20 Maiu 2024), Díli- Prezidente Repúblika (PR), José Ramos-Horta ho Primeiru-Ministru Kay Rala Xanana Gusmão hamutuk ho membru governu sira simu ho ksolok prezensa Sua Majestade Haji Hassanal Bolkiah, Sultaun Brunei Darussalam ne’ebé too  iha Repúblika Demokrátika Timor-Leste hodi partisipa iha selebrasaun loron Restaurasaun independénsia ba dala-XXII (20 Maiu 2002-20 Maiu 2024).

(more…)

Kontinua Le'e

Nasionál

Ramos-Horta Kondekora Timoroan no Sidadaun Estranjeiru Ne’ebé Kontribui bá Dezenvolvimentu TL

Published

on

Hatutan.com, (19 Maiu 2024), Díli- Iha selebrasaun aniversáriu restaurasaun independénsia Timor-Leste nian bá dala-XXII (20 Maiu 2002- 20 Maiu 2024) Prezidente Repúblika José Ramos-Horta kondekora timoroan  no sidadaun estranjeiru sira ho grau orden Timor-Leste nian hodi fó rekoñesimentu bá sira-nia dedikasaun no kontribuisaun bá dezenvolvimentu Timor-Leste. 

(more…)

Kontinua Le'e

Nasionál

FPCI Apresia Toleránsia Relijiozu iha Timor-Leste Ne’ebé Reflete Fiar no Kultu Moris Povu Nian

Published

on

Hatutan.com, (17 Maiu 2024), Díli- Foreign Policy Community in Indonesia  (FPCI) apresia ho toleránsia relijiozu iha Timor-Leste ne’ebé reflete ho fiar no kultu moris povu nian.

(more…)

Kontinua Le'e
Advertisement

Trending