Hatutan.com, (01 Setembru 2022), Díli-Sua Eminénsia Kardeál Dom  Virgílio do Carmo da Silva, SDB, hato’o agradesimentu ida kle’an tebetebes bá Kay Rala Xanana Gusmão ho povu tomak Timor nian ne’ebé hamutuk ho nia dezde prinsípiu to’o mai simu bensan hanesan primeiru Kardeál Timor nian.

Lee Mós : Papa Francisco Selebra Misa Agradesimentu bá Kardeál Sira

Dom Virgílio  hateten, hafoin Papa Francisco anunsia naran kardeál foun 21, Xanana nu’udár ema primeiru hakerek  karta hodi manifesta ninia pozisaun apoiu total no agradese bá Vatikanu no hato’o parabéns ba Dom Virgílio.

Xanana kumprimenta ho rei Kardeál Dom Virgílio nia liman. Foto/Media PR

“Depois Papa anunsia rezultadu, ha’u simu primeiru felisitasaun hosi Avo Nana, maski fizikamente nia la mai hasoru direita ha’u, maibé nia hakerek nia karta ida kapás no furak tebetebes hodi manifesta nia hanoin halo rezumu ida no síntese ida kona-bá akontesimentu ida ne’e iha ita-nia rain bá Kreda Timor no obrigadu tebes bá karta felisitasaun ida-ne’e,  liu-liu bá ita-boot nia disponibilidade hala’o knaar reprezenta Prezidente Repúblika, José Ramos-Horta, hodi mai too iha Roma, mezmu ha’u hatene ita-boot servisu barak, maibé ita-nia prezensa importante tebes hodi hamutuk ho ami hotu no  obrigadu bá momentu istóriku ida ne’e,” Dom Virgílio hateten iha nia omília bainhira prezide misa agradesimentu ho Timoroan sira iha Kapela Urbaniana, Roma, Kuarta (31/08/2022).

Komunikadu Imprensa ne’ebé Hatutan.com asesu hosi gabinete media Prezidensiál, Kinta (01/09/2022),  haktuir katak  ksolok ne’ebé Dom Virgílio hetan hodi halibur ema hotu hosi Timor-Leste no rai seluk halo viajen too bá Vatikanu hodi selebra hamutuk ho misa, nu’udar solok ida ne’ebé la’ós deskreve de’it ho liafuan, maibé solok ida ne’ebé hatudu duni hosi hahalok no atitude, domin nu’udár ema Katóliku hodi hametin liután koordenasaun no konfiansa balu hodi harii paz iha ema hotu- hotu nia moris.

Lee Mós : Xanana ho Kardeál Dom Virgílio Hahú Ko’alia Papa Nia Vizita Mai TL

Iha fatin hanesan, Koordenadora Timoroan iha Itália (COMTIL), Madre Joana Soares hateten, misa ne’e halo hodi agradese ba Na’i Maromak  ne’ebé hili timoroan ida sai kardeál dahuluk Timor-Leste.

“Ho orgullu ami hato’o ami nia ksolok ba kardeál no bá kreda Timor nia futuru ho  haksolok no domin.  Ami nia agradese hodi fahe ksolok hamutuk ho ami iha biban kmanek ida ne’e no ami agradese mós bá Avo Nana  aman domin na’in, ne’ebé sempre hakuak ami hotu ita-oan sira,”  Madre Joana Soares hateten.

Iha fatin hanesan, Xanana Gusmão lori Prezidente Repúblika (PR) José Ramos-Horta nia naran agradese timoroan hotu bele halibur malu realiza misa ho kardeál.

Xanana dehan, ho prezensa kardeál Dom Virgílio nian sei haboot liután Igreja Katólika Timor-Leste nia servisu hodi eduka timoroan sira iha área rekursu umanu no parte fiar nian para bele lori Timor-Leste moris iha dame.

Tuir Xanana, daudaun ne’e Timor-Leste harii ona komisaun fraternidade umana ne’ebé lidera hosi Presidente Repúblika komesa halibur ona lider rejiaun hotu iha Timor-Leste buka realiza atividade oin-oin para fó susesu bá misaun Papa Francisco nian iha mundu tomak kona-bá fraternidade umana.

Xanana husu bá timoroan sira atu labele haluha istoria ne’ebé Timor-Leste selebra tinan 500 evanjelizasaun Igreja Katólika too ohin loron hametin tebes unidade no fiar timoroan sira.

Lee Mós : Kardeál Foun Sai Roman bá Sarani Tomak Maromak Nian

“Ita nia identidade nu’udar povu Katóliku liga ho nia luta ba ukun rasik aan. Tanba ne’e bá Eminénsia Reverendísima Kardeál Virgílio lori presidente nia naran, atu dehan de’it katak, Timor-Leste orgullu boot tebes hetan primeiru kardeál, ami fiar katak ho kardeál Igreja iha Timor-Leste bele hadi’a di’ak liután responde ba nesesidade ne’ebé ita enfrenta iha sosiedade nia laran,” Xanana hateten.

Lider Istóriku Xanana hatutan, mensajen Papa Francisco rasik husu atu Igreja servisu makas tau matan sosiedade hodi hametin sira nia fé no kontribui hadi’a rekursu umanu bá timoroan sira.

Xanana hatutan, ohin loron problema boot ne’ebé Timor-Leste enfrenta mak, falta armonia no moris dame iha sosiedade nia leet, tanba joven sira iha organizasaun arte-marsiál no arte rituál maka kontinua kria problema, enkuantu problema relijiaun nunka akontese iha Timor-Leste.

Iha parte seluk, reprezentante Amululik hosi Nusa Tengara Timor (NTT) Indonézia iha Italia, Padre Paulos Halek Bere, kontente tanba NTT no Timor-Leste illa ida de’it, mezmu diferensa nasaun, maibé kontente Timor-Leste iha rasik ona kardeál foun ida.

“Ami kontente, ita Timor NTT no Timor-Leste rai ida de’it, bele iha ona kardeál foun ida bá ita hotu, hodi fó susesu ba servisu kreda nian iha sosiedade,”nia apresia.

Madre Relegios Of The Vergin Mary (ROTVM), Franciska Oematan kongratula Kardeál Dom Virgílio bele susesu iha ninia knaar tomak lori dame bá ema hotu no ajuda povu hakbesik bá Kreda.

 Reprezentante timoroan ne’ebé servisu iha Inglaterra, Francisca dos Santos,  kontente tebes reprezenta timoroan  hodi hola parte iha serimónia tomak Kardeál foun bá Timor-Leste nian.

Jaime de Oliveira hanesan traballadór Timoroan iha Inglaterra kontente mós mezmu Timor-Leste rai ki’ik, maibé ho reprezentasaun povu maioria Katólika fó atensaun bá mundu no Vatikanu hodi tau matan di’ak liután ba dezenvolvimentu uma kreda.

Enviadu Espesiál Estraordináriu Prezidente Repúblika, Kay Rala Xanana Gusmão ho ksolok hamutuk ho komunidade timoroan no Indonézia sira iha Roma bidu simu Kardeál Dom Virgílio do Carmo da Silva, SDB, molok selebra misa agradesimentu ho timoroan sira iha Kapela Urbaniana, Roma.

Xanana kontente lori tais bidu hasoru kardeál, tanba depois Timor-Leste selebra tinan 500 evanjelizasaun Igreja Katólika tama Timor-Leste, no tinan 23 selebrasaun Konsulta Populár, 30 fulan-Agostu 1999 foin primeira vês Papa Francisco hili Dom Virgílio nu’udár primeiru kardeál bá Timor-Leste.

Eminénsia Reverendísima Kardeál Virgilio do Carmo da Silva hato’o agradese timoroan sira, Embaixada Timor-Leste ho Xanana Gusmão nu’udar Enviadu Espesiál Estraordináriu Prezidénsia Repúblika ne’ebé organiza misa agradesimentu ne’e envolve mós padre no madre sira hosi Timor Osidentál ka Nusa Tengara Timor (NTT).

Kardeál Virgílio konsidera misa ne’e hodi manifesta ema hotu- hotu nia sentimentu no gratidaun agradese ba Na’i Maromak Nia planu furak sira hotu hodi oferese kardeál bá Timor-Leste.

“Ita hakarak agradese ba Na’i Maromak  ho motivasaun no razaun ida de’it,  katak ita hotu ho sentimentu ida gratidaun,  agradese ba Na’i Maromak ba buat oin-oin ne’ebé ita simu no dalan ne’ebé di’ak liu maka agradese ba eukaristia. Eukaristia maka dalan aas liu, ona ba ita sarani atu agradese fó obrigado Na’i Maromak,” Dom Virgílio hateten iha nia omilia.

Embaixadora Timor-Leste ba Vatikanu, Juvita Rodrigues B. Ataide Gonçalves, hato’o agradese  bá partisipasaun timoroan sira durante semana ida resin hamutuk hodi organiza malu realiza atividade lubuk ida hahú hosi simu bainaka Estadu nian no Kardeál ho padre no madre sira nia viajen iha Vatikanu partisipa serimónia konsultóriu públiku too selebrasaun misa agradesimentu.

 Jornalista : Vito Salvador