Hatutan.com, (02 Setembru 2022), Díli—Estrutura organizasaun arte-marsiál Persaudaraan Setia Hati Tarate (PSHT)  husu bá membru tomak, inklui família hotu PSHT nian atu tuur hakmatek hodi kontribui nafatin bá pás, unidade no estabilidade nasionál.

Matebian José Bernardo bianhira sei moris hatais kamiza organizasaun arte-marsiál PSHT no imajen ilistrasaun tara-aan iha sela polísia. Foto/Repro Espesiál

Sekretáriu Jerál PSHT, Pedro Aparício Guterres, fó sai apelu ne’e relasiona ho kazu joven ida mate tara aan iha sela detensaun Polísia Nasionál Timor Leste (PNTL) Munisípiu Díli, Kinta kalan (01/09/2022).

Matebian ho naran kompletu José Bernardo nu’udár membru ka warga PSHT  ne’ebé hetan graduasaun iha tinan 2019.  Nia tama sela PNTL Munisípiu Díli, loron 01 fulan-Setembru ne’e, tanba deskonfia envolve iha kazu baku-malu no tuda-malu iha área Audian, Díli.  

Pedro Aparício, ne’ebé mós sei sai hanesan advogadu hodi fó asisténsia legal  bá kazu José Bernardo nia mate iha sela laran ne’e hateten, iha Kinta kalan ne’ebá kedas, nia parte hamutuk ho Prokuradoria Distritál Díli, Provedoria Direitu Umanu no Justisa (PDHJ), Polísia Sientífika Investigasaun Kriminál (PCIC), Polísia Nasionál Investigasaun Kriminál (PNSIK) ho organizasaun  sosiedade sivíl balun halo ona enkontru ho Komandu PNTL Munisípiu Díli, hodi loke prosesu kona-bá José Bernardo nia mate iha sela laran.

“Ami ko’alia ona hodi lori ba halo autópsia hodi buka hatene motivu kona-bá alin ne’e nia mate. Ne’ebé prosesu la’o hela. Prosesu ida-ne’e Prokuradoria Distritál Díli mak halo intervensaun direta kedas  tanba nia mós marka prezensa iha enkontru ne’e no nia asegura provas hotu-hotu kona-bá kazu ne’e. Prosesu  investigasaun ne’e mós hosi PCIC no apoiu hosi PNSIK tanba sira iha esperensia barak bá atende no investiga kazu sira ho tipu hanesan ne’e,” Pedro Aparício hateten iha hasoru malu ho família matebian  José Bernardo ho membru PSHT lubun iha aredór PNTL Munisípiu Díli hafoin enkontru, Kinta kalan.

“Bá alin ida-ne’e nia mate, ita hotu tenke kalma hodi hein prosesu autópsia, Prokuradoria  asegura tiha ona, PDHJ mós iha no submete ona bá prosesu judisiál,” Pedro Aparício hateten tan.

Nu’udár Sekretáriu Jerál PSHT, Pedro Aparício, husu bá membru PSHT ho família  matebian nian sira hotu labele halo espekulasaun no duun ema tanba sei halo autópsia.

“Ha’u husu atu hotu-hotu hakmanek nafatin kria no kontribui nafatin ba ambiente pás no dame iha ita-nia bairru, ita ida-idak nia hela fatin iha Díli no iha territóriu laran. Ita hein prosesu tuir mai no husu atu alin sira hotu hakmatek atu la bele fó espasu bá ema terseira parte aproveita situasaun ne’e hodi halo problema ho PSHT no ikus mai bele hamosu situasaun ida la di’ak bá imajen no integridade PSHT nian,” Pedro hateten.

Pedro afirma tan, atu hotu-hotu fiar nafatin autór judisiáriu sira halo sira-nia servisu no husu ba membru PSHT hotu hakmatek iha ida-idak nia fatin no estrutura PSHT sei akompaña prosesu ne’e too remata.

Jornalista : Rogério Cárceres