Hatutan.com, (07 Setembru 2022), Díli—Governu liuhosi Sekretária Estadu Juventude no Desportu (SEJD), Komisaun Reguladora Arte Marsiál (KRAM), iha tempu badak nia laran sei notifika ka bolu líder Grupu Arte Marsiál (GAM), Persaudaraan Setia Hati Terate (PSHT) ho Grupu Arte Rituál (GAR) hanesan Sete-Sete (77) hodi komunika ho sira, oinsá responsabiliza aktu krime ne’ebé mak membru sira komete ona iha Segunda (05/09/2022).

Prezidente Komisaun Reguladora Arte Marsiál (KRAM), Octávio da Conceição. Foto/Elio dos Santos da Costa.

Prezidente Komisaun Reguladora Arte Marsiál (KRAM), Octávio da Conceição hateten, hafoin akontesimentu kazu konfrontu ne’e nia parte husu ona ba públiku  liu-liu ba organizasaun arte marsiál sira ne’ebé hetan ona regalidade atu kontribui, kolabora ho instituisaun Estadu sira, hodi kria pás ho hakmatek iha ita nia rain.

Lee  Mós:Dom Virgílio Kardeál do Carmo husu GAM ho GAR Haburas Virtude Domin

“Semana oin ami bele notifika sira nia líder hodi halo justifikasaun ba aktu violénsia ne’ebé mosu dezde fulan Agostu to’o dia 05 Setembru,” Octávio da Conceição hateten hafoin enkontru koordenasaun servisu iha Ministériu Interiór (MI), Vila Verde, Díli, Kuarta (07/09/2022). 

Prezidente KRAM konsidera kazu konfrontu ne’ebé mosu hanesan krime públiku, no kabe ba responsabilidade individuál.

Instituisaun Estadu ba seguransa nian hanesan Komandu PNTL, sira mak halo investigasaun ba aktu krime ne’ebé mak individu ida-idak komete, tanba violénsia sira ne’e perturba tebes órden públika.

KRAM ninia kompeténsia maka halo de’it fiskalizasaun ba GAM ho GAR sira nia atividade, kontrola no fó sansaun ba nia membru sira ne’ebé involve, konsidera hanesan infrasaun ne’ebé kontra Lei Númeru 05/2017, no diretiva sira ne’ebé mak KRAM fó sai ona.

“KRAM haree liu ba prosesu infrasaun sira ne’ebé mak membru organizasaun sira halo no karik semana oin, ami sei notifika sira nia organizasaun atu iha responsabilidade ba mekanizmu justifikasaun sira ba KRAM,” Octávio da Conceição hateten.

Konfrontu ne’ebé mosu entre juventude iha área Akadiruhun ne’e, parte KRAM konsidera hanesan perturasaun ba órden públika. Maibé, KRAM rasik mós seidauk simu informasaun ruma katak, kazu ne’e involve hosi membru GAM ho GAR sira, tanba deskonfia de’it.

Maibé, prosesu investigasaun mak sei hatene katak, sé mak sai autór no sé mak sai vítima.

“Iha públiku, iha média sira ne’ebé mak la’o, facebook sira ne’e, hotu-hotu hateten dehan ne’e konfrontu entre arte marsiál ho arte rituál. To’o agora, ha’u seidauk simu informasaun katak, ne’e arte marsiál ka la’ós arte marsiál. Iha públiku, saida mak ha’u haree iha média, facebook, iha video sira ne’ebé virál ne’e, ema joven sira ne’ebé mak tuda-malu, iha estrada laran ne’e konsidera violasaun,” Octávio da Conceição esplika.

Maske nune’e, iha Segunda diretiva KRAM nian no lei númeru 05/2017 hatuur klaru no momoos katak, infrasaun sira ne’ebé karik todan liu, involvimentu individu ida-idak hosi kada organizasaun GAM ho GAR sira sei fó sansaun administraiva hahú hosi $200 to’o 2.000.

Jornalista: Rogério Pereira Cárceres