Hatutan.com, (09 Setembru 2022), Díli-Komandu operasaun konjunta kompostu hosi FALINTIL-Forsa Defeza Timor-Leste (F-FDTL) ho Polísia Nasional Timor-Leste (PNTL) “la halimar” no la tolera kriminozu sira ne’ebé koko kria perturbasuan orden públiku no instabilidade.  

Lee Mós : Xanana Triste ho Grupu Joven sira Halo Violénsia bá Malu

Komandu Operasaun Konjunta F-FDTL ho PNTL. Foto/Elio dos Santos da Costa

Liuhosi konferénsia konjunta iha Kuartel Jenerál F-FDTL, Fatuhada, Díli, Sesta (09/09/2022),  komandu operasaun konjunta ne’ebé lidera Xefe Estadu Maiór Jenerál F-FDTL, Tenente Jenerál Falur Rate Laek, afirma  hafoin asina nota bá entendimentu nian nu’udár selebra akordu baáservisu hamutuk iha operasaun konjunta F-FDTL ho PNTL sei hala’o nia funsaun rigor  ligadu ho regra sira ba dezempeñamentu arma nian ka regra bá empeñamentu konjunta.

Plataforma entendimentu bá hala’o operasaun konjunta hosi forsa instituisaun rua ne’e, bazeia bá diretiva hasai hosi Ministru Defeza interinu ho Vise-Ministru Interior, no depois hetan mós aprovasaun liuhosi Konsellu Ministru.

“Iha kazu ida ne’e, Primeiru-Ministru  tenke fó ninia konkordánsia ikus liu, através Konsellu Ministru, ne’e maka ami elabora diretiva ida ne’e, para atu responde situasaun ne’ebé ikus ne’e akontese iha ita-nian rai-laran. Ita la jeneraliza, tanba la’ós iha territóriu nasionál tomak. Mais liu-liu, ita haree komunidade ka juventude sira ne’ebé hanesan tau liman fali bá forsa rua ne’e,” Tenente Jenerál Falur Rate Laek, hateten.

Dala-barak, problema sosiál ruma mosu, ne’ebé envolve membru F-FDTL ho PNTL, ema sempre fó sala polísia ho militár sira. Maske ida ne’e dala-ruma sai ona kultura, maibé, labele fó sala beibeik. Nune’e,  Falur Rate Laek, subliña, instituisaun F-FDTL ho PNTL, hanesan forsa ida ne’ebé treinadu  no Estadu investe ho nia istória naruk bá afirmasaun ida bá soberania nasaun nian.

“Imi tenke hanoin katak, farda ne’ebé imi (membru sira) hatais, boina ne’ebé imi taka, ne’e la’ós kualkér uniforme ida. Imi tenke hanoin katak, ida ne’e kulit lulik ida mak taka imi. Kulit lulik ida ne’e, kulit sé nian, kulit ida ne’e, ita nia eroi no martires sira,” Falur tenik.

Jenerál Falur konsidera katak, ho aktu kooperasaun ne’ebé iha ona, signifika sira-nia kompromisu bá oin maka sei servisu hamutuk  liután. Maske lei define, ida-idak halo nia servisu, maibé koordenasaun entre forsa rua ne’e, halo nafatin, hodi fó apoia nafatin ba malu.

Hatán kona-bá, iha operasaun konjunta ne’e, forsa rua sei utiliza mós armas, Falur Rate Laek, dehan, ida ne’e lalika dúvida, tanba forsa rua ne’e treina loro-loron ho profisionál tebes tenke kaer duni kilat

“Tenke kaer kilat. Kilat laiha, ne’e arte-marsiál. Tiru ka la tiru ne’e, iha regra nia laran. Ne’e ema treinu sira mak hatene, bainhira mak tiru, la tiru ne’e, sira mak hatene. Ha’u la treinu boot ida, mai husu fali ha’u ne’e. Aban bain-rua sira bá hatudu iha ne’ebá mak hatene,” Tenente Jenerál, Falur Rate Laek, hateten.

Iha biban ne’e, Tenente Jenerál, Falur Rate Laek, enkoraja ka fó hanoin bá nia membru sira, F-FDTL ho PNTL, tenke hatudu sira brani, tenke preparadu, treinadu, atu responde buat ne’ebé di’ak no aat.

Segundu Komandante Jerál Polisia Nasional Timor-Leste (PNTL), Komisáriu Polísia Mateus Fernandes, hatutan, F-FDTL sai hanesan instituisaun ne’ebé sei defende legalidade demokrátiku, ho sasán sira hotu ho dixiplina no lei ne’ebé mak vigór ho rigorozamente, tuir rega sira iha empeñamentu konjunta nian, hodi garante trankuilidade seguransa, interna ho filozofia neutru no imparsiál.

Komisáriu Mateus Fernandes, dehan, akontesimentu kazu konfrontu tuda-malu iha área Bidau Akadiru-hun, nu’udár insidente ida ne’ebé komplika tebes situasaun iha rai-laran, inklui kazu konfrontu entre juventude arte-marsiál no arte-ritual sira, iha  Díli no territóriu nasionál.

Sitasaun ida ne’e,  Mateus Fernandes afirma komplika tebes bá estabilidade nasionál, no ida ne’e sai hanesan preokupasaun ida Governu nian, hodi ikus mai Governu hasai rezolusaun númeru 26, iha loron  07 fulan-Setembru 2022, atu oinsá komandu F-FDTL ho PNTL bele konjunta ba empeñamentu asuntu ne’ebé mak agora daudaun ema hotu enfrenta.

“Operasaun ida ne’e, instituisaun F-FDTL ho PNTL afirma konkordánsia sira Katak, durante ne’e, KRAM fó ona regra atu regula arte-marsiál mais la implementa iha kraik. Tanba ne’e, forsa rua hamriik para afirma, saida mak durante ne’e lei sai ona, maibé la implementa iha kraik, komunidade kontinua hakfodak, pániku, ita-nia sidade Dili ne’e sai bandidu mak nakonu, portantu, ita tenke asegura,”  Komisáriu Polísia, Mateus Fernandes afirma tán.

Jornalista: Rogério Pereira Cárceres